Numeros 32
32
Ja k'ole sb'a Rubeni, sb'a Gadi, stsa'a b'a oj ajyuke'a
1Ja k'ole sb'a Ruben sok sb'a Gadi, jel jitsan yi'oje ja wakaxi. Yajni yilawe ja lu'um jumasa b'a Jazer sok b'a Galaad jel lek oj ajyuk ja wakaxi 2ti yalwe yab' ja Moisesi, ja Eliazar sok spetsanil ja ma'tik ay ya'tel yuj ja israelenio:
3—Ja lu'um jumasa b'a Atarot, b'a Dibon, b'a Jazer, b'a Nimra, b'a Hesbon, b'a Elale, b'a Sebam, b'a Nebo sok b'a Beoni 4jel lek b'a oj ajyuk ja wakaxi, jaxa ke'ntiki jelni ki'ojtik ja wakaxa. Ja'yuj ja Dyosi, ya' el kan ja lu'um jumasa jaw b'a oj ya'yi ja yuntikili, 5ja'yuj ja ya'n, wax k'anatikon a wi a'ki'tikon ja lu'um jumasa jawi, b'a ti oj ajyukotikon tiwi, ta yuj k'a lek waxa wab' ja we'ni, mixa ojto wajkotikon ja b'a niwan ja' Jordani.
6Jaxa Moisesi, ti yala'a:
—Ta yuj k'a jachuki, lek k'a waxa wabyex ja ti oj kananik il ja we'nlexi, jaxa wa moj alijelex jumasa oj ch'ak wajuke ja b'a tiro'aneli. 7—We'n oj ja mulukex ta yuj k'a ti axwiye ja tuk k'ole jumasa mixa oj sk'an oj wajuke b'a lu'um ojto ya' ja Dyosi. 8-9Cho jach'ni sk'u'lan ja najate ja ma ek' paxta a wujilexi. Yajni jekawe b'a oj waj yil'e ja lu'um jumasa b'a Cades-barnea, ti'ita k'otye b'a niwan ja' Escol. Tsa'an jak yalwe yab' ja israelenio jumasa mok lom wajuke ja b'a lu'um it wa'n sk'apjel ja Dyosi.
10—Ja k'ak'u jawi, jel tajki ja Dyosi, ti yala'a: 11Ja we'nlexi, yuj ja mixa k'u'anonexi, ja'yuj ja ya'n oj kala wabyex ja ma'tik ek'elxa yuj ja jun tajb'e (20) jab'il el jan b'a Egipto mini june ma oj ochuk ja b'a lu'um kaloj yab' oj ka'yi ja Abraham sok ja Jacob ma ek' paxta a wujilexi. 12Ja ma wa sk'u'anoni, ojni ochuke'a, kechan ye'nle ja Caleb sok ja Josue.
13—Ja Dyosi, tajki sok ja israelenio jumasa, chab' tajb'e (40) jab'il a'ji b'ejyuke b'a yoj wits, man ch'ak chamuke ja ma'tik sk'okowe ja jas yala ja Dyosi.
14—Cho jachuk ja we'nlex ja ya'n, jach' mini t'un lekuk ja jas waxa k'u'lanex jastal ja ma' ek' paxta a wujilexi, jach' wax cho a k'u'lan ja we'nlex ja jastal wa sk'u'lane ajyi ja ye'nle'i. ¿Yuj a ma wax cho a k'anawex oj tajkuk pilan majke ja Dyos sok ja israelenio b'a? 15Ta yuj k'a ti oj kananik il ja we'nlexi mi oj ja k'u'ukex ja Dyosi, spetsanil ja kristyano jumasa ti oj ch'ak miljuke kan b'a yoj wits yuj ja Dyosi, ma' smul, we'nlex.
16Jaxa k'ole sb'a Ruben sok sb'a Gadi, ti yalawe yab' ja Moisesi:
—Ja ke'ntikoni oj tojb'estikon yi snaj ja kuntikiltikoni, oj cho tojb'estikon skorral ja wakax jumasa. 17Oj wajkotikon sok ja soldado jumasa b'a tiro'aneli, lajan oj jle'tikon jastal oj sta' b'a oj ajyuke ja jmojtikon jumasa. Kechan ja wax k'anatikon a kan lek ja kuntikiltikon ja lu'um b'a oj tojb'estikoni, b'a mi ti oj k'u'lajuk yi'e b'a mi sb'ejuk yuj ja kristyano jumasa b'a lu'um jumasa jawi. 18-19Yajni sta'awe b'a oj ajyuke ja tuk israelenio jumasa, jaxa ke'ntikoni oj kumxukotikon b'a jlujmaltikon, mix k'ana oj ajyukotikon soke ja b'a k'ax niwan ja' Jordani.
