Miqueas 7
7
Ja scham k'ujol ja aluman Dyosi
1Ja ke'n Miqueason jel ajulaj b'aj,
wax k'ana oj ka laman ja jastal jel xk'ana jas oj kab'i.
Wa'non sle'jel ts'usub' ma igo,
jasa mi jas xta'a altiro b'a oj kab'i;
ch'akta stul'e spetsanil.
2Mixa ayuk ja b'a lu'um it
kristyano b'a lek b'a was k'u'an ja Dyosi;
ye'nxta was k'u'lan sb'aje ja b'a mi lekuki.
Kechan was majlaye ja tiempo
b'a ye'nta wa smila sb'aje'.
3Ja mandaranum jumasa sok ja jwes jumasa
was k'anawe t'ilan tak'in b'a was koltaye ja ma jel jas tak'ini.
Ja ma'tik jel niwan ja ya'tele'i wax yalawe ja jas was k'ana oj yal'e'i
sok was k'u'lane ja b'a mi sb'ejuki.
—Jel sna'awe b'a sk'ulajel ja b'a mi lekuki.
4—Ja b'a mas lek sok ja ma jun sk'ujol ja b'a ye'nle'i
masto jel kistal yuj jastal jun ib'e k'i'ix.
Wanxa mojxel ja k'ak'u
b'a oj a'juk stup'e' yuj ja Dyosi,
jach' jastal yalawe ja aluman Dyos jumasa.
—Ja k'ak'u jawi mi oj sna' jas oj sk'u'luke.
5-6Ja'yuj mok ma'a niwan k'ujoluk
mok cho a k'u'ukex ja ma pilan jas oj yala wabyexi.
A'a tixa talnab'ajex sok ja jas wax yalawe'i,
ja yuntikile ak'ix winiki
mis kisawe jas nan state'i,
ja alib'al jumasa wax yilawe kontra ja yalib'e ixuki,
jaxa jkontratik jumasa
tey b'a yoj najtik.
—Ja'yuj mok ma a niwan k'ujolukex,
mini ja mero wa che'umi.
7Ja b'a lado ke'ni,
ja wax niwan k'ujolan ja Dyosi.
Ye'n was koltayon,
sok wax na'a was maklayon.
Ja Dyosi oj skoltaj ja schonab'ili
8Jaxa israelenio jumasa ti yalawe'a:
—Swinkil Babilonia, we'na ja kontra'extikoni,
mok jel gusto ajyanik ja waxa wilawex ti aytikon b'a jun niwan wokoli.
K'u'lajitikonta ganar,
ojto cho jtul b'ajtikon;
ja juts'in ti aytikon b'a jun niwan ab'al k'umal,
jaxa ja Dyos b'a Israel oj skoltayotikon.
9—Merani'a jle'ani jmultik sok ja Dyosi;
ja'yuj laj kuch'tik ja wokoli.
Ojni k'ot jun k'ak'u oj sk'elojtik,
ti oj stojotik ja ora jawi
sok oj ya ajyukotik gusto sok jas koltaneli.
10—Swinkil Babilonia, we'nlex ja mi lek wax kilawextikoni,
waxa job'oki'tikon b'aj ja Dyos kujtikoni;
—Ja yan jel k'ixwela ab'aj oj kanan
ja yaj ni oj ja wil ja jas oj sk'u'luk yuj ja ke'ntikoni.
—Jel gusto oj ajyukotikon ja yaj ni oj kiltikon
oj b'at'jan jastal lokok ja b'a kaye jumasa.
11—Jerusalen,
jelxa mojan ja k'ak'u
ja wa cha'anil ts'akab' ton jumasa oj tojb'uk pilan majke
jaxa wa chonab'ili oj poxuk.
12Jelxa mojan ja k'ak'u
b'a oj jak ulatajanik
chonab' jumasa b'a spetsanil lado:
oj jakuke b'a Asiria sok b'a Egipto,
b'a niwan ja' Nilo sok b'a niwan ja' Eufrates,
b'a jun mar sok b'a otro mar,
b'a jun yaxk'ul sok b'a otro yaxk'ul;
13yuj ja jas niwan chonab'ile ja chonab' jumasa jawi
oj kan jastal jun takin lu'um k'inal
yuj ja smule jas winikil jumasa.
Ja sk'umajel ja Dyos yuj jas koltajel ja chonab'il jumasa
14—Dyos kujtikon,
talna ja wa chonab'ili;
talna ja nole wa chej jumasa it a b'aj we'ni.
A'nima ti ayotikon b'a jun lu'um b'a jel wax ya'a ja sb'a'ali
jasa lajanotikon jastal ch'ayel chej b'a yoj k'ul.
We'na oj ja talnayotikoni,
la' la koltayotikon
ja jastal a k'u'lan ja tiempo jumasa b'a ek'ta.
A ki'tikon ja wa'eltikon b'a mas lek
yuj ja b'a wa sk'apa ki'tikon ja lugar jumasa
b'a Basan sok b'a Galaadi.
15—Je'a ki'tikon ja jastal jel niwan jas waxa k'u'lani,
ja jastal wa elkotikon b'a Egipto.
16—K'u'lan yi ja chonab' jumasa b'a jel ja yipe'i
b'a oj yil'e' sok b'a jel cham k'ujol oj kanuke.
—K'u'lan ja jastal jel ch'ay k'ujol was k'u'lane'i
mi oj sna' jas oj sk'u'luke sok mi oj sna' jas oj yal'e'.
17—Dyos kujtikon,
—Ala yabye t'ilan ja chonab' jumasa jawi
ke'as kich sb'aje b'a lu'um,
ja jastal was k'u'lane ja b'its'il chan jumasa.
—Ala yabye t'ilan ja chonab' jumasa jawi
ke'a eluke ja b'a was koltan sb'aje'i,
b'a jachuk jel oj xiwuke
jachuk oj ch'in b'uke ja b'a sti'a sati.
18—Me'y pilan Dyos ja jastal ja we'ni.
Jel t'usanotikon ja b'a kantikon sak'ani.
Ja we'ni waxa ch'aya sna'jel ja kistal liltikoni
sok waxa ch'aya ja multikoni.
Jel niwan jas yajal ja wa k'ujol sok ja ke'ntikoni
ja wa koraja mini b'a spetsanil tiempo uka.
19—Cho talna jya'ulaltikon ja ke'ntikoni,
jipa ko spetsanil ja jmultikon jumasa
b'a mas cha'an ja mari.
20A ajyukotikon sok lek jas yajal ja wa k'ujoli sok ja jastal jel leka,
yuj ja jach'ni awal yab'
ja Abraham, sok ja Jacobi,
sok spetsanil ja ma ek' paxta kujtikoni.
Currently Selected:
Miqueas 7: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
