Numeros 11
11
Ja israelenio jumasa stajb'aye ja Dyosi
1Ja israelenio jumasa, yujni k'ajyel wa stajb'aye ja Dyos yuj ja wokol wa'n ek'el yujile'i. Ja Dyosi, jel tajki ja yajni yab' ja swa'ne yaljeli, ja'yuj ya ajluk k'ak' sjoyanal ja b'a'y ja snaje tojb'el sok k'u'utsi. 2Ochxta awaljuk ja kristyano wa sk'anawe oj koltajuke yuj ja Moisesi, jaxa Moisesi, sk'ana yi ts'akatal ja Dyos a koltajuke, jachuk tup ja k'ak'i. 3Ja'yuj ja lu'um jawi, ya'we sb'i'iluk Tabera, wa sk'ana yale —ajli k'ak'—. Jach' yawe sb'i'iluk b'a ti oj jak sk'ujole yuj ti tajki yujile tiw ja Dyosi.
4-9B'a jujune a'kwal ti wax ko' lajan ja manaj sok yal ts'ub'il ja'i. Ja manaj jawi, lajan sok ja yal yintil ja kulantuji, ja yelawi k'an jastal k'a'taj. B'a jujune sakb'el wax waj stul'e ja kristyano jumasa, wa sjuch'uwe, wa stojb'ese jastal waj. Ja yajb'ali lajan sok jastal waj tojb'el sok arina sok aceite.
Yuj ja tuktukil b'a jakel ja kristyano jumasa, ay ma kechan ja wajel sk'ujol ja swa'eli. Jaxa israelenio jumasa snochowe ja jas wa sk'u'lane ja kristyano jumasa jawi, b'a yoj yok'ele ti wax yalawe'a:
—B'ob'ta ay b'a oj ta'tik b'ak'et b'a oj k'uxtika. ¿Ma' oj ya'ki'tik ja chay jumasa jastal k'eb'ub'al wax k'uxutik ajyi b'a Egipto? —Jex ajb'ani ja yawal k'umi, ja meloni, ja tuyali, ja seboya sok ja axuxi. Jaxa ili, kechan wa'ntik chamel wa'in, —Spetsanil k'ak'u toj manaj wa'ntik yab'jel.
10Ja Moisesi, sna'a k'inal jasyuj ja wa'ne ok'el spetsanile ja israelenio jumasa b'a jujune b'a wax ochye b'a snaje tojb'el sok k'u'utsi, jel tajki ja Moises yuj ja wa sna'a sok ja jastal iti ojni tajkuk ja Dyosi. 11Ja'yuj, ti sjob'oyi ja Dyosi:
—Ja ke'n jun a wa'tijumon, ¿Jasyuj ja mixa wilawon leki, jasyuj ja waxa t'enawon ti' la ajyiyon sok ja kristyano jumasa it b'a? 12—Ja ke'n mi statukone sok mi snanukone. —Me'y sb'ej kuchub'al oj ki'e' och ja b'a lu'um oj ja wa' yi'e'i—. 13Sok yok'ele wax jak sk'an'e oj sk'ux'e b'ak'et. ¿B'a oj ki' b'ak'et b'a oj ka yab' spetsanil ja kristyano jumasa it b'a?
14—Ja jtuch'ili, Mi jas oj b'ob' jk'u'l sok ja kristyano jumasa iti; —Jel tsats ya'teltajel wax kab'i—. 15Ta yuj k'a jach' oj ja k'u'lki'. Jel lek ja ch'aya el jna'jeli. —Jel lek ja jas oj ja k'u'lki'i. Jelxa niwan ja ab'al k'umal ki'oj sok ja kristyano jumasa iti.
16Jaxa Dyosi, ti yal yab' ja Moisesi:
—Tsomo jan ki ox tajb'e lajune winik b'a ayxa sk'ujol, kechan ja ma'tik ay ya'teli. I'aj och b'a snajtsil tsomjel, tix majlaniye tiwi. 17Ja ke'n oj ko'kon ti oj k'umuka'a. Ja wa wip ka'oj ja wi'i, oj ka eluk a wi t'usan, ye'n oj ka'yi'e b'a jach' oj b'ob' kolta janan ya'teltajel ja kristyano jumasa; b'a jach' mi kechan we'n oj ja ch'aka b'aja.
18Ti cho alji yab' ja Moises yuj ja Dyosi:
—Ala yab' ja kristyano jumasa a sak' lek sb'aje ja jecheli, oj sk'ux'e b'ak'et. Ala yabye kab'ta ja jas wax yalawe b'a yoj yok'ele'i, wane'xta yaljel: —Wax k'ana oj k'uxtikon b'ak'et. Jel lek aytikon ajyi b'a Egipto.
