Numeros 14
14
Ja israelenio jumasa stajb'aye ja Dyosi
1Ja a'kwal jawi, wa'nxta awaljuke ok'el ja israelenio jumasa. 2Spetsanile ti' och stajb'aye ja Moises sok ja Aaroni, ti wax yalawe'a:
—B'ob'ta jel lek ajyi ja ti'ukxta chamkotikon kan b'a Egipto, ma b'a yoj witsi. 3¿Jas lom yi'ajotik jan ja Dyos ja b'a chonab' iti? ¿Kechan ita b'a oj ch'ak smil'otikon jpetsaniltikon jaxa kixukiltikon sok ja kuntikiltikoni, oj ch'ak a'ji ochuke yib' k'ab'al tak? —La cho kumxukotik b'a Egipto—.
4Ti wax yala sb'aje'a: La jle'tik jun ma oj ka'tik och ya'tel b'a oj ya kumxukotik b'a Egipto. 5Jaxa Moises sok ja Aaroni, ti ko'ye mek'an b'a sti' sat ja israelenio jumasa, man sta'a ja lu'um ja spatane'i. 6-7Jaxa Josue sok ja Caleb, yuj ja cho ti'ni aye ja ye'nle sk'eljel ja lu'umi, sch'i'tala'an ja sk'u'e yuj ja wax yabye jas wax yala ja kristyano jumasa:
—Ja lu'um waj jk'eltikoni, jel lek; 8ja tiwi, jex ajyi ja jastik jumasa. Ja Dyosi, je sk'anawotik; oj sle' jastal oj ya ochkotik, ojni cho ya'ki'tika. 9Jel lek ja mi lomxa ta'awex ti' b'a mi sb'ejuk ja Dyosi, mok cho xiwanik yuj ja kristyano jumasa ma' tey b'a chonab' jawi. Mi wokoluk oj kil k'ujoluktike yuj ja mey ma oj koltajuke yuj ja ye'nle'i, jaxa ke'ntiki, wa skoltanotik ja Dyos kujtiki. —Mi lom la xiwyex—.
10Jaxa kristyano'i, mini skisawe'a; kechan wa sk'ana oj sch'oj'e ton ja chab' winike jawi.
Ja Dyosi, ya yi' wokol ja israelenio jumasa
Ja'yuj ja Dyosi, sje'a sb'aj sok spetsanil ja stsamalil b'a snajtsil ja tsomjel b'a sti' sat spetsanil ja israelenio jumasa, 11ti alji yab' ja Moisesi:
—¿Jastal oj jak sk'ujole ja it jumasa ja wax yalawe mi t'ilanukon sok mey kip b'a? Jelxa jitsan ja milagro jk'u'lanta yi'e ja ye'nle'i, ¿Mini sok ja jachuki, mi sk'u'anone tak? 12Ja ya'n oj jek yi'e jun niwan chamel, oj ch'ak jch'ay sna'jele. Jaxa we'n Moises oj ka pojxuk lek wa moj jumasa, sok jitsan lek.
13-16Jaxa Moisesi, ti yala'a:
—Ta oj k'a a ch'ay sna'jel spetsanil ja kristyano jumasa, kechan na'a lek we'n wa eluke sok spetsanil a wip ja b'a ajyi ye'i, jaxa yajnix waj yabye ja egipsiano jumasa ja jas oj ja k'u'luki, ti oj och yal e ek' ja b'a tuktukil niwak chonab'i, jaxa ma'tik oj yab'i, ti oj yal'e'a: —Ja Dyosi, mi k'ot yuj meran ja kristyano jumasa b'a chonab' yal yab'i. Ja'yuj ti ch'ak ya cham kan b'a wits—, oj chi'uke—.
—Spetsanile wa sna'awe yuj we'n waxa talna ja israelenio jumasa jawi. Wax cho sna'awe sok jun nole ason waxa je'a yi'e b'a oj wajuke b'a sat k'ak'u, jaxa b'a a'kwali sok jun tsome k'ak'; wax cho sna'awe wa wuntikil wax yil'a satilajel ab'al.
17—Ja'yuj ts'akataluka'a je'a ja sniwanil wa wipi. Jach'ni jastal a waluneji, 18jel ja syajal wa k'ujoli, sok jel jun k'ujola, ja'yuj mix wa stup ja smul ja mulanumi. Cho we'n a walunej ja smul ja snan state'i, ye'n oj wa stup' ja yuntikile'i, ja yije'i, sok ja yuntikil ja yije' jumasa. 19Dyos kuj, man b'a Egipto kuchta jan a wuj ja jastale ja it jumasa yuj k'a meran ja jel niwan ja syajal wa k'ujol soke'i, mok wa stup'e ja mulal iti.
20Jaxa Dyosi, ti yala yab' ja Moisesi:
—Lek ay, ta jach' k'a waxa k'ana, mi oj ka stup ja smule'i. 21-23—Ja smeranil ja ke'n sak'anon lek, jaxa kipi, tey b'a spetsanil slechanal ja lu'umi. Ay jas oj kala wab'i: Mini june ja ma yilawe ja milagro jumasa jk'u'lan b'a Egipto sok b'a witsi, mini jun ma oj yil ja lu'um b'a oj ka'wi'exi. Yuj ja lom mi sb'ejuk k'umaniye jb'aji, jel jitsan majke yilawe ta ay jas oj b'ob' kuj, sok mini sk'u'anone'a.
