Numeros 16
16
Ja jas mi lek sk'u'lan ja Core
1-2Ja Core, ja yintil ja Levi, smoj alijel sb'aj sok ja Quehati, ja stati sb'i'il Ishar. Ja Core ay oxe ma' lek wax yila sb'aj sok cho tey sok ja k'ole sb'a Rubeni: Ja Datan sok Abirami, ja' state ja Eliabi, jaxa Oni, ja stat ja Peleti. Mini june ja ye'nle sk'anawe ye'n niwan ya'tel oj ajyuk yujile ja Moisesi, ja'yuj stsomowe chab' syen sok chab' tajb'e lajune (250) ma'tik niwan ya'tel yuj ja israelenio jumasa, ye'n wax yalawe jas oj sk'u'luk ja kristyano jumasa, sok wanix kisjiye leka.
3Stsomo sb'aj sok ja smoj jumasa ja Core, waj yalwe yab' ja Moises sok ja Aaroni:
—Axwitikonta amokex yuj ja we'n niwan a wa'tel ayex kujtikoni— Ja Dyosi, ti'ni ay sok spetsanil ja kristyano jumasa, jpetsaniltik stsa'awotik b'a oj ka'teltatik. ¿Jasyuj ja kechan we'n waxa k'ana oj ch'aka k'u'lukex spetsanili b'a? —xchiye.
4Yajni yab' ja Moises ja jas wax yalawe'i, ti ko' mek'ana man sta'a ja lu'um ja spatani, 5-7ti yala yab' ja Core sok ja smoj jumasa:
—Ja we'nlex yintilex ja Levi, we'nlex ja axwiyonta a amokexi. La'ik sajto lek ja jecheli, i'ajik jan wa tsikub' pomexi, a'wik ochyi chakal k'ak' sok pom, ti'xa tsikawex b'a sti' sat ja Dyosi. Ye'n oj stsa' machunk'a wa sk'ana oj a'tijuk ja b'a snajtsil tsomjeli, ja ma oj tsa'juki kechani ye'n oj b'ob' sk'u'luke ja a'tela, —xchi ja Moisesi.
8Tsa'an ja Moisesi, ti yal yab' ja Core:
—Makla lek ja we'n sok spetsanil jumasa ja Levi it tey a moki. 9¿Jel ma ko'el waxa wabyex yuj ja ti' stsa'awex b'a yojol spetsanil ja israelenio jumasa b'a ti' oj ja wa'teltayex b'a snajtsil tsomjel b'a? 10Ja Dyosi, stsa'awex, b'a ti oj ajyanik mojan sok ja ye'n. ¿Ja sb'ej ja cho wa'nex sk'anjel oj ochanik pagre'il b'a? 11Ja jas wa'nex yaljeli, mi jas wax ko' sb'aj ja Aaroni, ye'n ja Dyos ja ma' mi lek wa'nex sta'jel ti'i.
12Ja Moisesi, ti spaya ja Datan sok ja Abirami, jaxa ye'nle'i, ti yalawe'a:
—Mi oj wajkotikon. 13-14Mini t'un lek ja jas a k'u'lan ki'tikon ja lom wa elkotikon ja b'a niwan chonab' Egipto ja tiwi, wax ta'atikon lek jas wax kab'tikon ajyi. Jaxa we'n a wala kab'tikon oj ja wi'otikon b'a jun chonab' b'a jel niwan ja slujmali, sok jel wax ajyi ja sb'a'ali, ja tiwi jex ajyi ja jwa'eltikoni. —B'a'ya, kechan a wi'ajotikon jan b'a oj jak ch'akotikon kan b'a yoj wits, b'a mi jas lek wax ta'a jas oj kab'tikon. ¿Jachuk wa'ntoxa k'ana oj k'u'uktikon ja jas waxa wala, sok oj noch a'tikon? ¿Yuj a ma waxa wala yuj mitox kilatikon k'inal b'a? —Mixax k'ana oj kiltikon wa sati, mini wa k'umali, mixax k'ana oj kab'tikon.