—Ke'n oj ka'yi'e ja b'ak'et oj sk'ux'e'i. 19Mi kechanuk b'a jun k'ak'u, mini b'a chab'e, mini b'a jo'e, mini b'a lajune, mini b'a jun tajb'e. 20Oj ka'wi'ex b'ak'et b'a oj ja sk'ux'ex b'a spetsanil jun ixaw, man oj axwanik sk'uxjel, —man kistalxa oj ja wabyex ti'xa oj elk'ot b'a a ni'ex ja yik'ili—
—Jach' oj ka'a tup'ex jastal jaw yuj ja lom mixa kisawonexi, sok yuj ja mixa na'awexta teyon a mokexi. Jach' oj ek'uk a wujilex yuj ja lom a walawex: —Jel lek ja ti'ukxta kananik b'a Egipto—
21Ti yala ja Moisesi:
—Dyos kuj, ¿b'a oj ja wi' jitsan b'ak'et b'a oj wa yabye b'a spetsanil ja jun ixaw b'a? Ja kechan ja winiki, ay ma jun wake syen mil (600,000) mi ajtab'axi ja ixuke'i. 22A'nimax ch'ak jmiltik spetsanil ja wakax sok ja chej ki'ojtiki, ma oj chak ka'tik yi'e spetsanil ja schayil ja niwan paman ja'i, mini oj ya' yujile'a.
23Jaxa Dyosi, ti yal yab' ja Moisesi:
—¿Yuj a ma waxa wala yuj jel wokol oj b'ob' jk'u'l b'a? Ja jas wax kala ya'n oj ja wil ta oj b'ob' jku'luk ma miyuk.
24Jachuk ti waj ja Moisesi, waj yal yab' ja kristyano jumasa ja jas yala ja Dyosi. Cho stsomo ox tajb'e lajune ja ma'tik ay ya'tele'i, ti ch'ak schol b'a sjoyanal ja snajtsil tsomjeli. 25Ja Dyosi, ti kojan b'a jun nole ason sk'uman sb'aj sok ja Moisesi; cho sk'u'lan ja jas yaluneji: Ja jastal ya'oj yi yip ja Moisesi, jach' cho ya'yi ja ma'tik ay ya'tel yuj ja israelenio jumasa, yajni ti'xa yi'oj ja yipe'i, wanxax b'ob' yal'e' ja jas wax alji yabye yuj ja Dyosi. Jaxa tsa'ani, mixa b'ob' sk'u'luke.
Ja Eldad sok ja Medadi
26Ay chab' winik smoj sb'aje sok ja ox tajb'e lajune (70) ma' niwak ya'tel yuj ja israelenio, ja juni sb'i'il Eldad jaxa juni Medad, ti kanye b'a snaje tojb'el sok k'u'uts. A'nima ti' ayuke tiwi, ja yip ja Dyosi k'otni soke'a, cho jach'ni ja ye'nle'i, och yal'e ja jas wax je'ji yi'e yuj ja Dyosi. 27Ajnel waj jun yal kerem waj yal yab' ja Moisesi. 28Jaxa Josue, man sch'inil wa skolta ja Moisesi, tey tiw ja ye'n ja yajni yab' yala ja yal keremi:
—Tat, Moises, —Ala yabye mok sk'u'luke ja jastal jawi.
29Ti yala ja Moisesi:
—Mok jas ek' a k'ujol, mok ochan ilk'ujol. Ja ke'n wax k'ana ayxta spetsanil ja kristyano jumasa oj sta'e ja yip ja Dyosi, b'a jach' oj och yal'e ja jas oj aljuk yabye yuj ja Dyosi.
30Tsa'an ja Moises sok ja ma'tik ay ya'teli, kumxiye b'a snaje.
Ja pojwik' jumasa
31Ja Dyosi, man b'a niwan paman ja' ya jak jun tsatsal ik'. Ja ik' jawi sju'u jan jitsan pojwik' ti ch'ak jak ko'uk ja b'ay ja israelenio jumasa. Jel jitsan, ja lu'um jumasa b'a ko'i oj yi' jun k'ak'u sb'ejtesjel, kanxta b'usan ay mojan jun metro ja spimili.
32Ja kristyano jumasa, chab' k'ak'u sok jun a'kwal stsomo ja swa'ele'i. Ja ma jel ko'el sta'a, tsomxi yuj lajun b'use, ay ma ya lib'an b'a oj takjuk k'ak'u.
33Mitox ch'ak yujile ja swa'el ja yajni tajki yujile ja Dyos yuj ja jastik ch'ak yal'e jani, ja'yuj jel jitsan chamye. 34Ja'yuj ja lu'um jawi, ya'we sb'i'iluk Quibrot-hataava, ja b'i'ilal jawi, wa sk'ana yale: —Ja' sk'ejnal ja jas jex ajb'ani—, yujni ti smukuwe tiw ja ma kechan jel ok' sk'ujol oj sk'ux ja b'ak'eti.
35Tsa'an elye ja tiwi, ti wajye kulan b'a jun lu'um sb'i'il Haserot, ti'ni kanye chab' oxe k'ak'u tiwa.
Currently Selected:
Numeros 11: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
