Numeros 23
23
Ja Balaami, jel lek sta'a ti' ja israelenio
1Ja'yuj, ti alji yab' ja Balac yuj ja Balaami: —Tojb'es juke altar ja ili, b'a ti oj ka'yi tiw ja smajtan ja Dyosi, juke wakax, sok juke waw chej—.
2Jach'ni sk'u'lan ja Balac ja jastal alji yab' yuj ja Balaami. Tsa'an schawanil smilawe ja wakax sok ja waw chej jumasa, b'a jujune altar ti ya'we kan jun wakax sok jun waw chej. 3Ja'yuj ja Balaami, ti yal yab' ja Balaki: —Ti la kan il ja we'ni, jaxa ke'n t'ilan oj majla oj jakuk ja Dyos oj jak yal kab' jasunk'a oj jk'u'luki.
Ti spila sb'aj ja Balaami, ti waj b'a jun cha'anil wits b'a ch'ab'an lek. 4Yajni ti'xa ay k'ot tiwi, ti' sje'a sb'aj ja Dyosi. Jaxa Balaami, ti yal yab'a:
—Ka'oj k'u'lajuk juke altar, b'a jujune altar jchapunej jun wakax sok jun waw chej sb'a wa majtani.
5Jaxa Dyosi, ti yal yab' ja Balaami:
—Kumxan och ja b'ay ja Balaki, cho ala yab' pilan majke ja jas kaloj a wab'i.
6Ja Balaami, ti kumxi och ja b'ay ja altar jumasa, ti sta'a tiw ja Balaki, ti smoj sb'aj sok spetsanil ja ma'tik ay ya'tel b'a Moabi. 7Ti och ts'eb'anuk tiw ja Balaami:
—Balac, mandaranum b'a Moab,
ti a yi'ajon jan b'a wits Arabia,
b'a oj k'u'lyi'e b'a mi sb'ejuk ja israelenio jumasa
b'a oj cho jch'ay sna'jele.
8—Ja ke'n mi ja stuk oj b'ob' jk'u'luk
sok ja jastal yaloj kab' ja Dyosi:
—Mok a k'u'lyi b'a mi sb'ejuk ja kuntikili
mok cho a ch'ay sna' jele—.
9—Man b'a scha'anil ja wits jumasa
wax kila ja kuntikil tsa'ub'ali.
Merani'a, ti' man b'a cha'an jumasa
wax kila ja kuntikil jumasa jaw wa sk'u'anone'i.
10—Ja israelenio jumasa jel lek wa sje'a sb'aje.
Mi ma' wax b'ob' sk'u'luk ja jastal ja ye'nle'i.
—Ja israelenio jumasa jel jun k'ujole—.
—B'ob'ta oj sna' ja ye'n ja jastal ja ye'nle'i.
11Yajni yab' ja jastal it ja Balaki, ti stajb'a ja Balaami:
—¿Jas wa'na b'a'a? —Yuj ja ki'aja jani yuj b'a oj ja k'u'lyi b'a mi sb'ejuk ja ma'tik mi lek wax kila jb'aj soki, toj spakaxil wana sk'u'lajel tak—.
Ti yala ja Balaami:
12Ja ke'n kechan wax b'ob' kal ja jas wax yal kab' ja Dyosi.
Ja schab'il slekil jas oj k'u'lajuk yi' ja Balaami
13Ja'yuj ti yala ja Balaki:
—La' jmok, oj ki'a och b'a pilan lu'um. Jaxa ta lek oj ja tsatsal k'ujoluk a b'aj oj ja k'u'lyi b'a mi sb'ejuk ja kristyano jumasa ja yajnixa wila jel t'usane'i, —xchi ja Balaki.
14Ja Balaki, ti yi'aj och ja Balaam b'a wits Sofim, yuj jun cha'anil wits sb'i'il pisga. Ti tojb'el yuj tiw juke altar, b'a jujune altar smilunej jun wakax sok jun waw chej. 15Ti alji yab' ja Balac yuj ja Balaami: —Ti'xa majlayon il ja b'a'y ja wa waltar jumasa, jaxa ke'n oj waj k'um jb'aj sok ja Dyosi.
16Jaxa Dyosi, sje'a sb'ajyi ja Balaami, ti yal yab'a: —Kumxan och ja b'ay ja Balaki, ala yab' ja jastal kaloj a wab' oj ja wal yab'i.
17Ti kumxi ja Balaam ja b'a'ye ja Balac sok ja ma'tik niwak ya'tel b'a Moabi, ti'ni aye sok ja altar jumasa'a, jaxa Balaki ti och sjob' yi'a:
—¿Jasunk'a yala wab' ja Dyosi?
18Jaxa Balaami ti och ts'eb'anuka:
—Balac yunin ja Sipor,
—k'e'an makla lek ja jas oj kali—.
19—Ja Dyosi, mi lajanuk sok ja ke'ntiki—.
Ja ye'n mi sle'a ab'al
mi stukb'es sb'aj.
Ja Dyosi, Wa sk'u'lan meran ja jas wax yala.
20—Ja Dyosi, yal kab'
oj k'u'lyi b'a lek ja yuntikili.
Ja ye'n jach' yala,
ja ke'n mi oj b'ob' kal mi oj jk'u'luk.
21—Ja Dyosi, ye'n mandaranum yuj ja israelenio,
ja ye'n spetsanil k'ak'u tey sok ja yuntikili.
Ja Dyosi, mi sk'ana b'a mi sb'ejuki
sok mi sk'ana oj ya yi wokol.
22—Ja ye'n jel ja yip
jastal ja wakax b'a yaxk'uli,
ja Dyosi, ye'n ya el b'a yib' k'ab'al
ay ajyi ja yuntikil b'a Egipto.
23—B'a spetsanil ja ye'nle'i mey brujo
b'a oj yixtala'uk ja yuntikil ja Dyosi.
—K'elawilex spetsanil jel lek
ja jas k'u'lan ja Dyos yuj ja ye'nle'i.
24—Lajan sok jastal jun nole choj,
b'a chapanxta b'a oj syam ja swa'eli.
Ja israelenio mix jijliye
man wa sk'ana oj yil'e yuj mixa sak'anuk ja ma'tik mi lek wax yila sb'aje soki.
25Ja Balaki, ti yala yab' ja Balaami:
—Yuj k'a mi oj b'ob' a k'u'lyi b'a mi sb'ejuk ja kristyano jumasa jawi, mok cho a wi' lek ja we'n, ja lek oj ek' yujile'i.
26Ti yala ja Balaami:
—Kala ta a wab'i, ja ke'n mi oj b'ob' jk'ok ja jas wax yala ja Dyosi.
Ja yoxil majke lek wa'n sk'u'lajel ja Balaami
27Ja Balaki, cho yala pilan majke:
—La'. Oj cho ki'a och b'a tuk wits. Jaxa ta lek ojxa sk'an ja Dyos oj ja k'u'lyi b'a mi sb'ejuk ja israelenio jumasa.
28Jaxa Balaami, ti i'ji yuj ja Balac b'a jun cha'anil wits sb'i'il Peor. Man tiw wax ch'ak b'ob' ilxuk spetsanil ja takin lu'um k'inali. 29Ja Balaami, ti yala yab' ja Balaki:
—Tojb'es juke altar b'a ti oj tsikyi tiw ja Dyos juke wakax sok juke waw chej.
30Yajni ch'ak tojb'uk yuj ja altar jumasa ja Balaki, jaxa Balaami, ti'xa ya'yi ja smajtan ja Dyosi, jun wakax sok jun chej ya'yi b'a jujune altar.
Currently Selected:
Numeros 23: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
