Numeros 27
27
Ja yak'ixuk jumasa ja Selofhadi
1Ajyi jun winik sok ja israelenio sb'i'il Selofhad, ja' stat ja Heferi, ja yij ja Galaad, a stat awel ja Maquiri. Spetsanile ti aye sok ja k'ole sb'a Manases yunin ja Jose.
Ja Selofhadi, ay jo'e' yuntikil ak'ix, jach' sb'i'ile' jastal iti. Mahla, Noa, Hogla, Milca sok Tirsa. 2Jun k'ak'u wajye sjo'wanile b'a wax ajyi ochel b'a snajtsil tsomjeli, waj sk'umuke ja Moisesi, ja Eleazari, ja ma'tik niwak ya'tel sok spetsanil ja israelenio jumasa. Ti yalawe'a:
3—Ja jtatikoni, me' snocho ja jas yala ja Core, b'a ja ti mi oj sk'u'uk ja Dyosi. Jasa, ti'ni cham kan b'a wits yuj ja smuli. Mini ajyi yuntikil kerema, 4yuj ja jawi mi sb'ejuk ti oj ch'ayuk ja sb'i'il ja b'a ochel ju'un sok ja yuntikili. Mi sb'ejuk ja mi oj ja wa'ex ki'tikon ja slu'umi. Jachuk ja ke'ntikoni, a'wiki'tikon xe'nuk ja jlu'umtikon b'a oj ka'teltatikon sok ja jmoj alijeltikon jumasa.
5Ja Moisesi, ti waj sjob' yi ja Dyosi, 6jaxa Dyosi, ti yala'a:
7—Ja yak'ixuk ja Selofhadi, ayni sb'ej ja jas wax yalawe'a. A'yi'e ja slu'um ja state'i, a ya'teltaye sok ja smoj alijele jumasa. 8Cho ala yabye ja israelenio jumasa:
—Ta wan k'ax cham jun winik mi jun yuntikil kerem ajyi, ja slu'um jumasa ja'ni oj yi'kan ja yuntikil ixuki. 9Cho mini k'a jun yuntikil ak'ix ay, ja slu'um jumasa, ja' oj yi'kan ja b'ankilali. 10Cho mini k'a jun smoj alijel ay ja slu'umi ja' oj yi'kan ja smoj alijel jumasa ja stati. 11Cho mini k'a ja stati, mey smoj alijel, a'nima jun najtil smoj alijel ye'n oj yi'kan ja slu'umi. Ja iti, yujni ke'n jach' kaloj a wabyexa; spetsanil k'ak'u sb'ejni oj ja k'u'ukexa.
Jun yajk'achil mandaranum yuj ja israelenio
12-14Ja Dyosi, yal yab' ja Moisesi:
—Mini ja we'n sok mini wa moj alijel Aaroni, mi jak a k'ujolex jastal jel ja kipi. Ja chawanilex a k'okowex ja jas kala wabyex b'a takin lu'um k'inal b'a Sin ja yajni jel tajkel jmok ja kristyano jumasa ja it wa sk'anawe ja' b'a Meriba. K'e'an b'a wits Abarim b'a ti oj ja wil tiw spetsanil ja lu'um oj ka'yi'e ja israelenio jumasa. Jasa, ja we'n ti oj chaman tiwi, mini t'un oj ja wil ja slekila, cho jach'ni jastal ch'ay sna'jel ja wa moj alijel Aaroni.
15Ti yala ja Moisesi.
16—Dyos kuj, jpetsaniltikon we'n waxa wa'a ja jsak'aniltikoni. Wax k'anawi ts'akatal a'yi'e pilan k'elumane ja israelenio jumasa 17chikan b'a oj wajuke'a, kechan a je'juk yi'e jas oj sk'u'luke. Ja wa wuntikili, mok wa ajyuk jastal jun nole chej b'aj mey talnuman.
18-21Ja'yuj ja Dyosi, ti yal yab' ja Moisesi:
—Paya jan ja Josue, ja ye'n jun tsatsal winik sok wani sk'u'anona; I'aj och b'a sti' sat ja pagre Eleazar sok b'a sti' sat ja kristyano jumasa, b'a sti' sat spetsanile a' kajan wa k'ab' b'a s'olomi, b'a jach' oj ja wa'kan yi ja wa wip a wi'oj ja we'n sok ye'n oj ja wa'kan niwan ja ya'tel yuj ja kristyano jumasa. Ke'n oj ka sna' ja Eleazar jasun oj yal yab' yuj ja ye'n oj och niwan ya'tel yuj ja soldado jumasa israelenio. Ala yabye ja israelenio jumasa a sk'u'uke spetsanil ja jas oj yal ja Josueji.
22-23Jaxa Moisesi, jach'ni sk'u'lan spetsanil ja jastal yala ja Dyosi.
Currently Selected:
Numeros 27: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
