Numeros 24
24
1Yuj ja wanxa sna'a ja Balaam jasun wa sk'ana ja Dyosi, mixa jas sk'u'lan b'a oj sje' sb'aj yi'i. Kechanxta ti kan k'elwanuk b'a wits. 2Yajni ch'ak yil spetsanil jastal ay ja snaje k'u'lub'al sok k'u'uts ja israelenio jumasa, ti och b'a sk'ujol ja yip ja Dyos ja ye'na, 3ja Balaami, och ts'eb'anuk:
—Balaam jb'i'il, ja yuninon ja Beor,
sok wax na'a lek ja jas wa sk'ana ja Dyosi.
—Maklayik ja jas oj kali—.
4—Wala k'umaniyon b'a sb'i'il ja Dyos
it jel ja yipi.
Ja ke'n wax na'a ja jas wa sk'ana ja ye'n,
yuj ja ti'ni ajyiyon b'a sti' sat ja ye'na.
5—Jel tsamal wa najex k'u'lub'al sok k'u'uts a
wi'ojex israelenio jumasa—
—Jel tsamal ja b'ayex
israelenio jumasa—
6—Lajanex sok jastal cholan ja xa'an jumasa;
ma jun yaljil nichim b'a sti' niwan ja'.
Lajanex sok nichim b'a ye'n sts'ununej ja Dyosi;
ma jastal te' jumasa b'a sti' sat ja'.
7—Ja we'n sok wa wintil jumasa
lajanex sok maka b'a tey sok lajan b'a ay yaleli.
Ja we'n mandaranum yuj jel tsatsa ja we'n yuj ja Agag,
b'a wa'na a'teli, jel niwan sok jel tsamal.
8—Israelenio, ye'n ya elanik ja Dyos b'a Egipto.
Sok ja yip ya elanik soki mix b'ob' k'u'axuk,
lajan sok ja yip ja wakax b'a yax k'uli.
Jaxa ya'n, waxa ch'aya sna'jel ja ma'tik mi lek waxa wila b'aj soki,
oj ja yajb'es sok wa pulte' jumasa
oj ja k'ok yi ja sb'akel jumasa.
9—Lajan sok jastal ja choj wax jijli'
ja yajni ch'akta tiro'anuki.
Jachuk ja we'n israelenio.
—Mi ma'x b'ob' jas
yala wabyex—.
Ja ma lek ja jas oj sk'u'luk a wi'i,
lekni wax ek' yuj ja.
Jaxa ma' wa sk'u'lan a wi b'a mi leki,
jelni wokol wax ek' yuj ja—.
10Yajni yab' ja Balac ja jastal iti, jel tajki, smuts'u ja sk'ab'i tsats lek spak'tsun yi ja jun sk'ab'i, ti yala yab' ja Balaami:
—Jeka a payjel, b'a oj jak a k'u'lyi b'a mi lekuk ja ma' mi lek wax yilawoni, b'a'ya b'a yox majkil lek ja jas wa'na sk'u'lajel yi'i. 11—Ja ya'n ka'xa b'a wa naj. Kaloj a wab' oj ka k'e'an riko'il, yuj ja mi sk'ana ja Dyosi; —ja'yuj mi jas oj ka'wi—
12Ti yala ja Balaami:
—Ja ke'n kala ni yabye ja wa jekab'anum jumasa'a, 13a'nimax ya' ki ja snaj it b'ut'el k'anal tak'in sok sakal tak'in, mini oj b'ob' jk'ok yi ja jas wax yala ja Dyosa. —Kechan oj b'ob' kale, ja jas wax yal kab' ja ye'n. 14Lek ay ojxa wajkon, kechan ojxa ka a na'kan jasunk'a oj sk'u'luke yi ja kristyano jumasa a wi'oj israelenio jumasa ja tsa'ani. 15Ja ke'n Balaam jb'i'il, ja yuninon ja Beor, sok ja jts'eb'oj ja iti:
—Jmaklanta lek
stojolil ja lo'il iti;
16merani'a, jmaklanta
ja yab'al ja Dyosi.
Ja jas wax na'a
ye'n wax ya'ki ja Dyos b'a nalan cha'ani,
ja jas wax jak jk'ujoli ye'n ya'ki
ja Dyos it jel ja yipi.
17—Ja jas sje'a ki ja Dyosi, mitox ek'i;
ti'to jakum b'a sti jsatik.
Oj manxuk jun smandaranum ja israelenio,
oj lijpuk jastal jun k'anal.
Oj sch'ay sna'jel ja swinkil ja Moabi;
oj sch'ay sna'jel ja ma'tik
ti sk'u'lunej ja snaje b'a witsi.
18Oj yi' kan ja niwan chonab' Edomi
oj sch'ay sna'jel spetsanil ja ma'tik mi lek wax yilawoni.
19—B'a yojol ja smoj ja Jacobi
ti oj el june ja ma oj sb'ajuki
Ye'n oj sch'ay sna'jel ja janek'
ojto kan b'a yoj chonab' jumasa.
20Yajni ch'ak yal ja jastal it ja Balaami, ti sk'ela ja b'ay ja swinik ja Amaleki, ti och ts'eb'anuka:
—Ja Amaleki, jun niwan chonab' jel jitsan ajyi ja swinkili;
kechani ye'n jel jitsane'a,
kechan jelxa mojan ja k'ak'u oj ch'ay sna'jeli.
21Tsa'an ja Balaami, ti sk'ela ja b'ay ja quenita jumasa, ti och ts'eb'anuk jastal ita:
—Yintil jumasa Cain,
ja wa najexi, jel lektik
b'a waxa nolo b'ajexi lajan sok ja patak'i.
22Jaxa b'a stik'anali, ojni ch'ak spetsanila
ye'n oj ya'wex b'a yib' sk'ab'e ja swinkil ja Asiria—.
23B'a oj ch'ak yaljel ja Balaami, ti cho ts'eb'ani jastal ita:
—Jel ajujla sb'aj ja ma'tik sak'anto
ja yajni oj sk'u'l spetsanil ja it ja Dyosi.
24Oj jak spetsanil ja barco jumasa b'a Chipre
oj jak sch'ak ja chonab' jumasa
b'a Asiria sok b'a Eberi—
25Tsa'an ti'xa kumxi b'a snaj ja Balaami, cho jach'ni ja Balaki kumxi b'a niwan schonab'il.
Currently Selected:
Numeros 24: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