24-25Kechan ja ka'tijum Caleb, mi jachukuk ja jastal ja tuk jumasa, sk'u'an ja jastik kala'i. Ja'yuj sok spetsanil ja yuntikil jumasa oj ochuke ja b'a lu'um kaluneji, ja ya'n ye'nto ti' aye ja yintil jumasa ja Amalek sok ja cananeo jumasa. Jaxa we'nlex ja jecheli, ka'axik b'a wits b'a stojol ja niwan paman ja' it jel ja yakili. Ja iti, wax cho alxi sb'aj Mar Rojo.
26Ja Dyosi, cho yal yab' ja Moises sok ja Aaroni:
27—Kab'ta jastal mi lek wa sta'awone ti ja israelenio jumasa. ¿Mixax kuch kuj ja jastal jex tajb'aniye ja kristyano jumasa iti? 28Wa'ne'xta yaljel yuj jelxa ka'tayi'e wokol, yuj ja jach' wa'ne yaljeli, ja'yuj ojni ka'yi'e ja wokol ja wa. Ke'n Dyoson yuj ja israelenio jumasa, ja jas wax kala, ojni jk'u'luka. 29Spetsanil ja ma' ek'elxa yuj ja jun tajb'e (20) jab'ili, yuj k'a mi lek sta'ojukone ti, ti oj ch'ak chamuke kan b'a wits. 30Ja lu'um b'a kaluneji, kechan ye'n oj ochuke ja Josue sok ja Caleb, mi ma' tuk oj ochuk.
31-32—Ja we'nlexi, ti oj ch'ak chamanik b'a'an tiw b'a wits. Jaxa wa wuntikilex it a walawex oj ch'ak ochuke yib' k'ab'ali, ja ye'nle'i, oj ochuke ja b'a lu'um it mi a kisa ja we'nlexi. 33Yuj ja mi a k'u'anonex ja we'nlexi, ja'yuj ja wa wuntikilexi, chab' tajb'e (40) jab'il ti oj ajyuke ek' b'a wits oj stalnaye chej, man oj smajlaye ti oj ch'ak chamanik kan b'a wits ja we'nlexi.
34-35—B'a ti oj ja na'ex mi tajneluk ja sk'okjel ja jas wax yala ja Dyosi, tsats lek oj ka'wi'ex ja wokoli. Wax kala wabyex jach'ni oj jk'u'luka. Ja yajni waj a k'el'ex ja lu'um it kala wabyexi, yi'aj ja wujilex chab' tajb'e 40 k'ak'u, jaxa wokol oj ka'wi'ex ja ke'n jun jab'il, yuxta b'a spetsanil k'ak'u, chab' tajb'e jab'il ti oj ajyanik ek' b'a yoj wits, oj k'umb'anik lek man oj chamanik.
36-37Ja Dyosi, jach' ya stup jastal it ja smul ja winike jumasa ma'tik sjeka ja Moises waj sk'el'e ja lu'um it yala ja Dyosi, yuj ja lom yalwe yab' ja kristyano jumasa mi meranuk ja wax yala ja Dyos jel lek ja lu'um wa sk'apa. 38B'a slajchawil ja ma'tik waj yil'e ja lu'um sk'apa ja Dyosi, kechan ye'n kanye sak'an ja Josue sok ja Caleb.
39Yajni ch'ak yal ja jastal it ja Moisesi, jel cham sk'ujol ja israelenio jumasa.
Ilk'ujolaji yuj ja israelenio
40Ja israelenio sajto lek k'e'ye ja pilan k'ak'u, ti k'e'ye b'a jun cha'anil wits, ti yalwe yab' tiw ja Moisesi:
—A'nima wax na'atikon ja jmultikoni yujni oj ochkotikon ja b'a lu'um yalunej ja Dyosi.
41Ti yala ja Moisesi:
—¿Jasyuj ja lom waxa k'okowex ja jas wax yala ja Dyos b'a? 42Mok wajanik, ja Dyosi, mi teyuk amokexa, ja'yuj ojni yila k'ujolex ja ma'tik mi lek wax yilawexa. 43We'n lom mi a kisawex ja jas yala wabyexi, ja'yuj mixa ni wa sk'elawex ja ye'na. Ta yuj k'a waxa walawex oj wajanik b'a lu'um jawi, sb'aj itani oj waj ja wa'a b'ajex miljela.
44Jachuk wa sna'awe lek ja jas oj ek'uk ja israelenio jumasa, mini skisawe'a, ch'ak ni k'e'uke ja b'a witsa, jaxa Moises sok ja skajonil strato ja Dyosi, ti kan sok ja b'a'y ja na'its jumasa tojb'el sok k'u'utsi. 45Yajni yabye ja kristyano jumasa ma'tik tey b'a chonab' jawi, ch'ak wajuke waj snoch e' ja israelenio jumasa, k'otye man Horma, spetsanile ti ch'ak miljuke tiwi.
Currently Selected:
Numeros 14: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
