Numeros 15
15
Ja majtanal jumasa sok chante oj tsikxuki
1Ja Dyosi, ti yal yab' ja Moisesi:
2—Ala yab' ja israelenio jumasa: Yajni ti'xa aye b'a chonab' oj ka'yi'e'i, T'ilan jach' oj ya'we ki jastal it ja jmajtan jumasa:
3—Oj b'ob' yi'e och b'a jmajtan ja swakaxe ma scheje b'a oj stsik e' ki yuj ja was stoyowone'i; oj b'ob' cho ya'weki b'a jmajtan ja jas tsamal wax yila ja ye'nle'i, ta yuj ay wa sk'ana oj k'u'lyi'e'i, ma yuj sb'a oj sk'u'luke jun k'ini. Ja ke'n jelni lek wax k'ab' ja majtanal jumasa jawa.
4-5—B'a jujune chej oj yi'e' och jun prasko pajal ya'lel ts'usub' sok chab' kilo lekil arina, wots'ob'al sok jun prasko aceite olivo. 6-7Ta yuj k'a jun swaw chej oj ya'e, t'ilan ek'el yuj ja jun prasko oj yi'e och ja ya'lel pajal ts'usub'i, sok chane kilo arina wots'ob'al lek sok ek'el ja jun prasko aceite oj ya'we ochuki. Jach' wax k'ana jastal jaw ja jmajtan jumasa.
8-10—Ja yajni oj ja tsik ex jun yal wakax yuj ja waxa toyowonexi, ma jun jmajtan oj ja wa'ex ki b'a laman oj ajyanik jmoki, ma yuj ay jas waxa k'ana oj ja k'u'lukex, t'ilan oj ja wi'ex och chab' prasko pajal ya'lel ts'usub' sok wake kilo lekil arina oj wots'xuk sok chab' prasko aceite. Jach' jastal jaw wax k'ana ja jmajtan jumasa.
11-16—Jach' oj ja k'u'lukex a petsanilex, jach'ni ja ma'tik tuk chonab' jakeli, oj ni ya'weki b'a jmajtan ja swaw swakaxe'i, ja syal ch'in swakaxe'i, ja swaw scheje'i, chej sok chivo jumasa. Mini jas tuk oj yil'e'a. Ja jastal iti, yujni jach' oj sk'u'luke spetsanil k'ak'u'a.
17Tsa'an ja Dyosi, ti cho yal yab' ja Moisesi:
18—Ala yab' ja israelenio jumasa, ja yajnix k'otye b'a niwan chonab' oj ka'yi'e'i, 19sok ja yajnix k'e stul'e' ja sat ja trigo, sok ja yajni ojxa och yabye'i, jel t'ilan oj spil'e kan ki ja jb'aj ke'ni. 20-21T'ilani ke'n oj ya'weki ja b'ajtan sat jumasa oj stul'e'i, sok ja b'ajtan waj oj ta'juk yujile'i.
Ja majtanal jumasa b'a mi oj ka stup ja smule'i
22-23—Ta yuj k'a mi k'e' sk'u'luke ja sb'ajtanil k'ak'u ja jastal kal yab' ja Moisesi, jach' oj sk'u'luke jastal iti:
24-26—Yuj k'a spetsanil ja kristyano mi sk'u'lane' ja jas kala, kechan ta yuj k'a mi jach' wa'nuke yaljel oj sk'u'luke'i, t'ilan oj stsiki jun yal wakax, sok ojni ch'ak stsik spetsanila. T'ilan oj ya'weki sok arina sok pajal ya'lel ts'usub'. Oj cho ya'weki jun chivo ja b'a mi oj ka stup ja smule'i. Jach' wax k'ana jastal jaw ja jmajtan jumasa. Ja pagre ma' oj ya'ki ja jmajtan jumasa, b'a jach' mi oj ka stup ja smul spetsanil ja israelenio jumasa, sok spetsanil ja tuk chonab' jakel teya mokexi.
27—Yuj k'a kechan june ja ma mi sk'u'an ja jas kala, a ya'ki jun yal chiva sb'a jun jab'il. 28Ja pagre jach' oj sk'u'luk ja jastalni wa sk'u'lani ti oj ya'ki ja jmajtan it wax a'jiki'i, jaxa ke'n mini oj kas stup ja smul ja ma' wax ya'a. 29Jach' wax yala jastal it yuj ja sb'aj ja ma wa sle'a smul mi yuj jach' wanuk yaljel oj sk'u'luki, ja' jastal oj makunuk yuj ja ab'al it ja israelenio, cho jach'ni ja ma'tik tuk chonab' jakeli. 30-31Yuj k'a wa sna'a ja jas wax kala'i, sok ti wa sk'u'lan ja b'a mi sb'ejuki, ja kristyano jumasa jastal jawi wani sta'a smul jmoka, oj ch'ay el sna'jel ja b'a yojol ja kuntikil jumasa.
Ja wokol b'a skokjel ab'ali
32Ja yajni ti'to aye b'a wits ja israelenio jumasa, ti sta'awe jun winik wa'n tsomo si' ja sk'ak'u'il jijleli. 33Ti yi'aje och yi ja Moises sok ja Aaron b'a sti sat spetsanil ja kristyano'i. 34Yuj ja mi sna'awe jas oj sk'u'lukeyi ja ye'nle'i, ja'yuj ti smajlaye jas oj yal Dyosi. 35Jaxa Dyosi, ti yal yab' ja Moisesi: —A'wik eluk ja b'a yoj chonab'i, ch'ojowik ton man oj ja mil'ex—.
36Jach'ni sk'u'lane ja israelenio jumasa'a.
Ja yak'il sk'u'e'i
37Tsa'an ja Dyosi, yal yab' ja Moisesi:
38—Ala yab' ja israelenio jumasa, sok spetsanil ja yintile jumasa, t'ilan oj ya'we och yak'il ja yokil sk'u'e'i, sok jun yelaw chak muk muk. 39B'a jachuk, yajni oj ja wil'ex ja yak'il jawi, ti oj ja na'ex yuj jel t'ilan oj ja k'u'ukex ja jas kaloj a wabyexi. Ja jachuki mini ma oj b'ob' sk'ok ja jas wax kala'a, cho mini oj b'ob' a k'u'lukex ja jas jex k'ank'unixa wabyexi, mi ja' oj yala wabyex ja jas waxa na'awex b'a oj ja jip'onex kani. 40Na'awik t'ilan oj ja k'u'lukex spetsanil ja jas wax kala, sok kechani ja oj a k'u'ukex ja kab'ala. 41Ke'n ja wa Dyosonex ka elanik b'a Egipto, b'a oj ochanik kuntikil. Sok kechan ke'n t'ilan oj ja k'u'ukonexa, xchi ja Dyosi.
Currently Selected:
Numeros 15: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
