Numeros 22
22
Ja jas sk'u'lane ja Balak sok ja Balaami
1Ja israelenio jumasa wa'neni b'ejyela, ti stojb'es ja snaje it k'u'lub'al sok k'u'uts b'a loman yaman Moab, tey b'a stojol wax jak ja k'ak'u yuj ja niwan ja' Jordan b'a sti' chonab' Jerico. 2-4Ja Balac yunin ja Sipori, ye'n mandaranum b'a ay Moab.
Yajni yab' ja Balac spetsanil ja jas k'u'laji yi'e ja amorreo jumasa yuj ja israelenio, ja ye'n sok spetsanil ja kristyano jumasa sb'a Moabi jel och ja sxiwele'i, b'a miyuka ja israelenio jumasa jel jitsane. Ja'yuj ja kristyano jumasa sb'a Moabi sjekawe spayjel ja ma'tik niwan ya'tel yuj ja swinkil Madiani, ti yalawe ya b'a: —Ja israelenio jumasa oj ch'ak yujile spetsanil ja jas jb'ajtikoni, jach' oj sch'ak e' jastal wa sch'aka el ja ak b'a wits ja wakax jumasa.
5Ja k'ak'u jawi, ti kulane b'a Petor ja Balaam yunin ja Beor sok ja yuntikili, jun chonab' tey sok lajan ja niwan ja' Eufratesi. Ja Balac sjeka ja ma'tik ay yuj ya'tel b'a schonab'il b'a oj waj yal yab' jastal it ja Balaami:
—Jitsan kristyano jumasa spaka ajnel b'a Egipto, ti stojb'es ja snaje it k'u'lub'al sok k'u'uts b'a mojan ayon ja ke'n sb'ut'uweta ele, 6sok jel a'aye ja ye'nle yuj ja ke'ntikoni. ¿Oj ma b'ob' jakan oj jaka k'u'lyi'e b'a mi sb'ejuk? Ja ke'n wax na'a ta ay k'a ma' waxa ta'a ti' lek jelni lek wax ek' yujile'a, cho jach'ni ta ay k'a ma' mi sb'ejuk wax ta'a ti'i mini lek wax ek' yujile'a. Ts'akataluka'a, la k'u'lan yi b'a mi sb'ejuk ja israelenio jumasa. Ja jachuki, b'ob'ta oj b'ob' kil sk'ujol b'a oj jnutse' el ja b'a jlu'umi—.
7Jaxa ma'tik ay ya'tel b'a Moab sok b'a Madiani, waj yal'e yab' ja Balaami. Yi'aje ochyi tak'in yuj ja b'a oj sk'u'lyi b'a mi sb'ejuk ja israelenio jumasa. 8Ti alji yabye yuj ja Balaami: —Ti la kanyex il ja ya'n a'kwali. Oj kala wabyex jechel ja jas wa sk'ana oj sk'u'luk ja Dyosi—.
Jach'ni sk'u'lane'a. 9Ja Dyos ja a'kwal jawi, sje'a sb'aj yi ja Balaami, ti job'ji yi'a:
—¿Machunk'a winik jumasa jaw tey a moki?
10Ti yala ja Balaami:
Ti jakele b'a Moab, ja' sjekunej jan ja mandaranum Balac. 11Ja mandaranumi, ti sjeka jan il b'a oj jak yal'e' kab' oj b'i waj jk'u'l yi' b'a mi sb'ejuk jun k'ole kristyano jumasa ma' ti elye jan b'a Egipto. Ja ye'nle'i, ti sk'u'lan ja snaje it k'u'lub'al sok k'u'uts b'a mojan b'a'y ja chonab' Moab, ja mandaranumi, wa sk'ana oj snuts el ja tiwi.
12Jaxa Dyosi, yala yab' ja Balaami:
—Mi lom la waj soke ja winike jumasa jawi, sok mi lomxa k'u'lan yi b'a mi sb'ejuk ja kristyano jumasa jawi, yuj ke'n kalunej lek oj ek' yujile b'a spetsanil.
13Yajni k'e' ja Balaam ja pilan k'ak'u, ti yala yab' ja winike jumasa ja jas alji yab' yuj ja Dyosi: —Kumxanik b'a wa chonab'ilex, mi sk'ana ja Dyos ja oj wajkon a mokexi.
14Ja ma'tik niwan ya'tel b'a Moabi, kumxiye waj yal'e yab' ja Balac yuj ja mi sk'ana oj jak soke ja Balaami.
15Ja'yuj ja Balac, cho sjeka a'ay ja ma'tik niwak ya'tel b'a Moabi. 16Yajni k'otye ja b'ay ja Balaami, ti yalwe yab' ja jas wa sk'ana ja mandaranumi: —Ts'akataluka'a, la' jmoktikon; —Mok a wal mi oj jakan. 17Ta oj k'a a k'u'lyi b'a mi sb'ejuk ja kristyano jumasa jawi, chikan janek' waxa k'ana wa ts'akoli, ojni ka'wi'a, sok jel niwan oj ka iljan—.
18Jaxa Balaami, ti yala'a:
—A'nima sk'apaki ja snaj ja Balac yuj ja b'ut'el k'anal tak'in sok sakal tak'ini, kechan mini oj k'u'luk ja jas wax yal kab' oj k'u'luka. —Mi oj b'ob' jk'ok yi ja jas wax yala ja ma' Dyos yuj ja israelenio jumasa—. 19Kananik il ja ya'n a'kwali, oj majlatik jasunk'a wa sk'ana oj k'u'luk ja Dyosi.
