Levitico 27
27
Ja ma tey sok ja Dyosi, koltaji
1Ja Dyosi, yal yab' ja Moisesi, 2ab'i yal yab' ja israelenio ja ab'al jumasa iti:
—Ay k'a ma' oj ya eluk ja ma' tey b'a sk'ab' ja Dyosi, 3t'ilan jach' oj stup jastal iti, ja'ni chikan jastal ja sakal tak'in wax makuni b'a snajtsil tsomjeli:
B'a jun winik ay yi'oj jun tajb'e ma ox tajb'e jab'il, chab' tajb'e sok lajune sat tak'in.
4B'a jun ixuk sok ja jab'il jumasa jawi, jun tajb'e sok lajune sat tak'in.
5B'a jun kerem b'a jo'e ma jun tajb'e jab'il, jun tajb'e sat tak'in.
B'a jun ixuk sok ja jab'il jumasa jawi, lajune sat tak'in.
6B'a jun yal kerem b'a jun ixaw ma b'a jo'e jab'il, jo'e sat tak'in.
B'a jun yal ak'ix sok ja jab'il jumasa jawi, oxe sat tak'in.
7B'a jun winik ek'ta ja ox tajb'e jab'ili, jo' lajune sat tak'in.
B'a jun ixuk sok ja jab'il jumasa jawi, lajune sat tak'in.
8—Yuj k'a jun ma' jel ajula sb'aj ja ma oj stup ja janek' jawi, a wajuk ja b'a'y ja pagre, b'a ye'n oj sk'el janek' oj b'ob' ya stupe.
Oj talnaxuk spetsanil ja sb'a ye'n ja Dyosi
9—Ja chante jumasa b'a pilanxa b'a majtanali 10mi oj b'ob' jeltesxuk sok pilan chante, yuj k'a waj jeltesxuk, schab'il ja chante jawi, jb'aj ke'n oj kanuk.
11—Kechan ta yuj k'a ja chante pilub'alxa, yuj tey sok ja chante b'a kistali, oj i'xuk och yi ja pagre 12b'a ye'n oj yal janek' sts'akol. Ja janek' oj yali mi oj b'ob' tukb'uk, 13kechan ta wan k'a sk'ana oj yi'kan ye'n ja ma sb'a ja chante jawi, ja oj stupi t'ilan oj ek' yuj ja jun tajb'e'i.
14—Ay k'a ma sk'ana oj ya'ki jun na'its, ye'n oj yal ja pagre janek' oj sts'akoluk. Ja janek' oj yali mi ma oj stukb'es, 15kechan ta wan k'a sk'ana oj cho yi'kan ja snaj ja ma ya'a, t'ilan oj ek' t'unuk ja jun tajb'e oj stup b'a jujune syeni.
16—Ay k'a ma sk'ana oj ya'ki xe'n lu'um, ja chikan janek' oj yi' ja inat ja yajnix ts'unxi, t'ilan oj tupxuk chab' tajb'e sok lajune sat tak'in b'a cha'tike syen sok jun tajb'e kilo yintil ja cebedas.
17—Ja ma sb'a ajyi ja lu'umi, yuj k'a wa sk'ana ke'n oj ya'ki ja jab'il wax kan lom ja a'tijum jumasa, ja sts'akoli mi oj tukb'uk. 18Kechan ta ek' ja jab'il jawi, jaxa sts'akoli ye'n oj yil ja pagre jayeto jab'il wa sk'ana oj cho eljul ja jab'il b'a oj kan lom ja a'tijum jumasa.
19—Kechan ta wan k'a sk'ana oj cho yi'kan ja slu'um ja ma ya'a, jach' oj stup jastal iti, oj ek'uk ja jun tajb'e b'a jujune syeni yuj ja jastal na'xeli. 20A sk'u'luk ja janek' lom ay yuj ja ojni chonxuki, ja tsa'ani mi jas oj b'ob' yuj. 21Yuj k'a ti kan lom ja lu'um jaw ja yajnix el jul ja jab'il oj kan lom ja a'tijum jumasa, ye'nxa wax yi'aj kan ja pagre jumasa, yujni ke'n a'jiki ja lu'um jawa.
22—Ay k'a ma oj ya'ki xe'n slu'um mi sb'ajuk yuj smanunej, 23ja pagre oj yajtab'en jayeto jab'il wa sk'ana oj el jul ja jab'il oj kan lom ja a'tijum jumasa, ja ma ya'a ja lu'umi, oj b'ob' stup ja k'ak'u jawi, chikan jastal wax yala ja pagre. 24Yajnix k'ot ja jab'il oj kan lom ja a'tijum jumasa, ja lu'um jawi ojni cho kumxuk sok ja ma' sb'aja.
25—Spetsanil ja sts'akol jumasa jawi, ja' chikan jastal ja tak'in wax makuni b'a snajtsil tsomjeli, yuj ja yalal ja jujune'i, juluche gramos.
Ja jas niwan wax ek'i
26—Mi ma' oj b'ob' yal oj ya'ki ja sb'ajtanil yal swakaxi ma ja yal scheji, yujni naka jb'aj ke'n spetsanil ja jaw jumasa'a.
27—Ja yal chante waxa wa'awexi, yuj k'a mi lekuk oj b'ob' yi'kan ja ma sb'aji. Kechan a stup ja jastal ni ja sts'akoli, sok oj ek' yuj ja jun tajb'e b'a jujune syeni, kechan ta mi b'ob' yuj ja jastal jawi, oj b'ob' chonxuk ja jastalni ja sts'akoli.
28—Mi jas oj b'ob' chonxuk ja jas a wa'wex ta ki'i, ja jastik jumasa jawi tsa'ub'alxa. Yuj k'a jach' oj k'u'laxuk jastal jawi lajan sok wax ch'ayxi el sna'jel ja majtanal jawi. 29Cho jach' jastal it ja ma ti wa'n a'tel jmoki.
30-32—B'a slajunil chikan jastik wax el b'a alaji, sok ja tek'ul jumasa jb'ajni ke'na'a. Cho jach'ni b'a slajunil ja chante jumasa jb'aj ni ke'na'a. Ay k'a ma sk'ana oj yi'kan ja jastik jumasa jawi, oj ek' yuj ja jun tajb'e b'a jujune syen oj stup yuj ja jastal ja sts'akoli.
33—Mi ma oj b'ob' yi'kan ja chante b'a leki, jaxa ke'n ja oj ya'ki b'a mi lekuki. Yuj k'a jach' oj ja k'u'lukex, mini jas oj ja b'ajukexa, ke'n oj ch'ak ki'kan schab'il, ja b'a lek sok b'a mi leki. Sok mixani oj b'ob' eluk a wujilexa.
34Ja' ab'al jumasa it ja a'jiyi ja Moises yuj ja Dyos b'a wits Sinai, ja'ni sb'aj ja israelenio jumasa.
Currently Selected:
Levitico 27: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
