Numeros 31
31
Ilji k'ujol ja swinkil Madiani
1Ja Dyosi, yal yab' ja Moisesi: 2—A stup'e ja swinkil ja Madian, yuj ja mi skoltaye ja israelenio jumasa; tsa'an yuj ja jawi, ti oj chaman ja we'n—.
3Ja'yuj ja Moisesi, ti yal yab' ja israelenio jumasa:
—Chapa a b'ajik oj waj tiro'ananik sok ja swinkil ja Madiani. B'a sb'i'il ja Dyosi, oj ka'tik stup ja smule yuj ja lom mi sk'ana oj skoltayotike'i. 4Ja lajchaw k'ole yuj ja israelenio jumasa, oj sjek e jun mil (1,000) soldado b'a jujun k'ole'i.
5Jachuk, mi wokoluk stsomo sb'aj lajchawe (12,000) mil soldado. 6Ja Moisesi, sjeka ja Finees yunin ja pagre Eleazar b'a oj waj smojta ja soldado jumasa. Ye'n yi'aj och ja Finees ja jastik wax makuni it tsa'ub'ali, sok ja korneta oj sju' ja yajni oj k'e' ja tiro'aneli.
7Jach' och miljuke ja swinkil jumasa ja Madian yuj ja israelenio jumasa, yujni jach' yalunej ja Dyosa, ch'akni cham spetsanil ja swinkil jumasa ja Madiani. 8Ja b'a winik jumasa ch'ak miljuki, ti cham jo'e mandaranum sb'a Madiani: Ja it ja sb'i'ile ja mandaranum jumasa jawi: Evi, Requem, Sur, Hur sok Reba. Cho ti' cham tiw ja Balaam yunin ja Beori.
9Ja soldado israelenio jumasa, ch'ak yi'e ja ixuke madianita jumasa sok ja yal untik jumasa jach'ni ja chante jumasa yi'oje'i, sok ja jastik sb'aje b'a lektiki. 10Ch'ak ts'ikjuk yi'e' spetsanil ja schonab'ile ja swinkil Madiani, cho jach'ni ja ch'in chonab' jumasa. 11-12Spetsanil ja jas ch'ak yi'e'i, ch'ak waj ya'weyi b'a sk'ab' ja Moisesi, ja Eleazar sok spetsanil ja israelenio jumasa, ja ma'tik teye b'a Moab b'a niwan ja' Jordan b'a sti' ja chonab' Jerico.
13-14Ja Moisesi, sok spetsanil ja smoj jumasa ma' tey soki, yajni yilawe kumxita ja soldado jumasa yuj ja israelenio, ti'xa waj sta'e'a. Jaxa Moisesi, jel tajki sok, ja ma'tik niwan ja ya'tel yujile ja soldado jumasa, 15ti yal yabye'a:
—¿Jasyuj ja mi a milawex ja ixuke jumasa b'a? 16Jach'ni ja ye'nle'i, cho snochowe ja jas mi leki sje'a ja Balaam tak, cho sje'a weyi sk'okjel ja jas wax yala ja ma Dyos yuj ja israelenio jumasa tak, ja och sje'e yi stoyjel ja dyos Baal-peori. —Smul ye'nle, ja a'ji yi'e wokol ja israelenio jumasa yuj ja Dyosi, a'ji ko' sb'aje jun niwan chamel. 17-18Mok jas a wal'ex yab' ja ak'ixuk jumasa, tix kan a mokexa. Jaxa ma' sta'a ta sb'aj sok winiki ch'akan milawik, jach'ni ja yal ch'in keremtiki ch'akan milawik.
19—Ja soldado jumasa ma milwanita ma yuj syamunej sb'ak'tel jun cham winiki mok a wa'wex ochuke ja b'a yoj chonab'i, ti'xa wa'wex kan najat juke k'ak'u yuj ja b'a'y ja na'itsaltik jumasa. Jaxa we'nlex sok ja ma'tik a yamawex jani, b'a sti' sat ja Dyosi, sak'a a b'ajik ja yoxil k'ak'u sok ja b'a sjukili. 20Chuk'uwik ja wa k'u'exi, sok spetsanil ja jas tojb'el sok te'i, jach'ni ja jas tojb'el sok ts'ujmil chivo.
21-24Jaxa ye'n ja Eleazari, yala yab' spetsanil ja ma'tik kumxita jan b'a tiro'aneli:
—B'a oj b'ob' ochanik ja b'a yoj chonab'i, jel t'ilan oj ja k'u'ukex ja jas yala ja Dyos it a'jiyi ja Moisesi: Spetsanil ja jas oj ja wi'ex jani oj t'ilan sak'ub'al lek. Jastal k'anal tak'in, sakal tak'in, ma bronce, ma chikan jas tik'e tak'inil mi oj tsikxuk oj ch'ak sak'xuk lek sok k'ak', sokan sok sta'anil ti k'ak'. Ja b'a k'ajyel wax tsikxi, kechan oj sakxuk sok ja'. B'a sjukil k'ak'u chuk'u ja wa k'u' a wexexi, ja jachuki oj b'ob' ochanik ja b'a ja na'itsaltiki.
