Numeros 28
28
Ja majtanal jumasa b'a jujune k'ak'u
1Ja Dyosi, yal yab' ja Moisesi:
2—Ala yabye ja israelenio jumasa, ja k'ak'u kaloj yabye'i, ja'ni oj yaweki ja jmajtan jumasa jastal pan, sok ja jmajtan wa stsikawe yuj ja wa stoyowone'i. A sk'u'luke ja jastal wax k'ana ja ke'n; 3-8jach' jastal iti:
—Spetsanil k'ak'u oj stsik'e chab' yal chej b'a jun sjab'il sok b'a mey syajb'el. June oj stsik'e b'a sakb'eli, sok june b'a och k'ak'u. B'a jujune chej oj yi'e' och jun prasko ya'lel ts'usub', b'a oj spek' eyi ja snajtsil tsomjeli, yuj ja wa stoyowone'i, sok chab' kilo chok'b'el trigo wots'an sok aceite olivo. Ja yajni teytikon b'a wits Sinai, kala yabye jex k'ana ja jmajtan jumasa jastal jawi, ja'yuj wanxani sna'awe'a.
Ja majtanal jumasa b'a sk'ak'u'il jijleli
9-10—Lajan sok jastal ja majtanal jumasa b'a jujune k'ak'u, b'a jujune sk'ak'u'il jijleli, oj stsik'e chab' yal chej b'a jun sjab'il sok b'a mini jun syajb'el ay. B'a jujune yal chej oj ya'weki sok ya'lel ts'usub' sok snalan kilo chok'b'el trigo wots'an sok aceite.
Ja majtanal b'a jujune ixawi
11—Mi kechanuk ja jmajtan jumasa oj ya'weki b'a jujune k'ak'u, cho jach'ni b'a sb'ajtanil k'ak'u b'a jujune ixawi, oj stsik'e chab' yal wakax, jun waw chej sok juke yal ch'in b'a jun jab'il, b'a mini jun syajb'el ay.
12-15—B'a jujune yal wakax, oj ya'weki sok chab' prasko ya'lel ts'usub' wake kilo chok'b'el trigo wots'an sok aceite. Sok ja waw cheji, oj ya'weki jun prasko sok snalan ya'lel ts'usub' sok chane kilo chok'b'el trigo, sok ja yal ch'in cheji, oj ya'weki sok jun prasko ya'lel ts'usub' chab' kilo chok'b'el trigo.
—Jaxa b'a oj ch'ay yi'e ja smule jumasa, t'ilan oj stsik eki jun chivo, yuj ja ke'n Dyoson yujile'i. Ja jachuki jelni lek wax ki'aj ja jmajtan jumasa'a.
Ja majtanal jumasa b'a sya'al k'inali
16-25—B'a yajtab' chan lajune ja yixawil Abib, b'a jujune jab'il ja wa snochowe yi ja k'in b'a sya'al k'inal yuj ja jel wa stoyowone'i, jun semana oj alb'uk ja k'in jawi. Man sb'ajtanil k'ak'u masan wax ch'ak ja semana, mix a'tijiye kechan wa stsomo sb'aje b'a wa stoyowone. B'a schab'il k'ak'u ja k'ini, wanxa swe'awe ja pan it mey yi'oj levadura.
—B'a sjukil k'ak'u ja k'in b'a wa stoyowone'i, oj stsik'e chab' yal wakax, jun waw chej sok juke yal ch'in b'a jun sjab'il b'a mey syajb'el. Cho oj ni ya'weki ja jmajtan b'a jujune k'ak'u.
—B'a jujune yal wakax oj ya'weki sok wake kilo chok'b'el trigo wots'an sok aceite; sok ja waw cheji, oj ya'weki chane kilo chok'b'el trigo, sok ja yal ch'in jumasa, chab' kilo.
—Jaxa b'a oj ch'ay yi'e ja smule jumasa, t'ilan oj stsik eki jun chivo, yuj ja ke'n Dyoson yujile'i. Ja jachuki jelni lek wax ki'aj ja jmajtan jumasa'a.
Ja sb'ajtanil jastiki
26-31—Ja k'ak'u oj ja tul'ex ja sb'ajtanil sat ja tek'ul jumasa b'a wa walajexi, ja'ni k'ak'u oj k'e'a tul'ex yi, ja sk'inil ja wa jasa b'ajexi. Ja k'ak'u jawi mi ma oj a'tijuk kechan oj ja tsom a b'ajex b'a oj ja toy'onex.
—Pilan yuj ja jmajtan jumasa b'a jujune k'ak'u yuj ja jel waxa toyowonexi, oj ja mil'ex chab' yal wakax b'a oj ja tsik ex, jun waw chej sok juke yal ch'in b'a jun jab'il, b'a mey syajb'el.
—B'a jujune yal wakax oj ya'wex ki sok wake kilo chok'b'el trigo wots'ob'al sok aceite olivo; sok ja waw cheji oj ya'wex ki chane kilo chok'b'el trigo, sok ja yal ch'in jumasa chab' kilo.
—Jaxa b'a oj ch'ay yi'e ja smule jumasa, t'ilan oj stsik eki jun chivo, yuj ja ke'n Dyoson yujile'i. Ja jachuki jelni lek wax ki'aj ja jmajtan jumasa'a.
Currently Selected:
Numeros 28: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
