Nahum 3
3
Jun ts'eb'oj sb'a cham winik
1Jach' wax yala ja jDyostiki:
—Jel ajujla ab'aj ja we'n,
sniwanil chonab' Asiria.
—Jel jitsan tey amok ja milwanum jumasa,
ja le'a ab'al sok ja elk'anuk jumasa
mini t'un wax chak yipe ja elk'anela.
2—Wanxax ab'xi jastal wa'ne mak'wanel
sok jastal wa'n b'ojtoljuk jan ja syanta ja skarro'e'i.
—Wanxax ab'xi jastal wa'n lib'iljuk jan ja kawu jumasa
sok ja spumuljel ja skarro'e jumasa b'a tiro'aneli.
3—Wanxta la tsatsuk jan ja kawu jumasa,
sok wanxta lijpel ja smachite sok ja spulte'e jumasa.
—Mi ajtab'enuk ja ma'tik oj yajb'uki
mi oj na'xuk jaye ja ma'tik oj chamuki.
—Ja sb'ak'tel ja cham winik jumasa, oj k'e monton,
—ti oj ek' smak' yoke sok ja kristyano jumasa.
4—Asiria, ja oj ek'uk a wuj ja iti
yuj ja lom jel a lo'la ja swinkil ja chonab' jumasa.
Ja swinkil ja niwak chonab' jumasa jel ok' sk'ujole
ja wa dyos jumasa sok ja wa brujo jumasa,
sok ochyeni lo'il a mokexa.
5—Jaxa ke'n mini lek wax kilawa,
oj ka libre ja swinkil ja niwak chonab' jumasa sok ja mandaranum jumasa
b'a oj yil'e ja jastal aya merani.
6Oj b'ats' a lek k'oyal,
oj ni k'ixwan leka.
7Spetsanil ja ma'tik oj yil'a
oj eluke najat ja b'a'ya ti oj yal'e'a:
—Swinkil Asiria ch'akta sna'jel.
¿Ay to ma ma' oj a'juk kulan sk'ujol yuj?
¿Ayto ma ma' oj talnajuk sya'ujlal yuj?
Ke'n sDyoson ja israelenio,
ja jas wax kala yujni jach' oj k'u'l merana.
8-10—Ninive, ja sniwanil ja wa chonab'ili ja Asiria,
ja we'n mi masuk lekuka yuj ja Tebasi.
Ja chonab' jawi, wax koltaji lek yuj ajyi ja niwan ja' Nilo.
Ja b'a'tik wa'n skoltajel ajyi
Etiopia, Egipto, Fut sok b'a Libia
jel wax a'jiyi'e ajyi ja yipe'i.
—Jaxa Tebasi, i'ji kani.
Ja cho yal yuntikile'i, jel ajula sb'aje
ch'ak pok'tsijuke b'a lu'um.
Ja ma'tik mas niwak ja ya'tele'i
wax yilawe sok swerte machun oj yi' yujile ja yal untik jawi,
jaxa ma'tik mas niwan ja ya'tel yujile'i, ti wax i'jiye
b'a jun niwan chonab' najat lek.
11—Cho jach'ni ja we'nlex Asiria,
ojxta kan b'ech'eljananik
jastal ja yakb'umi.
Oj ja le' smodo'il jastal oj ja nak'a b'aj yuj wa kontra jumasa,
mini oj ja ta b'a oj ja nak' a b'aja.
12Ja wa ts'akab' ton jumasa oj ch'ak mok'uk';
lajan sok jastal ja igo
ja yajni jel xa tak'an ja sati,
ta ay k'a ma wax nikji yuji,
wax ch'ak mok' b'a lu'um ja sata
ti wax lo'ji yuj ja kristyano jumasa'a.
13—Ja wa niwak pwerta jumasa ch'akta tsikuk,
ja'xa wa kontra jumasa ojxa ochuke altiro;
ja'yuj ja wa soldado jumasa jel oj xiwuke.
14A'nima jel jitsan nolan a wuj ja ja'
b'a oj k'u'l ganar ja tiro'aneli,
mini jas oj makunuk a wuj altiro'a.
A'nima xa k'u'lan jitsan lagriyo jumasa
b'a oj jwa sta' yip ja wa ts'akab' ton jumasa,
15B'alk'ak' oj chaman
sok xe'ntiyaman oj kanan yuj ja tiro'aneli;
ja kontra'ali, oj sch'ak a
jastal jun yal k'ujlub'.
Mi jas oj makunuk altiro
ja yip ja wa soldado sok yuj ja jel jitsan ja wa moj soldado'ili.
16-17—Jel jitsan ja wa b'olmalanum jumasa sok ja ma'tik mas niwak ja ya'tele'i
jach' jel jitsane jastal ja k'anal b'a satk'inali,
—Jaxa yajnix waj yil'e ja wokoli
oj spak'e' ajnel jastal yal k'ujlub' jumasa.
Jpetsaniltik wax na'atik jastal ja yal chante jumasa jawi:
yajni wax jelwi ja yal sts'umile'i, wax jupiye;
b'a jun sk'ak'u'il che'e' wax k'otye tek'an b'a wa sk'ixnan sb'aje;
jaxa yajni wax k'ixnaji ja k'ak'u
wax jujpiye ele ti wax ch'aye'a.
18-19—Mandaranum b'a Asiria,
jel jitsan ja niwak chonab' wa' yi' wokol ja swinkili.
Jaxa ya'ni oj ch'ak chamuke
ja ma'tik mas niwak ja ya'tel yuj ja soldado sok ja ma'tik mas niwak ja ya'tel a wuji.
Ja wa soldado jumasa ti ch'ayel oj ajyuke ek' b'a yoj wits,
sok mixani ma oj tsomjuke yuj ja.
Jaxa we'n yajb'elaxa oj ni chamana,
sok mixani ma' oj ya tojb'ana.
Spetsanile ja ma oj yab' ja lo'il iti
oj spak'tsuk ja sk'ab'e yuj ja sgusto'e'i.
Currently Selected:
Nahum 3: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
