Nahum 1
1
Ja jas alji yab' ja swinkil ja chonab' Ninive, ja sniwanil ja schonab'ili, ja Asiria
1Ja ke'n Nahum jb'i'il ti kulanon b'a Elcos. B'a jun jwayich ti sk'umanon ja Dyosi, yala kab' yuj ja jastal ay ja swinkil ja chonab' Ninive, sok ja'ni ja lo'il it ts'ijb'a yi b'a mi slekiluk ja swinkil ja chonab'i:
2Ja Dyos kujtiki, wa sk'ana
toj oj ajyukotik sok.
Yajni wax tajki, ay jas wax kan b'uk'an yuj
b'a oj ya stup ja kontra jumasa sok ja ma mix ilji yuj leki.
3Ja Dyos kujtiki, jel ja yipi
sok wanix ya stup ja smul ja ma' sb'ej ni oj ya stupi,
cho jach'ni jun Dyos jel ja spasensia,
sok mix tajki wego.
Ja Dyos kujtiki, ti wax b'eyi b'a yojol ja tsatsal wokoli;
ja ason jumasa ja sts'ub'il ja lu'um it wax k'e'i.
4Ta yuj k'a wax ya' tek'an ja ja' b'a mar sok ja niwan ja' jumasa
ja it jumasa takin wax kanye
sok wax takji ja nichim jumasa b'a Libano,
ja wits jumasa sb'a Basan sok ja wits Carmelo.
5Ja b'a sti' sat ja Dyos kujtiki
oj k'itk'unuk ja lu'um sok ja swinkil jumasa,
jach'ni ja wits jumasa sok ja yax k'ul jumasa tsats lek oj nijkuk.
6Yaj ni wax tajki, ja Dyos kujtiki,
ts'ub' lu'um wax ya wajuk ja ton jumasa,
jach' jastal wa spojo ja chawuki;
yajni wax tajki ja Dyos kujtiki,
mi ma oj b'ob' tek'anuk toj.
7Ja Dyos kujtiki jel ja syajal sk'ujoli
sok was talna ja ma'tik wax k'u'aji yuji.
Ja yajni ay wokoli,
ja ye'n wanix koltani'a.
8Cho jach'ni sch'aya yi sna'jel ja skontra jumasa;
jach' wa skicha ek' jastal ja b'ut' ja'i,
—Was nocho asta man b'a yoj k'ik'inal.
9-11Ja we'nlex swinkil ja chonab' Ninive,
¿Jas lom waxa lajawex oj ja k'u'lukex jastik jumasa b'a mi lekuki?
Ay ma' tey a mokex june ja ma' wax ya'wi'ex rason b'a mi lekuki,
wa'n schapjel jastik mi lekuk b'a oj sk'u'lyi ja Dyos kujtiki,
jaxa Dyosi, oj ni sch'ak a na'jelex ja we'nlexa;
oj sch'ak a na'jelex,
sok mixani ojto ya'wi'ex otro tiempo'a;
oj slap a k'ajk'alex jastal ts'i'lel,
ma jastal jun monton k'i'ix.
Ja jas alji yab' ja schonab'il ja Dyosi
12-14Ja Dyos kujtiki, jach' yaloj jastal iti:
—Ja Asiria jun chonab' jel jitsan ja swinkili,
jaxa ke'n oj ni jch'aj sna'jele'a.
Oj ch'ak sna'jel ja snajtsil stsomjele'i,
ja sk'u'lub'al dyose jumasa sok ja retrato'il ja sdyose'i,
sok spetsanil oj ch'ak sch'ay sk'ujole ja jawi.
Ja sniwanil ja schonab'ile'i, oj kan jipan,
kechan altiro ja wa'ne smajlajel mi lek oj kil'e'.
—Chonab' Juda, a'nima
jel ka'a wi'ex wokol ja mas b'ajtani,
ja ya'n mixa oj ka'a wi'ex wokol mas.
B'ato oj k'u'luk a wi'ex jachuka ojxa ka' elanik libre
mixani oj ochanik moso'il pilan majke'a.
15Chonab' Juda:
—Ti'xa jakume b'a yoj wits
ja ma'tik yi'oje jan ja yajk'achil tsamal lo'ili
—Tiempo xa oj ja k'u'lukex jun k'in
sok k'u'lanik xa smeranil ja jas a walunejexi.
Ja ke'ni, ojni jch'ay sna'jel ja tantik ma' jel kistal jastale'i,
sok mixani nunka ojto cho kil'ex kontra'a.
Currently Selected:
Nahum 1: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
