Numeros 29
29
Ja k'in sb'a korneta jumasa
1-6—Ja sb'ajtanil k'ak'u b'a yixawil Etanimi, Ja k'ak'u jawi mini jun israelenio oj a'tijuka, kechan oj stsom sb'aje b'a oj stoy'one. Ja k'ak'u jawi oj ja wa'wex ok'uk ja korneta jumasa, oj cho a wa'wex ki ja jmajtan b'a jujune k'ak'u, b'a jujune ixawi, ja israelenio oj smil'e' sok oj stsik eki, jun toro, jun waw chej sok juke yal chej b'a jun sjab'il, b'a mey syajb'el.
—Ja wakax oj ya'weki'i, oj yaweki sok wake kilo chok'b'el trigo wots'an sok aceite; sok ja waw cheji, oj ya'weki sok chane kilo chok'b'el trigo, jaxa b'a yal ch'in jumasa chab' kilo.
—Jaxa b'a oj ch'ay yi'e ja smule jumasa, t'ilan oj stsik eki jun chivo, yuj ja ke'n Dyoson yujile'i. Ja jachuki jelni lek wax ki'aj ja jmajtan jumasa'a.
Ja majtanal jumasa b'a k'ak'u sch'ayjel mulali
7—Sb'a lajune yajtab' ja yixawil Etanimi, mi ma oj wa'uk sok mi ma oj a'tijuk, spetsanil ja kristyano'i oj stsom sb'aje b'a oj stoy'one.
8-11—Cho ojni ya'weki ja jmajtan b'a jujune k'ak'u, sok ja it wax ya'weki yuj ja mulal jumasa, ja' k'ak'u jawi oj smil'e' sok oj cho stsik eki jun wakax, jun waw chej sok juke yal ch'in b'a jun sjab'il b'a mey mini jun syajb'el.
—Sok ja wakaxi, oj ya'weki sok wake kilo chok'b'el trigo wots'an sok aceite; sok ja waw cheji, oj ya'weki sok chane kilo chok'b'el trigo sok ja yal ch'in chej jumasa chab' kilo.
—Jaxa b'a oj ch'ay yi'e ja smule jumasa, t'ilan oj stsik eki jun chivo, yuj ja ke'n Dyoson yujile'i. Ja jachuki jelni lek wax ki'aj ja jmajtan jumasa'a.
Ja majtanal sb'a k'in lejchupat jumasa
12—B'a jo' lajune yajtab' ja junxta ixaw jawi, mi ma oj a'tijuk, spetsanil ja kristyano jumasa oj stsom sb'aj b'a oj stoy'one. Ja k'ak'u jawi, oj snoch yi jun k'in b'a jtoyjel oj alb'uk juke k'ak'u.
13-16—Cho ojni ya'weki ja jmajtan b'a jujune k'ak'u, ja sb'ajtanil k'ak'u ja semana jawi, oj smil'e' sok oj cho stsik eki oxe toro, chab' waw chej sok chan lajune yal ch'in chej b'a jun sjab'il b'a mey yi'oj mini jun syajb'el.
—B'a jujune wakax oj ya'weki sok wake kilo chok'b'el trigo wots'an sok aceite; b'a jujune waw chej oj ya'weki sok chane kilo chok'b'el trigo, b'a jujune ch'in yal chej sok chab' kilo.
—Jaxa b'a oj ch'ay yi'e ja smule'i, t'ilan oj stsik eki jun chivo yuj ja ke'n Dyoson yujile'i, ja jachuki jelni lek wax ki'aj ja jmajtan jumasa'a.
17-19—Cho ojni ya'weki ja jmajtan b'a jujune k'ak'u, b'a schab'il k'ak'u ja semana jawi, oj stsik eki lajchawe wakax, chab' waw chej sok chan lajune yal ch'in chej b'a jun jab'il sok b'a mey yi'oj mini jun syajb'el.
—Sok b'a jujune ja chante jumasa iti, oj ya'weki ja jmajtani sok chok'b'el trigo wots'an sok aceite, jach' oj ya'we ochuk ja jastalni kaluneji, ja chivo ojni ya'we ki'a, b'a jach' oj ch'ay yi'e ja smule'i.
20-34—Oj ya'weki ja jmajtan b'a jujune k'ak'u, jaxa b'a yoxil k'ak'u ja semana jawi, oj stsik eki juluche yal wakax, chab' waw chej sok chan lajune yal ch'in chej b'a jun jab'il, b'a mey yi'oj mini jun syajb'el, sok b'a jujune ja chante jumasa jawi, jach' oj ya'we ochyi ja chok'b'el trigo sok ja aceite ja'ni jastal kaloj yabye'i. B'a jujune k'ak'u oj stsik eki jun chivo yuj ja ke'n Dyoson yujile'i, sok ja'ni b'a oj ch'ayi'e ja smule'i.
—Ja b'a wax tukb'i t'usani, ja'yuj ja yal wakax jumasa: Yuj ja b'a yoxil k'ak'u oj ya'weki juluche, ja b'a schanili, oj ya'weki lajune; b'a sjo'ili, oj ya'weki b'alune; b'a swakili, oj ya'weki waxake; b'a sjukili, oj ya'weki juke. Ja jachuki jel ni lek wax ki'aj ja jmajtan jumasa'a.
35-38—B'a swaxakil k'ak'u mini jun israelenio oj a'tijuka, spetsanil ja kristyano jumasa oj stsom sb'aje b'a oj stoy'one.
—B'a jujune k'ak'u oj ya'weki ja jmajtani, ja junxta k'ak'u jawi, oj smil'e ki jun ja yal wakax sok oj stsik e'ki jun waw chej sok juke yal ch'in chej b'a jun sjab'il sok b'a mey yi'oj mini jun syajb'el.
—Sok ja yal wakaxi, oj ya'weki wake kilo chok'b'el trigo wots'an sok aceite; sok ja waw cheji oj ya'weki chane kilo chok'b'el trigo jaxa sok ja yal ch'in jumasa sok chab' kilo.
—Jaxa b'a oj ch'ay yi'e ja smule jumasa, t'ilan oj stsik eki jun chivo, yuj ja ke'n Dyoson yujile'i. Ja jachuki jelni lek wax ki'aj ja jmajtan jumasa'a.
39—Spetsanil ja it jumasa, ja jmajtan oj ya'weki ja israelenio b'a jujune k'ak'u jach'ni jastal je'unej yi'e'i, mi kechanuk ja oj ya'eki ja jmajtan b'a sk'apuneje ki'i, oj b'ob' ya'e sok spetsanil sk'ujole ja jas wa sk'ana oj ya'e ki'i. Oj b'ob' smil'e sok oj b'ob' stsik eki ja chante jumasa, oj b'ob' ya'weki pan, oj b'ob' ya'weki ja jmajtan b'a laman oj ajyuke jmoki.
40Ja Moisesi, ch'ak yal yab' ja israelenio jumasa, spetsanil ja jas yala ja Dyosi.
Currently Selected:
Numeros 29: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
