Numeros 1
1
Ja soldado sb'a israelenio
1Ja israelenio jumasa, ti aye b'a takin lu'um k'inal b'a wits Sinai ja k'ak'u k'umaji yuj ja Dyos ja Moises b'a lu'um tsa'ub'ali. Ja k'ak'u jawi, ek'ta ox lajune ixaw elele b'a Egipto. Jaxa Dyosi, ti yal yab' ja Moisesi:
2—A och ju'un pilan pilan spetsanil ja israelenio b'a jujun k'ole sok b'a jujune na'its spetsanil ja sb'i'il ja israelenio jumasa. B'a jach' oj ja na' janek' aye sok ja sb'i'ile b'a spetsanile'i, 3ja winik jumasa b'a ay yi'oj jun tajb'e jab'il b'a ojxa b'ob' wajuke b'a tiro'aneli. A och ju'un ja sk'ole'il aye sok, a skoltaya stojb'esjel ja Aaroni, 4-16jach'ni ja lok'olal jumasa b'a jujun k'ole'i. Oj b'ob' skoltaya ja ye'nle'i:
| Sk'ole | ja lok'olali |
|---|---|
| ja sb'a Rubeni | Elisur ja stat ja Sedeuri |
| ja sb'a Simeoni | Salumiel ja stat ja Surisadai |
| ja sb'a Judai | Nahason ja stat ja Aminadabi |
| ja sb'a Isacari | Natanael ja stat ja Suari |
| ja sb'a Zabuloni | Eliab ja stat ja Heloni |
| ja sb'a Efraini | Elisama ja stat ja Amihudi |
| ja sb'a Manasesi | Gamaliel ja stat ja Pedasuri |
| ja sb'a Benjamini | Abidan ja stat ja Guidoni |
| ja sb'a Dani | Ahiezer ja stat ja Amisadai |
| ja sb'a Aseri | Paguiel ja stat ja Ocrani |
| ja sb'a Gadi | Eliasaf ja stat ja Reueli |
| ja sb'a Neftali | Ahira ja stat ja Enani |
17-19Jun ixaw tsa'an, ti'to aye b'a takin lu'um k'inal b'a wits Sinai. Jachuk ja Moises sok ja Aaroni, stsomowe spetsanil ja winike jumasa ma'tik tsajiye yuj ja Dyosi sok ja winik jumasa ma'tik ek'elxa yuj ja jun tajb'e (20) jab'ili. Jaxa janek' kani cho ti'ni aye tiwa. Ja'yuj yajtab'ane sok ya'we och ju'un chikan ja sk'ole aye yuj ja israelenio. Jach' sk'u'lane ja jastal alji yab' ja Moises yuj ja Dyosi.
20-46Ja' spetsanil ja it jumasa ja ma'tik ojxa b'ob' wajuke b'a tiro'aneli:
| Sk'ole | ja janek' |
|---|---|
| ja sb'a Rubeni | 46,500 |
| ja sb'a Simeoni | 59,300 |
| ja sb'a Gadi | 45,650 |
| ja sb'a Judai | 74,650 |
| ja sb'a Isacari | 54,400 |
| ja sb'a Zabuloni | 57,400 |
| ja sb'a Efraini | 40,500 |
| ja sb'a Manasesi | 32,200 |
| ja sb'a Benjamini | 35,400 |
| ja sb'a Dani | 62,700 |
| ja sb'a Aseri | 41,500 |
| ja sb'a Neftali | 53,400 |
| ja' spetsanil | 603,550 |
Ja yintil jumasa ja Levi
47Ja yintil jumasa ja Levi, mi ajtab'ajiye sok ja ma ek' paxta yujile ja jastal ja tuk jumasa, 48yujni jach' alub'al yab' ja Moises yuj ja Dyosi:
49—Yajnixa wajtab'en ja israelenio jumasa, mok wa ochuk ja yintil jumasa ja Levi. 50Ja ye'nle'i, jel t'ilan oj wa' a'tijuke b'a na'its tsa'ub'al, b'a jach' ye'n oj stalnaye spetsanil ja jas tey tiwi. Ye'n schol oj stukb'ese b'a oj ajyuk ja na'its jawi, sok spetsanil ja jas tey yojoli, cho ti oj stojb'es ja snaj ye'nle b'a sjoyanal.
51—Mi kechanuka, ja k'ole jumasa sb'a Levi, ye'n oj cho sjom'e' ja na'its tsa'ub'al ja yajni ojxa cho b'ejyuke ja kristyano jumasa; yajnix cho k'otye tek'ani, oj cho stojb'ese pilan majke.
—Spetsanil ja ma oj och mojan sok ja na'its tsa'ub'ali, ta yuj k'a mi ja'uk ja k'ole jumasa sb'a Levi, ojni chamuke'a.
52—Jaxa tuk juluch k'ole israelenio, jach' oj schol ja snaje jastal wa scholo sb'aj ja soldado jumasa: b'a jujune ti oj ajyuke tiw b'a yoj snaje sok ja sbandera'e'i. 53Ja k'ole jumasa sb'a Levi, ti oj sk'u'l ja snaje b'a sjoyanal ja b'ay ja na'its tsa'ub'ali sok ye'n oj stalnaye, b'a mi oj tajkuk ja Dyos sok ja yuntikili.
54Ja israelenio jumasa, ch'ak sk'u'luke spetsanil ja jastal alji yab' ja Moises yuj ja Dyosi.
Currently Selected:
Numeros 1: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
