Numeros 21
21
Ja israelenio yi'aje kan ja chonab' Horma cho sch'akawe sna'jel
1Ja b'a takin lu'um k'inal b'a ko'el k'inali, ajyi jun mandaranum cananeo, ti ajyi b'a chonab' Arad. Yajni yab' ti jakume ja israelenio b'a sb'ejlal Atarimi, waj tiro'anuk sok, cho ay ma' slutu.
2Jaxa israelenio jumasa, sk'umane ja Dyosi, cho yalawe jach' oj sk'u'luke jastal iti: —Ta oj k'a a koltanotikon sch'ayjel sna'jel ja mandaranum sok ja swinik jumasa, jach'ni ja ke'ntikoni, oj ch'ak jomtikon spetsanil ja schonab'ile'i, —xchiye.
3Jaxa Dyosi, lekni yab' ja jas yalawe ja israelenio jumasa'a, ja'yuj skolta, sok skolta ja israelenio b'a yil k'ujolan ja ma' mi lek wax yil sb'aje soki. Jachuk b'ob' schay e' sna'jel ja kristyano jumasa ajyi b'a Canaani, cho ch'ak sjom e' yi spetsanil ja schonab'ile'i, ja'yuj, ya'we sb'i'iluk ja lugar jawi, Horma.
Ja b'its'il chan b'ob'el sok tak'in bronce
4Ja israelenio jumasa, elye b'a yaxk'ul Hor ti wajye ja b'ay ja niwan paman ja' it jel ja yakili, kechan mi a'ji ek'uke ja yoj lu'um sb'a Edomi, ja'yuj ja kristyano jumasa axwiye b'a b'eji, 5mi sb'ejuk ja jastal sta'awe ti' ja Dyosi. Ti yalwe yab' ja Moisesi: —¿Jas lom wa elkotikon b'a Egipto b'a? ¿Wa elkotikon b'a kechan oj jak a mil'otikon kan b'a yoj wits tak? —Me'y jwa'eltikon, mey ja' oj ku'tikon, axwitikonta yab'jel ja wa'el iti, mixa ay yajb'al wax kab'tikon.
6Ja'yuj ja Dyosi, sjeka jitsan b'its'il chan b'a ay yi'oj beneno b'a oj k'uxjuke yuj. Ja ma wax k'uxji, wanix chama, jel jitsan ja ma'tik chami. 7Ja'yuj ti waj yalwe yab' ja Moisesi: —Jakta jk'ujoltikon mi lekuk ja lom mi sb'ejuk jta'atikon ti' ja Dyos sok ja we'n. —Wax k'anatikon a wi ts'akatal, ala yab' ja Dyos a ch'ak ya eluk ja b'its'il chan jumasa it tey ja b'aytikoni.
Jaxa Moisesi, sk'ana yi ja Dyos mok sna' ja jas yalawe ja israelenio jumasa, 8jaxa Dyosi, ti yala'a. —K'u'lan jun b'its'il chan sok tak'in bronce tix wa' k'e lokan b'a jun te'. Ay k'a ma wax k'uxji yuj ja b'its'il chan jumasa jawi, ala yabye a waj sk'el'e' ja chan it a k'u'lunej sok tak'in bronce, ojni tojb'uke'a.
9Jach'ni ek'a. Ja Moisesi, sk'u'lan jun b'its'il chan sok tak'in bronce ti ya k'e' lokan b'a jun te'. Ay k'a ma wax k'uxji yuj ja b'its'il chani, ja wax waj sk'el ja chan it k'u'lub'al sok tak'in bronce, wanix tojb'i ye'a.
Ja israelenio mi jijliye b'ejyel
10Ja israelenio jumasa, mi jijliye, wa'ne'ni b'ejyela, ti k'otye b'a jun chonab' sb'i'il Obot. 11Cho elye ja tiwi, ti wajye b'a Moab b'a stojol wax jak ja k'ak'u, ti ajyiye b'a jun lu'um sb'i'il Iie-abarim, tey b'a jun wits. 12Tsa'an, ti ajyiye b'a jun yal yok ja' sb'i'il Zered, 13cho elye ja tiwi, ti wajye b'a jun sti' ja niwan ja' Arnoni. Ja ja' jawi, ja wa spila ja chonab' Moab sok ja schonab'il ja amorreo jumasa, cho ti'ni ay b'a yoj witsa. 14Yuj ja jastal ja iti, ja b'a ju'un ts'ijb'anub'al yuj ja tiro'anel jumasa sb'a Dyosi, ay xet'an lo'il wax yala jastal iti:
—Wajtikon b'a Vaheb,
b'a slujmal ja Sufa,
sok b'a yok ja' jumasa b'a niwan ja' Arnon.
15Cho ektikon b'a yok ja' jumasa
it wax k'ot man b'a slujmal Ar
sok ja'ni ja it tey b'a sts'ajk'an sok ja Moabi—.
