Numeros 34
34
Ja b'a wax k'ot tik'an ja lu'umi
1Ja Dyosi, yal yab' ja Moisesi:
2-12—Al yab' ja israelenio jumasa, ja iti ja b'a'tik wax k'ot tik'an ja lu'um oj ka'yi'e'i:
—Ja b'a wax k'ot tik'an b'a ko'el k'inali, lajan ay sok ja wits Sin b'a Edomi: Ti wa stuluyi b'a stojol wax jak ja k'ak'u, b'a tik'an wax ch'ak ja niwan paman ja it laman ayi, snajtil wax waji masan Cades-barnea, ti wax ek' och b'a loman yaman Acrabim b'a Sin. Ja b'a Cades-barnea ti wax ek' b'a Hasar-adar, man wax k'ot b'a Asmon. Man tiwi, ti wax ek' sjoy b'a ja yok ja' b'a Egipto, ti wax k'ot tik'an b'a niwan paman ja' b'a Mediterraneo.
—Ja b'a wax tik'an b'a stojol wax och ja k'ak'u: Snajtil ti wax ek' yoj niwan paman ja' b'a Mediterraneo.
—Ja b'a wax k'ot tik'an b'a k'e'el k'inali: Tojxta wax waji, wa stuluyi b'a niwan paman ja' Mediterraneo, wax k'ot man b'a wits Hor. Man b'a wits jawi wax waji, ti wax k'ot b'a wax ajyi ochel b'a Hamat, man tiwi wax k'ot b'a Sedad. Jaxa tiwi, wax najat b'i ja mojoni, wax k'ot man Zifron ti wax ch'ak b'a Hasar-enan.
Ja mojon b'a stojol wax jak ja k'ak'u: Ti wa stuluyi b'a Hasar-enan wax k'ot man b'a Sefam. Man tiwi wax cho k'ot man b'a Ribla, ja lugar jawi tey b'a stojol wax jak ja k'ak'u yuj ja Ain. Ja mojon jawi, ti wax k'ot b'a loman yaman b'a paman ja' b'a Quineret, ti'xta wax kan mojan ja niwan ja' Jordan b'a oj ajyuk k'otel b'a niwan paman ja' b'a laman ayi.
Ja jastal oj pilxuk ja lu'umi
13Ja Moisesi, yal yab' ja israelenio jumasa:
—Ja' lu'um it ja oj sk'ep yi ja Dyos ja b'alun k'ole sok snalani. B'a k'ole ojni yi' slu'uma, ja chikan jastal oj ko' sb'aji. 14-15Ja k'ole sb'a Rubeni, sb'a Gad sok snalan ja k'ole sb'a Manasesi, yi'ajeta ja sb'aje'i, ti yi'aje b'a jun sti' ja niwan ja' Jordan b'a sti' ja chonab' Jerico.
16Jaxa Dyosi, ti yala yab' ja Moisesi:
17—Ja pagre Eleazar sok ja Josue, ye'n oj spil'e ja lu'umi. 18-29Mi kechanuk ye'nle', oj cho spay'e ja ma'tik ay ya'tel b'a jujun k'ole b'a oj koltanuke:
| Sk'ole | ja lok'olali |
|---|---|
| ja sb'a Judai | Calebi |
| ja sb'a Simeoni | Samueli |
| ja sb'a Benjamini | Elidad |
| ja sb'a Dani | Buqui |
| ja sb'a Manasesi | Hanieli |
| ja sb'a Efraini | Quemuel |
| ja sb'a Zabuloni | Elisafan |
| ja sb'a Isacari | Palatiel |
| ja sb'a Aseri | Ahihud |
| ja sb'a Neftali | Pedahel |
Currently Selected:
Numeros 34: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