20Ja Dyos ja a'kwal jawi, yala yab' ja Balaami: —Yuj k'a t'ilan wa sk'ana oj wajan soke ja winik jumasa jawi, ka'ax; yuxta kechan ja oj ja k'u'luk ja jas oj kala wab'i.
21Sajto lek k'e' ja Balaam ja pilan k'ak'u, schapa ja sburra waj sok ja winike jumasa ma'tik niwan ya'tel b'a Moabi. 22Jaxa Dyosi, jel tajki sok ja Balaam yuj ja lom waj sok ja winike jumasa jawi. Ja'yuj jun yanjel ja Dyosi, ti waj tek'an b'a b'ej b'a mi oj ya ek'uk.
Ja Balaami, k'e'el och ja sburra, ti wajum sok ja chawane ma wax koltaji yuji. 23Wajto yil ja burra ti tek'an jun yanjel ja Dyos b'a b'eji, chapanxta ay b'a oj tiro'anuk sok ja Balaami, ti yaman yuj jun punyal, jaxa sburra wa sle'a jastal oj sjoyb'a ja b'a'y ja anjel jawi, ja'yuj sjipa kan ja b'eji. Sch'ika sb'aj yoj k'ul, jaxa Balaami me' stalnan sya'ujlal och smak'e b'a oj jak ya sta' ja b'eji.
24Jaxa yanjel ja Dyosi, ti tek'an ek' b'a jun lats'an b'ej, b'a snalan chab' ts'akab' ton smakb'al yaljil ts'usub'. 25Jaxa burra yajni yila ja yanjel ja Dyosi, ti waj k'achan sb'aj sts'e'el jun ton ti st'ena kanyi ja yok ja Balaami, jaxa Balaami cho och smak' ja sburra.
26Jaxa anjeli, ti'xa jak sta'a, kechan, ti b'a jun lats'an, sb'ajni b'a mi ma oj b'ob' sut sb'aj. 27Jaxa burra, yajni yila ja yanjel ja Dyosi, ti ko' petana mixani jun xete b'ob' ya'yi'a. Jaxa Balaami jel tajki, och smak' sok te' ja sburra. 28Ja juts'in jaw ja Dyosi, ya k'umanuk ja burra, b'a oj yal yab' ja Balaami:
—¿Jasunk'a jk'u'lunej a wi' b'a? ¿Jasyuj ja ox majkexa jel waxa mak'awoni?
Ti yala ja Balaami:
29—Jasyuj ja lom waxa wilaki jlo'il b'a, ayukxta ki'oj jun punyal oj ja wil ta mi ti wax milawakan ili.
30Ti och yal ja burra:
—We'nani a burra'ona. —Spetsanil k'ak'u wax ki'aj ja ek' b'a waxa k'ana oj wajani, sok mini b'a wax k'u'lan a wi b'a mi sb'ejuk ja jastal waxa k'u'lanki ja ke'n ja juts'in iti.
—Merani ja jas waxa wala'a —xchi ja Balaami.
31Ja juts'in jawi, yala ja Dyos oj yil ja anjel ja Balaami, waj yile ti tek'an b'a b'ej chapan ay sok spunyal b'a oj tiro'anuk. Jaxa Balaami, ti ko mek'ana man sta'a ja lu'um ja spatani, 32ti alji yab' yuj ja yanjel ja Dyosi:
—¿Jasyuj ja lom a mak'a ox majke wa burra b'a? Ke'n jmaka wa b'eji, yuj mi lek wax kab' ja oj wajan b'a Moabi. 33Mokto ja'uk wa burra yilawoni, mokxta k'ot tek'an ox majke, jmilawata'el ya'na, jaxa ye'n ojni kan sak'ana.
34Ti yala ja Balaami:
—Kajwal, mok wa jtup ja jas wa'non sk'u'lajeli. Ja ke'n mini t'un wax na'a ta oj jak a tim'on b'eja. Ta yuj k'a we'n mixa k'ana oj wajkon b'a Moabi, man ya'n oj kumxukon b'aj naj.
35Jaxa yanjel ja Dyosi, ti yala'a:
—Ka'ax soke, yuxta kechan ja oj ja wal ja jas oj kala wab'i.
Jachuk ti waj ja Balaam sok ja ma'tik niwan ja ya'tel sjekunej ja Balac. 36Yajni yab' ja Balak wa'n mojxel och ja Balaami, ti'xa el ja ye'na, waj sta' b'a jun chonab' b'a k'e'el k'inal, b'a sts'ajk'an sok ja pilan chonab'i. 37Jaxa Balac ti yal yab' tiw ja Balaami:
—¿Jasyuj ja mi jakya ja yajni jpayawa b'a? ¿Yuj waxa wala yuj mi oj ka'wi ja jas jk'apa a wi'i?
38Ti yala ja Balaami:
—Ja ya'n it b'ayona, yuxta kechan ja oj kal ja jas oj yal kab' ja Dyosi.
39Ja Balaam sok ja Balac ti waj b'a Quiriat-husot. 40Ti ch'ak sje' tiw ja Balac ja swakax sok ja schej b'a oj ya'yi b'a smajtan ja Dyosi, sk'u'lan jun k'in yuj ja Balaam sok ja ya'tijum jumasa.
41Jaxa pilan k'ak'u ti wajye ja Balac sok ja Balaam b'a Bamot-baal. Man tiwi wax b'ob' ilxuk ja b'a'y ja snaje k'u'lub'al sok k'u'uts ja israelenio jumasa.
Currently Selected:
Numeros 22: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