16Cho elye ja israelenio jumasa, b'a niwan ja' Arnoni, ti wajye b'a jun lu'um sb'i'il Poso. Ja b'a poso jawi, ja b'a it alji yab' ja Moises yuj ja Dyos a stsomo ja kristyano jumasa b'a ya yu' ja'i'. 17Ja k'ak'u jaw ja israelenio jumasa, jach' ts'eb'aniye jastal iti:
—A el ja' b'a poso—.
—Ja ke'ntikoni oj ts'eb'ojtatikon ja ts'eb'oj jumasa—.
18Ja poso jawi, ja stojb'es ja ma'tik niwak ya'teli,
jani sok ja b'ik'it ste'e sok ja snajb'ante'e'i—.
Yajni wajye b'a wits ja israelenio jumasa ti ek'ye b'a lugar sb'i'il Matana, 19B'a Nahaliel, b'a Bamot. 20Sok b'a loman yaman it tey b'a slujmal Moab. Tsa'an ti k'otye b'a sni' wits Pisga, ja tiwi wax ch'ak ilxuk spetsanil ja takin lu'um k'inali.
Ja israelenio jumasa yilawe sk'ujol ja mandaranum Sihoni
21Ja israelenio jumasa sjekawe aluman yab' ja Sihon smandaranum ja amorreo jumasa:
22—Ts'akataluka'a, a ekotikon b'a yoj wa lu'umi. Mi oj ochkotikon ja b'a ay sb'a'al a wuji, mini ja b'a tek'ul jumasa, mini b'a wa poso jumasa mi oj waj ku'tikon ja'. Ja'ni toj oj ki'tikon ja niwan b'eji man oj ek' jk'utstikon wa lu'um we'n.
23Jaxa mandaranumi, mini t'un skisa ja jas alji yab'a, stsomo ja soldado jumasa och tiro'anuk sok ja israelenio jumasa b'a wits mojan sok ja chonab' Jahas. 24-25Jaxa israelenio jumasa ye'n ilk'ujolaniye, ja'yuj yi'aje kan spetsanil ja chonab' jawi.
Jachuk ja israelenio jumasa ti'xa ch'ak kanuke b'a schonab'ile jumasa ajyi ja amorreo jumasa, ja sb'i'il ja chonab' jumasa jawi, Hesbon, spetsanil ja chonab' jumasa tey b'a niwan ja' Arnoni, sok b'a niwan ja' Jacobi. Ja b'a niwan ja' jawi ti wa stuluyi ja schonab'il ja amonita jumasa, kechan, talnanub'al ay lek yuj ja soldado jumasa. 26Ja mandaranum Sihoni, ti kulan ajyi b'a chonab' Hesbon, jel tiro'ani sok ja ma ti wa'ne a'tel ajyi b'a Moabi, ch'ak sjapyi spetsanil ja slu'umi, man yi'aj kan ja niwan ja' Arnoni. 27Yujni jach' wax yala ja ts'eb'oj ja:
—A'wik ajk'achb'uk ja chonab' Hesbon,
ja niwan schonab'il ja mandaranum Sihoni—.
28—Man b'a Hesbon ajli jun k'ak'
stsika spetsanil ja lu'um jumasa;
ti stuluyi b'a Ar, b'a schonab'il Moab,
man b'a slujmal Arnon.
29—Jel ajujla a b'aj Moab—.
—Jel wokol oj ek' a wuj,
schonab'il ja dyos Quemos—
Ja dyos jaw ja ya' yi' b'a preso ja mandaranum
Sihon wa wuntikil keremtiki
cho jach'ni ja wa wuntikil ak'ixuki.
30—Spetsanil ja chonab' Hesbon, ch'ak;
ja Dibon sok ja Nofah,
spetsanil ch'ak jom kani.
—Ja k'ak'i k'ot man Medeba—
31Jachuk b'ob' yi'e kan ja israelenio ja slu'ume ajyi ja amorreo jumasa.
Ja israelenio yilawe sk'ujol ja mandaranum b'a Basani
32Ja Moisesi, sjeka k'eluman ja chonab' Jazer. Jaxa israelenio jumasa yi'aje kan ja chonab' jaw sok spetsanil ja b'a naka mojan yi' oj sb'aji, spetsanil ja ma'tik ti ajyi ye tiwi ch'ak snutse' ele. 33Tsa'an cho ochye ja b'a slu'um ja Basan, jaxa mandaranum Og, ti waj sok spetsanil ja soldado jumasa b'a chonab' Edrei b'a waj tiro'anuk sok ja ye'nle'i.
34Ja'yuj ja Dyosi, ti yal yab' ja Moisesi:
—Mi lom la xiw yuj ja Og, ke'n oj koltaya b'a oj ja wil k'ujoluk ja ye'n sok ja soldado jumasa yi'oji. Kechan wax k'ana jach' oj ja k'u'lyi, ja jastal a k'u'lanyi ja Sihon smandaranum ja amorreo jumasa.
35Jach' smilawe jastal it ja mandaranum Og ja israelenio jumasa, sok ja soldado jumasa, sok spetsanil ja kristyano jumasa.
Currently Selected:
Numeros 21: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
