Miqueas 5
5
Jel niwan oj iljuk ja ch'in chonab' Beleni
1Ja ke'n Miqueas jb'i'il jach' wax kala jastal iti:
—Jerusalen, Jerusalen,
chapa a b'aj ja b'a tiro'aneli.
Yuj ja wa kontra jumasa
ja Dyosi, jel tsats oj ya' stup ja smul
ja smandaranum ja israelenio.
2—Jaxa we'n chonab' Belen Efrata,
yuj ja swinkil jumasa ja chonab' b'a Juda
jun yal ch'in chonab' altiro wax yilawa,
oj ni k'ot jun k'ak'u jel niwan oj iljan.
Ja b'a'ya ti oj manxuk jun mandaranum
ja snan stati, najate lek ti aye'a,
ye'nani oj sk'ul mandar ja chonab' Juda.
3—Ja Dyosi, oj ya'wotikan jtuch'iltik
asta man oj manxuk ja mandaranum jawi.
Mas tsa'an yaj ni oj manxuki
ja ma'tikto kanel sak'ani
oj stsom sb'aje sok ja tuk israelenio jumasa.
4Jaxa spetsanil ja yip yi'oj ja Dyosi
oj ya'yi ja mandaranum jaw
b'a oj sje'yi jas oj sk'u'luk ja yuntikili
sok b'a jach' cho laman oj ya ajyuk.
B'a man tik'an oj sk'u'l mandar ja mandaranum jawi
asta man b'a tik'an ja lu'um k'inali.
5-6—Yaj nix waj jakuke ja swinkil ja chonab' asiria
b'a oj yi'e kan ja sniwanil ja jchonab'iltiki
sok oj sk'an oj ochuke ja b'a niwak na'its jumasa ki'ojtiki,
ye'n ja mandaranum jaw ja oj ya'wotik libre
cho laman oj ya' ajyukotik.
Oj yal oj nol k'ab'ijuke yuj
juke ja ma' mas niwak ja ya'tele sok waxake kapitan jumasa.
—Jach' oj ki'tik kan jastal jaw
ja sniwanil ja chonab' asiria sok ja slujmal ja chonab' Nimrodi.
Ja judio jumasa ti oj ajyuke sok ja swinkil ja tuk niwak chonab' jumasa
7-8—Jaxa ma'tik oj kankotik sak'ani
ja b'a yojol ja swinkil ja niwak chonab' jumasa,
jach' oj ajyukotik jastal ja awasero wax ya jakuk ja Dyosi:
ti wax jak b'a satk'inal sok wanix ya po'xuk ja k'ula
mi oj smajla ta lek ma mi lekuk oj yil ja winiki.
Jach' oj cho ajyukotik jastal ja choj jumasa:
kwando ti' aye b'a snalan jun nole cheji,
wa syamawe ja chej jumasa xe'ntiyaman wax ya'we wajuk,
sok mini modo wax ya'we wajuka.
9—Jaxa we'n Dyos kuj, oj ni a nol k'ab'uk ja wa kontra jumasa'a
sok oj ni a ch'ak sna'jela—
Oj ch'ak sna'jel
10Ja Dyosi, ti yal yab' ja chonab'ili:
—Yaj nix k'ot ja k'ak'u jawi,
oj ch'ak jmil spetsanil ja wa kawu jumasa
cho oj ni ch'ay sna'jel ja wa karro jumasa b'a tiro'aneli.
11Oj cho ch'ay sna'jel ja wa chonab' jumasa
oj ch'ak jemko ja wa cha'anil ts'akab' ton jumasa.
12Oj ka k'ot tek'an ja wa brujo jumasa
oj ch'ak sna'jel spetsanil ja wa k'intanum jumasa.
13Oj ch'ay sna'jel ja wa dyos k'u'lub'ali sok ja sretrato'il jumasa,
mixani nunka oj ja toy pilan majke'a
ja dyos jumasa we'n mismo a k'uluneji.
14—Ke'n oj ch'ay sna'jel ja wa chonab'il jumasa
sok ja sretrato'il ja Astarte
15—Ke'n oj ka stup'e' sok spetsanil ja koraja
ja swinkil ja niwak chonab' jumasa ma' mi sk'u'ane ja kab'ali.
Currently Selected:
Miqueas 5: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
