Numeros 13
13
Ja Moisesi, sjeka k'eluman ja Canaani
1Ja Dyosi, yal yab' ja Moisesi: 2—Jeka chab' oxuk winik b'a Canaan b'a oj waj yil jastal ay ja lu'um b'a oj ka'wi'exi. A waj jun ma' niwan ja ya'tel b'a jujun k'ole'i.
3Jachuk, sjeka ja Moises ja jastal alji yab' yuj ja Dyosi, man b'a wits Paran masan b'a Canaan, sjeka lajchawe ja ma' niwak ja ya'tel yuj ja israelenio jumasa, jach'ni jastal yala ja Dyosi. 4-15Ja ma'tik niwak ya'tel jekji, ja it jumasa:
| Sk'ole | ja lok'olali |
|---|---|
| ja sb'a Rubeni | Samua |
| ja sb'a Simeoni | Safat |
| ja sb'a Judai | Caleb |
| ja sb'a Isacari | Igal |
| ja sb'a Efraini | Oseas |
| ja sb'a Benjamini | Palti |
| ja sb'a Zabuloni | Gadiel |
| ja sb'a Manasesi | Gadi |
| ja sb'a Dani | Amiel |
| ja sb'a Aseri | Setur |
| ja sb'a Neftali | Nahbi |
| ja sb'a Gadi | Gueuel |
16-17Ja Oseas yunin ja Nun, jaxa Moisesi, stukb'es yi ja sb'i'ili, ya sb'i'iluk Josue. Tsa'an ja Moisesi, ti sjeka ja ma'tik niwak ja ya'tel yuj ja israelenio b'a oj waj sk'el'e jastal ay ja lu'um b'a Canaani, ti yala yabye'a:
—Ti la wajyex b'a wits, man oj k'otanik b'a yaxk'uli. 18K'elawik lek jastal ja chonab'i, sok ja kristyano jumasa tey tiwi, jel ma tsatse ma miyuk, jel ma a'aye ma miyuk. 19-20K'elawik jastal stojb'esneje ja schonab'ile'i, jel ma tsats tojb'el ma miyuk ma jach' jastal ja na'its jumasa tojb'el sok k'u'utsi. K'elawik ta ay lek ste'il b'a lek wax satini, ma yuj mi lek wax satini. Mi lom la xiwyex i'ajik jan t'usan ja jas wax ajyi b'a lu'um jawi.
Ja k'ela lu'umi sb'ejtese spetsanil
Ja k'ak'u jumasa jawi, ja k'e' stuljel ja sb'ajtanil sat ja ts'usub' jumasa, 21ja winik jumasa ma'tik waj sk'e'l e' ja lu'umi, ti stuluwe yi sk'eljel b'a wits Sin, b'a ko'el k'inal, man tiwi k'otye masan b'a Rehob, mojan yi'oj sb'aj sok ja Amati. 22B'a snochowe yi'i sb'i'il Negueb, jaxa b'a k'otye'i sb'i'il Hebron. Ja chonab' jawi juke jab'il b'ajtan yuj ja schonab'il ja egipsiano b'a Soani.
Ti yilawe ti kulane tiw ja Ahiman, ja Sesai sok ja Talmai, ja yintil jumasa ja cha'anil winik Anac. 23-24Yajni k'otye b'a jun uk'um, ti sk'utsuwe jun palane ja sat ts'usub'i, kechan jel al ja'yuj chawane ochye sk'echjel. Jaxa tuk jumasa stuluwe sat granada sok higo ch'ak yi'e oche. Ja b'a uk'um stuluwe ja tek'ul jumasa jawi, ya'we sb'i'iluk Escol, wa sk'ana yale —Palane—.
Ja winike jumasa, yalawe ja jas yilawe'i
25Ja k'ak'u jumasa yi'aj yujile sk'eljel ja lu'um jawi, chab' tajb'e (40) k'ak'u, tsa'an ti kumxi ye' 26b'a Cades, b'a wits Paran. Ti sta'a sb'aje tiw sok ja Moisesi, ja Aaron sok spetsanil ja israelenio jumasa, yalawe spetsanil ja jas yilawe'i, cho sje'awe ja jas yi'aje jan b'a lu'um jawi. 27Ti yalawe yab' ja Moisesi:
—Ja b'a a jekawotikoni wajtikon waj kiltikon jastal. Ja lu'umi, jel lek; —Ja jas oj kab'tiki, mini t'un oj ch'akuka. K'elawil jastal ja sb'a'al wax ya'a.
28—Kechan ja b'a mi lekuki ja' jel tsatsik ja ma'tik tey tiwi, ja schonab'ile'i tojb'el lek sok makan lek. —Cho kilatikon ja yintil jumasa ja cha'anil winik Anac. 29Ja b'a wits Neguebi, ja ti aye ja yintil jumasa ja Amaleki, b'a yoj yaxk'uli, ja' teye ja hitita jumasa, ja jebuseo sok ja amorreo jumasa, jaxa b'a niwan paman ja' jumasa b'a niwan ja' Jordani, ja tey ja cananeo jumasa.
30Ja kristyano jumasa ochxta wo'oljuke sb'aj ja Moisesi, jaxa Calebi, ti yal yabye a ch'ajb'ajuke'a, ti yala yabye'a:
—Ojni ki'tik kan ja lu'um jawa. Ojni b'ob' kujtikika, —xchi ja Calebi—.
31-33Jaxa tuk jumasa ma'tik waj soki, och skom'e ja israelenio jumasa, ti yalawe'a, ja lu'um waj kiltikoni mini t'un lekuka.
—Mok wajanik, —xchiye. Mi jas oj b'ob' kujtik sok ja ye'nle'i yujni jel jitsane'a. —Ja ma'tik tey tiwi cha'anil winik jastal Anac. —Ja B'a sti' sat ja ye'nle'i, ja ke'ntiki jel ch'in wax yilawotike jastal ja yal chulchul jumasa. Choj mi oj b'ob' ajyukotik ja b'a lu'um jawi, ja kristyano jumasa jel wax chamye, lajan sok yuj ja wax b'uk'jiye yuj ja lu'umi.
Currently Selected:
Numeros 13: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
