Numeros 12
12
Ja Maria sok ja Aaroni, sk'e'naye ja smoj alijele Moisesi
1Ja Maria sok ja Aaroni, mi sb'ejuk sta'awe ti' ja smoj alijele Moises yuj ja ita lom nupani sok jun ixuk mi hebrea'uki. 2Ti yalawe'a: —¿Mi oj kaltik yuj kechan ye'n stuch'il k'umaji ja Moises yuj ja Dyosi? Jach'ni ja ke'ntiki wanix cho sk'umayotika—.
Ja Dyosi, ch'ak yab' ja jas yalawe'i, 3jel tajki ja yajni yab'i, yuj ja Moisesi, kechani ye'n ja winik jel ch'in wax ya'a sb'aj b'a lu'um iti. 4Ja'yuj ti payjiye yuj ja Dyos ja Moisesi, ja Aaron sok ja Maria, ti alji yabye'a: —Ka'axik a woxwanilex b'a snajtsil tsomjel—.
Yajni ti wajye yoxwanile'i, 5ti ko' kon ja Dyos b'a jun t'one ason ti ajyi tek'an b'a wax ajyi ochel b'a snajtsil tsomjeli; ti'xa spaya ja Aaron sok ja Maria, yajni mojanxa aye'i 6-8Ti yal yabye'a:
—Maklayik lek ja jas oj kala wabyexi. ¿Jasyuj ja wala k'umaniyex sb'aj b'a mi sb'ejuk ja Moises b'a? Ja we'nlexi waxa na'awex, ta yuj k'a ay jas wax k'ana oj kal yab' jun aluman Dyos, kechan wax ka snaj satuke, ma wax ka swaychuke. Jaxa Moisesi, kechan ye'n jel toj ay yuj spetsanil ja ka'tijum jumasa. Ja'yuj satilajel ab'al wax k'uman jb'aj sok. Ja ye'n toj lek wax kal yab' ja jas wax k'ana, sok wax cho je'a jb'aj yi'—.
9Ja Dyosi, spila sb'aj sok ja ye'nle' yuj ja jel tajki yujile'i. 10Jasa, yajni stulu sb'a ja ason b'a snajtsil tsomjeli, jaxa Maria och k'a'uk ja sb'ak'teli. —Ja sb'ak'teli sakb'i el jastal ja b'ati.
Yajni yila ja Aaron jastal ay ja Maria, 11ti yala yab' ja Moisesi:
—Ts'akataluka'a, mok wa jtuptikon ja mulal iti. Ja jas jk'u'lantikoni yuj mix na'atikon. 12Ja sts'ujmil ja Maria jomta ele, jach' ay jastal ja sts'ujmil ja yal alats ja yajni chamelxa wax manxi. —Ts'akataluka'a, k'anayi ja Dyos mok jach' ya'kani.
13Ja'yuj ti sk'ana yi ja Dyos ja Moises a ya tojb'uk ja Maria, 14Jaxa Dyosi, ti yala'a:
—Lek ja'uk wa stsujb'anyi ja sat ja stati, ojni a'ji k'ixwuk leka, oj a'ji el najat juke k'ak'u ja b'a'y ja na'its jumasa, jach' oj a'ji stup ja smuli, —xchi ja Dyosi.
15Jachuk a'ji el juke k'ak'u ja Maria b'a'y ja na'its jumasa, spetsanil ja k'ak'u jumasa jawi, mi tukb'esxi b'a oj ajyuk ja na'its jumasa. 16Tsa'an, elye ja tiwi, ti wajye b'a Haserot, mixa b'a k'otye tek'ana, masan k'otye b'a wits Paran.
Currently Selected:
Numeros 12: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