15Jaxa Moisesi, jel tajki, ja'yuj ti yala yab' ja Dyosi: —Dyos kuj, mok a wi' lek ja majtanal oj jak ya'we a wi'i. Ja ke'n mi jas mi lekuk wax k'u'lan yi'e, jaxa ye'nle'i mini jas el b'ene jmoka. ¿Jastal oj b'ob' yal'e' yuj ay jas wax k'anayi'e b'a?—
16-17Tsa'an ja Moisesi, ya jul sk'ujol ja Core, jel b'i t'ilan oj jak sok ja Aaron ja pilan k'ak'u sok ja chab' syen chab' tajb'e sok lajune (250) yintil jumasa ja Levi, a yi'e jan ja stsikub' spome yuj ja oj stsike' pom b'a sti' sat ja Dyosi, ti oj cho ajyuk tiw ja Aaroni.
Ja Dyosi, ya'yi wokol ja Core sok ja smoj jumasa
18-19Ja pilan k'ak'u ja Core, stsomo och spetsanil ja smoj jumasa b'a sti' sat ja snajtsil tsomjel b'a ti oj sta' sb'aje tiw sok ja Moises sok ja Aaroni. B'a jujune ti wa'n ajlel och yujile ja stsikub' spome'i. Jaxa Dyosi, tsats lek sje'a spetsanil ja yip b'a sti' sat ja kristyano jumasa, 20ti yal yab' ja Moises sok ja Aaroni:
21—Jitsanik ja b'ay ja kristyano jumasa jawi, yuj ja ya'an oj ch'ay sna'jel spetsanile—.
22Jaxa Moises sok ja Aaroni, ti ko'ye mek'ana man sta'a ja lu'um ja spatane'i, ti yalwe yab' ja Dyosi:
—Dyos kuj, b'a jpetsaniltikon we'n waxa wa'a ja jsak'aniltikoni, —Mok a mil'e'—. ¿Yuj ma ti' oj ja ch'ay sna'jel spetsanil ja kristyano jumasa yuj smul jun winik b'a?
23Jaxa Dyosi, ti yal yab' ja Moisesi:
24—Ala yabye spetsanil ja israelenio jumasa, a eluke najat ja b'ay ja snaje ja Core, ja Datan sok ja Abirami.
25Ja'yuj ti waj ja Moises ja b'aye ja Datan, sok ja Abirami. Waj mojtajuk yuj ja ma'tik ayxa sk'ujoli, cho ye'n niwak ya'tele yuj ja jmoj alijeltik jumasa. 26Ti yala yab' spetsanil ja kristyano jumasa: —Ch'akan elanik najat ja b'ay ja snaje ja tantik winik jawi, mini jun sb'ej ja jas wa'ne yaljeli, mok jas a yam'ex yi ja jas sb'aje'i. Mi yuj smul ye'nle ti oj cho chamanik ja we'nlexi.
27Jachuk ch'ak eluke najat ja kristyano jumasa ja b'a'ye ja winik jumasa jawi, jaxa Datan sok ja Abirami, ti'xa chapan aye sok ja sche'ume sok ja yuntikile b'a wax ajyi ochel b'a snaje'i. 28Ti yala ja Moisesi:
—Ti waxa wilawexa ja ke'n kechan wax k'u'an ja jas wax yala ja Dyosi, mi ja'uk wax k'u'lan ja jas wax k'ana ja ke'n. 29Ja kristyano jumasa jawi, yuj k'a jach' chamye ja jastal ni wala chamtiki, yujni ke'n wa'non yaljel ay jas oj ek' yujile'a. 30Kechan ta yuj k'a mi jach' sk'u'lan jastal jaw ja Dyosi, yuj k'a ja sjama sb'aj ja lu'um b'a oj ch'ak b'uk'juke sak'an, yujni ye'n sta'oj smule sok ja Dyosi.
31Yajni ch'ak k'umanuk ja Moisesi, ti sjama sb'aj ja lu'um ja b'aye'i. 32Spetsanil ja ma sk'u'an ja jas yala ja Core, sak'an ch'ak b'uk'juke yuj ja lu'umi, sok spetsanil ja yuntikile'i, spetsanil ja jastik sb'aje'i. 33Jach' ch'ay sna'jel spetsanil ja kristyano jumasa jawi.