20-22Ti yala ja Moisesi:
—Lek ay, kechan b'a mi oj ajyuk ab'al k'umali, ja lek la jk'utstikik lajan ja niwan ja' Jordan b'a oj wajkotikik ja tiro'aneli. Ja jachuki wa'nexni sk'u'ajel ja yab'al ja Dyosi, kechani man ye'n oj ch'ak smil ja ma' mi lek waxa wila b'ajex soki, sok oj yi'kan ja lu'um jawi. Tsa'an oj b'ob' kumxanik b'a wa najexi, yuj ja ch'ak a k'u'lukex ja jas wa sk'ana ja Dyos sok ja israelenio jumasa.
23-24—Ja b'a wa'nex sk'anjeli, k'u'lanik ja snaj wa wuntikilexi, sok ja skorral wa wakaxexi. Kechan k'u'lanik ja jas a walunejex oj ja k'u'lukexi, yuj k'a mi a k'u'lanexi ojni a ta' a mulex sok ja Dyosa, cho ojni ya'a tup'exa.
25-27Ja k'ole sb'a Ruben sok sb'a Gadi, ti yalwe yab' ja Moisesi:
—Ja ke'ntikoni, a wa'tijumotikon, ja jas oj ja wali ojni jk'u'ltikona. Ja jche'umtikoni, ja kuntikiltikon sok spetsanil ja jchante'tikoni, ti oj ch'ak kan b'a jchonab' jumasa b'a Galaad. Jaxa ke'ntikoni, oj k'u'uktikon ja jas wa sk'ana ja Dyosi; oj wajkotikon ja b'a tiro'anel oj ajyuk b'a sti' niwan ja' Jordani.
28Ja Moisesi, sk'uman ja Josue, ja pagre Eleazar sok spetsanil ja ma ay ya'tel yuj ja israelenio jumasa, 29ti yala yabye'a:
—Ja k'ole kristyano jumasa sb'a Ruben sok sb'a Gadi, yalaweta oj ek' sk'uts e' a mokex lajan ja niwan ja' Jordani, b'a lajan oj ja wa'wex eluk ja lu'um b'a yalunej ja Dyosi. Yuxta ja' wa sk'anawe ja lu'um b'a Galaad b'a ti oj ajyuke tiwi. 30Kechan ta yuj mi sk'u'lane ja jas yaluneje'i, ti'ni oj ch'ak wajanik lajan a petsanilex b'a Canaani.
31-32Jaxa kristyano jumasa sb'a Ruben sok sb'a Gadi, b'a sti' sat spetsanil ja kristyano jumasa ti yalawe'a:
—Ja ke'ntikoni, oj k'u'ltikon ja jas wax yala ja Dyosi, chapan oj wajkotikon b'a tiro'anel b'a slujmal ja Canaani. Tsa'an oj cho kumxukotikon ja b'a pilan sti' niwan ja' Jordani. Yujni ja' jlujmaltikona.
33Jach' a'jiyi'e yuj ja Moises ja lu'um jaw ja kristyano jumasa sb'a Gadi, sb'a Rubeni, sok snalan ja sb'a Manasesi. Ja b'ajtani, ti ajyi tiw ja schonab'il sok ja yalaje ja Sihon smandaranum ja amorreo jumasa, sok ja Og mandaranum b'a Basani.
34Ja k'ole sb'a Gadi, ja k'e stojb'ese ja chonab' jumasa:
B'a Dibon,
b'a Atarot,
b'a Aroer,
35b'a Atarot-sofan
b'a Jazer,
b'a Jogbeha,
36b'a Bet-nimra sok
b'a Bet-aran.
Spetsanil ja chonab' jumasa jawi, ch'ak yawe och sts'akab'il b'a oj koltajuk yuj, cho sk'u'lane skorral ja schante'e jumasa.
37Jaxa k'ole sb'a Rubeni, ja k'e stojb'ese ja chonab' jumasa:
B'a Hesbon,
b'a Elale,
b'a Quiriataim,
38b'a Nebo
b'a Baal-meon sok
b'a Sibma.
Ayni b'a stukb'ese ja sb'i'il ja chonab' jumasa ja wa, jaxa b'a ye'n k'e stojb'ese'i, ye'nxani sle'awe sb'i'ila.
39-40Ja lu'um b'a Galaad, ye'n a'jiyi'e, yuj ja Moises ja yintil jumasa ja Maquir yunin ja Manasesi, yuj ja ye'n snutsuwe ja amorreo jumasa ma ti ajyiye tiwi, ja'yuj ye'n a'jiyi'e ja lu'um jumasa jawi. 41Ja Jair pilan yunin ja Manasesi, sjapa chab' oxe lu'um b'a kulane ajyi ja amorreo jumasa, ya sb'i'iluk Havot-jair. 42Ja k'ole sb'a Nobah, ye'n kanye sok slechanal ja lu'um b'a Quenati, sok spetsanil ja kristyano jumasa ma'tik mojan ay soki, ye'nxa ya' sb'i'iluk Nobah.
Currently Selected:
Numeros 32: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
