Numeros 18
18
Ja ya'tel ja pagre jumasa sok ja yintil jumasa ja Levi
1Ja Dyosi, yal yab' ja Aaroni:
—Ja yajni oj sta' smul ja israelenio b'a snajtsil tsomjeli, ja we'n sok wa wintil jumasa, sok ja tuk yintil jumasa ja Levi, we'n oj ja k'an'ex yi ja Dyos mok a'ji stup'e ja smule'i. Kechan ta yuj k'a we'n wa'nex a'tel ja jastal wax a'tiji ja pagre jumasa, yuj k'a we'n ko'yex mulal, mi ma oj b'ob' sk'an yi ja Dyos yuj ja we'nlexi, we'nani oj ja k'an'ex yi ja Dyos mok ya'a tup wa mulexi.
2-7—Yuj ja ya'teltajel b'a snajtsil tsomjel b'a'y ja strato ja Dyosi, ja we'n sok wa wintil jumasa, oj b'ob' a k'an'ex b'a oj skoltayex ja wa moj alijelex it ti aye sok ja k'ole sb'a Levi. Ja ye'nle'i, ke'n jtsa'awe b'a yojol ja k'ole jumasa yuj ja israelenio, jaxa ya'n we'n wax ka' b'a wa k'ab'ex b'a oj skoltayex sok wa wa'telex b'a snajtsil tsomjeli. Ja ye'nle'i, oj b'ob' skoltayex lek, a'nima mi oj b'ob' syam'e ja jastik tsa'ub'al b'a snajtsil tsomjel sok b'a altari. Kechan ta syamawe k'a ojni chamuke'a, man we'nlex.
—Kechan we'nlex ja ma'tik pagre ayex oj b'ob' a'tijananik ja b'a altar sok ja b'a tsa'ub'al leki. Kechan we'n oj ja talnayex ja altar sok ja jastik jumasa tsa'ub'al tey b'a snajtsil tsomjeli. Ja tuk yintil jumasa ja Levi oj b'ob' ajyuk a mokex, oj cho b'ob' skoltayex sok spetsanil ja jas waxa k'u'lanexi. Mok a k'an ay ma tuk oj ochuke mojan a mokex. K'u'anik ja jas wax kala, b'a jach' mixa oj tajkukon sok ja israelenio jumasa, sok mixani oj ka'yi'e wokola. Ta ay k'a ma wa sk'u'lan jun a'tel yuj ya'tel jun pagre mik'a pagre'uk ja ye'n ojni milxuk ela.
Ja majtanal sb'a pagre jumasa
8Mi kechanuka, ja Dyosi, yal yab' ja Aaroni:
—Ja wa wa'tel yuj ja we'n pagre'a, ja sb'a we'n oj ja wa'ki ja jmajtan jumasa wax ya'ki ja israelenio jumasa. Spetsanil ja majtanal jumasa jawi, we'n oj ka'wi sok ja wa wintil jumasa, yuj ja ti wala a'tijiyex jmoki. Ja ab'al iti, yujni jach' oj ajyuk spetsanil k'ak'u'a.
9—Ja majtanal jumasa it wax tsikxi, we'nani a b'ajex ja sat trigo'a, jach'ni ja it wax yi'aje jan ja israelenio b'a oj sk'an'e oj ch'ayi ja smule'i. 10A petsanilex ja janek' winik a moj a b'ajexi, oj b'ob' a wabyex ja majtanal jawi, kechan ti'ni b'a snajtsil tsomjela, yuj ja majtanal jawi, tsa'ub'al.
11—Ja we'n sok wa wintil jumasa winik ma ixuk, oj ka'wi'ex spetsanil ja majtanal jumasa jaw tsa'ub'al wax yi'aje jan ki ja israelenio jumasa, Oj b'ob' yab' ja ma' wa sk'u'lan spetsanil ja jas wax kala ja yajni oj jak ja b'a stij sati. Ja ab'al iti, yujni jach' oj ajyuk spetsanil k'ak'u'a.
12-14—Cho we'n oj ka'wi'ex ja sb'ajtanil sat tek'ul wax ya'weki ja israelenio jumasa b'a jujune jab'ili. Jach'ni, ja lekil aceite, a b'ajni we'nlexa, ja ya'lel ts'usub'i, sok ja trigo jumasa. Chikan mach'a oj b'ob' yab' ja ma' oj sk'u'uk spetsanil ja jas wax kala ja yajni oj jak sje' sb'aj ki'i.