34Yajni yilawe ja jastal iti, spetsanil ja yuntikil ja Dyosi, elye ajnel wa'ne'xta awanel: —La elkotikik ja ili. Jaxa ta lek man ke'ntik oj sb'uk' otik ja lu'um b'a—.
35Jaxa Dyosi, sjeka jun niwan k'ak' b'a ch'ak stsik spetsanil ja chab' syen sok ja chab' tajb'e lajune (250) yintil jumasa ja Levi.
36Tsa'an ja Dyosi, ti cho yal yab' ja Moisesi:
37-38—Ala yab' ja Eleazar yunin ja Aaroni, a ya eluk ja stsikub' spome'i, a stup ja sk'ajk'al ayto yi'oji. Ja ke'n jsak'ata ja ye'tal chakal k'ak' jawi, sok ojto ya'we makunuk b'a snaj ja yuntikil ja Aaroni. Sok ja tak'in jumasa yi'oj ja ye'tal jawi, k'u'lanik sok lamina, potsowik sok ja altar ja lamina jawi. B'a jach' oj sna'e lek ja israelenio jumasa ja jas ek'i, sok ja' oj ya'kan b'a sk'ujole.
39-40Ja Eleazari, jach'ni sk'u'lan spetsanil ja jastal alji yab' ja Moises yuj ja Dyosi, jaxa israelenio jumasa alji lek yabye mok ma och mojan yujile ja b'a altar b'a oj stsik e' ja pom ta yuj k'a mi ja'uk yuntikil ja Aaroni, yuj k'a pilan ma ochi jach'ni oj ch'ay sna'jel ja jastal wajye ja Core sok ja smoj jumasa.
Ja kristyano jumasa jelxi ja sle'jel smule'i
41-43Ja pilan k'ak'u ch'ak stsom sb'aje ja kristyano jumasa, b'a och sle'e yi smul ja Moises sok ja Aaroni. Wa sk'ana oj syajb'ese, ti yalwe yab'a: —We'n a mulex ja wa'n chamel ja yuntikil ja Dyosi.
Yajni yabye ja jas wax yala ja kristyano jumasa, ti ochye och b'a snajtsil tsomjeli, jaxa ye'nle'i, jak musjuke el yuj jun nole ason. Jaxa Dyosi, sje'a spetsanil ja yipi, 44ti yala yab' ja Moisesi: 45—Jitsanik ja b'ay ja kristyano jumasa jawi, yuj ja ya'n oj jch'ay sna'jele'i.
Jaxa Moises sok ja Aaroni, ti ko'ye mek'ana man sta'a ja lu'um ja spatane'i, 46Ja Moisesi, ti yal yab' ja Aaroni: —Ja Dyosi, jelxa tajkel, wa'nxa ya'jel yi wokol ja kristyano jumasa. I'aj juts'in ja tsikub' pomi, a ochyi chakal k'ak' sok pom, kax a'kan ja b'ay ja altari, ti la waj ja b'a'ye ja israelenio jumasa, k'ana yi ja Dyos a ch'ayjuk yi'e ja smule'i.
47Jaxa Aaroni, jach'ni sk'u'lana, waj ja b'a'y ja kristyano jumasa. Yajni yila jelni wa'n a'jel yi'e wokol yuj ja Dyosi, ti och stsik ja pomi, cho sk'an yi ja Dyos a sch'ay sna'jel ja smule ja kristyano jumasa. 48Jaxa Aaroni, ti och tek'an b'a snalan ja cham winik jumasa sok ja ma' sak'anto ayi, jachuk ya' tek'an ja wokol wa'n ya'jel ja Dyosi.
49Ja k'ak'u jawi, chamye jun mil sok juke syen (1,700) kristyano jumasa, mi ajtab'axi ja janek' cham sok ja Core.
50Yajni mixa wa'nuk chamel ja kristyano jumasa, ti'xa waj b'a snajtsil tsomjel ja Aaroni, ti waj sta' sb'aj sok tiw ja Moisesi.
Currently Selected:
Numeros 16: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
