Numeros 19
19
Ja jastal sak lek oj ajyuki
1Ja Dyosi, ti yal yabye ja Moises sok ja Aaroni:
2—Alawik yabye ja israelenio jumasa yuj ke'n jach' wa'non yaljel jastal iti: I'ajik jan jun chakal nan wakax b'a mini jun syajb'al ay, sok b'a mitox a'tiji b'a alaj. 3Ja we'nlexi, i'ajik och yi ja pagre Eleazar ja nan wakax jawi, b'a ye'nxa oj yi'e najat yuj ja na'its jumasa tojb'el sok k'u'utsi, ti'xa milawex tiw b'a sti' sat ja ye'n. 4Jaxa pagre oj sla' ja yal sk'ab' b'a schik'el ja wakax jawi, juk majke oj stsijuk yi ja na'its tsa'ub'al sb'a Dyosi.
5—Jaxa sb'ak'tel ja wakaxi, ti oj ch'ak tsikxuk b'a sti' sat ja pagre Eleazari: Jach'ni ja sts'ujmili, ja sb'ak'teli, ja schik'el sok ja sk'oyi. 6Jaxa pagre oj yi' jan k'ab' segro, hisopo sok chakal k'u'uts, ti oj ch'ak ya och b'a yoj k'ak' b'a wa'n tsikel ja sb'ak'tel ja nan wakaxi.
7-8—Ja pagre yuj ja sta'ani kistali, ja'yuj t'ilan oj schuk' lek ja jastik sb'aji, oj noxjuk lek, sok mi oj b'ob' ochuk ja b'a'y ja na'its jumasa, man och k'ak'u oj kumxuk, cho jach'ni oj sk'u'luk ja winik ma oj stsik ja wakaxi. 9Tsa'an ja ma mi ti ajyi b'a a'tel jawi, oj b'ob' stsom ja sta'anil ja wakaxi, ti oj waj ya' b'a mi kistaluk b'a najat yuj ja b'ay ja snaje tojb'el sok k'u'utsi. Jaxa ta'an jawi, ja oj ya'we och ya'lel ja kristyano jumasa b'a oj sak' sb'aje sok, b'a oj eluk ja smule'i. 10Jach'ni ja winik ma' ya eluk ja sta'anil ja wakaxi, jel t'ilan oj schuk' lek ja jastik sb'aji, sok mi oj b'ob' ochuk ja b'a'y ja na'itsaltik man och k'ak'u oj b'ob' kumxuk b'a snaji.
—Ja ab'al iti, jel t'ilan oj sk'u'uke ja israelenio sok ja ma'tik tuk chonab' jakel tey a mokexi.
Ja jastal oj ajyuk ochel b'a sti' sat ja Dyosi
11-22Ay k'a ma ti cham kan b'a yoj snaj, jach' oj b'ob' k'u'laxuk jastal iti: B'a yojol juke k'ak'u mi oj b'ob' ochuke b'a sti' sat ja Dyos ja ma oj sk'u'l jastal iti:
—Ja ma oj syam ja sb'ak'tel ja cham winiki.
—JA ma tey sok b'a yoj na'its ja yajni wa'nxa elel ja yaltsili.
—Ja ma'tik tey sok b'a yoj na'its jawi.
—Cho jach'ni ja oxom jumasa b'a mi makanuk sti'i, sok ja b'a mi lek makanuki, ja b'a na'its jawi, mixani lekuka.
—Cho mini oj b'ob' ochuke b'a sti' sat ja Dyos ja ma'tik oj sk'u'l jastal iti:
—Ja ma oj syam ske'jnal cham winik.
—Ja ma oj syam sb'akel cham winik.
—Ja ma oj syam yi sb'ak'tel jun ma ti cham b'a wits milub'al ma lom chami.
—B'a oj b'ob' ochuke b'a sti' sat ja Dyos ja kristyano jumasa iti, t'ilan oj schuk' e lek ja jastik sb'aje'i, b'a yoxil sok b'a sjukili, kechan ja' sok ja ya'lel ja sta'anil ja wakax it tsikxi. Ta yuj k'a mi schuk'u sb'aje ja chab' k'ak'u jawi, mini oj b'ob' ochuke b'a sti' sat ja Dyosi.
—Jaxa ma lek ay mi ja syamuneji, oj yi' och ja ya'lel sta'anil ja chakal wakaxi. Oj yi' t'usan sk'ab' hisopo, oj ya po'xuk sok ja ya'lel ta'ani, ti oj stsijuk yi ja na'its sok ja ye'tal jumasa, cho jach'ni ja ma syamunej yi sb'ak'tel cham winiki, ma sb'akel, ma skejnali.
—Yajnix ek' ja juke k'ak'u jawi, spetsanil ja jaw jumasa t'ilan oj schuk' e lek ja jastik sb'aje'i, oj noxjuke lek, ja a'kwal jawi ojxa b'ob' ochuke ja b'a sti' sat ja Dyosi.
—Ay k'a ma syama jun cham winik mitox tsijuji sb'aj ja ya'lel sta'anil ja chakal wakaxi, mi oj b'ob' ochuk ja b'a sti' sat ja Dyosi. Cho mi oj b'ob' ajyuke sok ja israelenio jumasa, yuj ja ojni cho sjom k'ot ja b'a snaj ja Dyosi.
—Ay k'a ma wax och mojan sok ja na'its tsa'ub'al sb'a Dyosi, cho mi k'a sak'unejuk lek sb'aji, ojni cho ya'we sta kux ja na'its b'a wax ajyi ja tsomjela, sok mixani oj b'ob' ajyuke sok ja israelenio jumasa'a.
—Ay k'a ma waj syam ja ma ti ajyi sok ja cham winiki, mi oj b'ob' ochuk ja b'a sti' sat ja Dyos man yoj a'kwal.
—Spetsanil ja jas oj syam ja ma ti ajyi sok ja cham winiki, wa sjomo sb'aj man yoj a'kwal.
—Ja ma wa stsijun ek' ja ya'al ta'ani, yuj k'a yuj syama, ojni cho schuk' lek ja jastik sb'aj ja, sok mi oj b'ob' och b'a sti' sat ja Dyos man yoj a'kwal.
—Ja iti, yujni jach' oj ajyuk b'a spetsanil k'ak'u'a.
Currently Selected:
Numeros 19: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