15—Cho jach'ni ja sb'ajtanil yuntikil ja israelenio jumasa a b'ajni we'nlexa, sok ja sb'ajtanil yal schanste'i, jaxa sb'ajtanil yal untik sok ja sb'ajtanil yal chante b'a mi lek sk'uxjel ma stsikjel yi ja Dyosi. 16Ta yuj k'a ay ja jastal jawi, majlayik oj ts'ikwuk yuj jun ixaw manxel ja yal alats jawi. Ojxa b'ob' a'juk a wi'ex jo'e sat sakal tak'ina, ja yalal b'a jujune ja tak'in jawi juluche gramos, Ja'ni jastal wax makuni b'a snajtsil tsomjeli.
17-18—Ja chante b'a mi oj b'ob' tukb'esxuk sok pilan majtanali, ja nan wakaxi, ja chej sok ja nan chiva. Ja chante jumasa jawi, pilan oj ajyuk b'a jb'aj ke'na. Oj b'ob' a wi'kan we'n ja sni' sk'ujol sok ja sb'ak'tel stojol yechmali, jaxa schik'eli ti'xa pek'a b'a sjoyanal ja kaltari, tix cho a tsika tiw ja skojlelali. Jun majtanal b'a jel lek wax kab'i.
19—Spetsanil ja majtanal oj ya'we ki ja israelenio jumasa, a b'aj ni we'nlex sok wa wintil jumasa, a'nima ixuk ma winik. Ja ab'al iti, yujni spetsanil k'ak'u jach' oj ajyuka. Ke'n wax kala wab'i, yujni jach' oj k'u'luk a wi ja we'n sok wa wintil jumasa'a.
Ja majtanal sb'a yintil jumasa ja Levi
20-24Ja Dyosi, yal yab' ja Aaroni:
—Ja israelenio jumasa, spetsanil ja k'ole jumasa, ja' yi'aj b'a oj sdote'uke ja slu'ume'i. Jaxa yintil jumasa, ja Levi mi oj ka'yi'e mini xe'n lu'um, kechan ke'n oj sdote'ukone. Yajnix ya'we ki ja slajunil b'a jastik b'aje ja kristyano jumasa, spetsanil ja jawi, sb'ajni ye'nle ja yintil jumasa ja Levi, ja' sts'akole yuj ja ti wax a'tijiye b'a snajtsil tsomjeli. Yujni kechan ye'n oj b'ob' ochuke ja b'a snajtsil tsomjela. Ta yuj k'a wax cho ochye mojan sok ja israelenio jumasa yujni oj chamuke'a, yuj ja jastal jawi, yujni jun mulala, sok chamel ch'akel wax tupi.
—Ja ab'al iti, oj makunuk a wujilex sb'a spetsanil k'ak'u—.
25Mi kechanuka, ja Dyosi, cho yal yab' ja Moisesi:
26—Ala yabye ja yintil jumasa ja Levi, yajnix yi'aje ja slajunil ja jastik jumasa oj ya'we ki ja israelenio, cho jach'ni ja ye'nle'i, ya'we ki ja slajunil ja b'a janek' oj a'juk yi'e'i, 27jach'ni jastal wax ya'we ki ja israelenio jumasa, ja slajunil ja sat ja trigo sok ja slajunil ja ya'lel ts'usub'i. 28Ja majtanal jumasa jawi, ye'n wax ch'ak a'juk yi ja pagre Aaroni. 29Spetsanil ja janek' wax yi'aj kani, t'ilan oj ch'ak spil ja b'a lektiki, b'a ja oj ya'yi b'a smajtan ja Dyosi.
30-32—Yajni ya'weta ki ja b'a leki, jaxa janek' oj kanuki sb'ajxani ye'nle'a. Oj b'ob' yabye chikan b'a' wa sk'ana sok ja yuntikili. Ja jawi ja sts'akole yuj ja ti wax a'tijiye b'a snajtsil tsomjeli. Ala yabye a sk'u'uke ja jas wax kala, mok yixtala'uke lom ja jmajtan wax ya'awe ki ja israelenio jumasa. Ta yuj k'a mi oj sk'u'uke'i, ojni chamuke'a—.
Currently Selected:
Numeros 18: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