25Ja Dyosi, yal yab' ja Moisesi:
26—Ala yab' ja Eleazar sok ja ma'tik ay ya'tel yuj ja kristyano jumasa a skoltaya yajtab'ajel spetsanil ja ixuke'i, sok ja wakax jumasa sjapawe jan b'a tiro'anel ja soldado jumasa. 27Yajnix ch'ak ajtab'axuk a wujilexi, ti'xa pilawex snalana, snalan ja janek' ay ja ixuke'i, sok snalan ja janek' ay ja wakaxi, snalan ja oj yi' ja soldado jumasa, jaxa pilan snalani ja' oj yi' ja israelenio jumasa.
28—Ja b'a janek' oj yi' ja soldado jumasa, b'a jo'tike syen (500) ixuk pilawiki june, cho jach'ni sok ja wakax jumasa, 29a'wik b'a sk'ab' ja pagre Eleazari, ye'n oj ya'ki b'a jmajtan.
30—Jaxa b'a oj yi'kan ja kristyano jumasa pilawiki jujune b'a cha'tike tajb'e sok lajune (50), jach'ni b'a ixuke'i, sok jach'ni b'a wakax jumasa, a'wik b'a sk'ab' ja yintil jumasa ja Levi ma'tik wax a'tijiye b'a na'its b'a wax ajyi ja tsomjeli.
31-32Ja iti, ja' spetsanil ja ixuke sok ja chante jumasa yajtab'ane ja Moises sok ja Eleazari: Ay wake syen ox tajb'e lajune sok jo'e mil chej, (675,000) 33ay ox tajb'e lajune sok chab' mil (72,000) wakax, 34ay ox tajb'e sok jun mil (61,000) burro, 35sok ay jun tajb'e lajune sok chab' mil (32,000) ak'ixuk mi nupaneluk.
36-46Ja jastik jumasa spilawe snalan jun snalan ja sb'a soldado jumasa, jaxa pilan snalani ja sb'a kristyano jumasa. B'a jujune jastik jach' a'jiyi'e jastal iti: Oxe syen jun tajb'e lajune juke mil sok jo'e syen (337,500) chej, jun tajb'e lajune sok wake mil (36,000) wakax, jun tajb'e lajune mil sok jo'e syen (30,500) burro sok wak lajune mil (16,000) ak'ixuk. Ja b'a janek' yi'aj kan ja soldado jumasa, ti ya eluk ja smajtan ja Dyos ja Moisesi, ya'yi b'a sk'ab' ja pagre Eleazari, ye'nxa ja pagre ya'yi b'a sti' sat ja Dyosi, jach' jastal iti: wake syen ox tajb'e sok jo'e (675) chej, ox tajb'e lajune sok chab' (72) wakax, ox tajb'e lajune sok jun (71) burro, jun tajb'e lajune sok chab' (32) ixuke.
47Ja Moisesi, b'a chab' tajb'e lajune ixuk (50), ya el june ja ya'yi ja yuntikil ja Levi, yujni jach' yalunej ja Dyosa. Cho jach'ni sk'u'lan sok ja chante jumasa.
Ja majtanal ya'awe ja soldado jumasa
48Ja ma' ay ya'tel yuj ja soldado jumasa ma'tik wajye tiro'aneli 49ti yalawe yab' ja Moisesi:
—Wantox ch'ak kajtab'entikon ja israelenio jumasa ma'tik wajye b'a tiro'aneli, mini jun ma chama. 50Ja'yuj ki'ajtikon jan yi jun smajtan ja Dyosi, b'a a sch'ay ki'tikon ja jmultikoni. Itule ja jastik jta'atikoni: k'anal tak'in, yal kadena jumasa b'a nuk' k'ab'al, aniyo, likchinal, sok ay jas tuktukil jastik.
51-54Jaxa Moises sok ja pagre Eleazari, yi'aje kan ja jastik yi'aje och ja ma'tik ay ya'tel yuj ja soldado jumasa. B'a jujune soldado ya'a we'ni t'usan ja jas sjapaweyi ja sma'tik mi lek wax yila sb'aje soki. Spetsanil ja yalal ja yal tak'in jumasa iti, ay syen chan tajb'e sok chane (184) kilo. Spetsanil ja jastik jumasa jawi, ti yi'aje och b'a snajtsil tsomjel ja Moises sok ja Eleazari, b'a ti'to oj sna'e ja jas sk'u'lan yi ja israelenio jumasa ja Dyosi.
Currently Selected:
Numeros 31: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
