Miqueas 3
3
Ja mandaranum jumasa ja ma'tik mi lekuk jastale'i
1-3—Maklayik lek,
ja we'nlex ma'tik mas niwak ya'tel,
mandaranum jumasa yuj ja israelenio.
—Ja we'nlexi sb'ejni naka toj ja jas oj ja k'u'lukexi,
jaxa we'nlexi spakaxil waxa k'u'lanex.
Jel lek waxa wabyex ja waxa k'u'lanex ja b'a mi lekuki,
yuj ja ja' oj ja k'ulukex ja b'a leki.
Jel waxa wixtala'anex ja chonab'ili;
lajan sok sak'an wa'nex k'uxjel ko'e.
4—Ja'yuj ja kwando waxa k'umanonexi,
ja ke'n, mi jas wax kala wabyex altiro.
Jel niwan ja jas malo waxa k'u'lanexi
ja'yuj oj jip'ex kan jun lado.
Ja ma' wax yala aluman Dyosi jaxa jas wax yala toj le'uj ab'al
5Ja aluman Dyos jumasa ma wa slo'la ja chonab'ili, ja Dyosi, jach' yalunej jastal iti:
—Ja we'nlexi, kechan waxa ta'awex ti' ja laman oj ajyuke
ja ma'tik wax ya wa'aniki,
jaxa ma' mix ya'a jas oj ja wabyexi
waxa xiwtayex waxa walwex yab' oj tiro'ananik sok ja ye'nle'i.
6Ja'yuj mi oj kal a wabyex
ja jas wa'non pensar oj k'u'luki.
Mixani nunka ayto jas oj kal a wabyexa
sok mixa jas oj b'ob' a wal'ex ay jas oj ek'uk ja mas tsa'ani.
7Ja aluman Dyos jumasa jaw sok ja k'intanum jumasa
jomel olom oj kanuke.
Mixa jas oj sta' oj yal'e altiro,
yuj ja mixa jas oj kal yabye'i.
8Jaxa ke'ni, Miqueason, tey jmok ja yespiritu ja Dyosi. Ja'yuj wanix b'ob' kal ja smeranil ja jDyostiki, jun Dyos jel toj. Cho wanix b'ob' jtayi smule ja israelenio jumasa yuj ja lom jel wa sle'a ja smule'i sok mini t'un sk'u'anone'a.
Ja jastal k'u'laji ganar ja swinkil ja Jerusaleni
9Ja Dyosi, ti yala'a:
—Maklayik lek ja jas oj kal a wabyex ja we'nlex,
ma'tik mas niwak ya'tel,
mandaranum jumasa yuj ja israelenio.
Ja we'nlexi mixa k'anawex ja rason b'a toji,
sok mini jun mandar wax a kis'exa.
10Ja b'a chonab' Jerusalen sok ja b'a jnaji
ja milwanum jumasa sok ja ma'tik ja sgusto sk'uljel ja jas mi lekuki
yujni kada k'ak'u ja sgusto'e sk'u'lajela.
11Ja pagre jumasa ja aluman sok ja jwes jumasa
wa sje'awe, wax yalawe ja yab'al ja Dyosi,
wanix cho ya'we stup ja ma' wa sk'u'lan malo.
Kechan b'a oj sta' ja stak'ine'i.
—Jachuk wantox b'ob' yal'e jastal iti:
Mini t'un jas wala xiwtikon yuja.
—Yuj ja tey jmoktikon ja Dyosi.
12—Yuj a mul we'nlex
ja'yuj ja jnaji oj jemjuk ko'e.
—Por yuj a mul we'nlex
ja'yuj ja chonab' Jerusaleni oj kan jipan,
jaxa swits ja Dyos b'a Sioni
oj potsjuk el yuj ja k'i'ixi.
Currently Selected:
Miqueas 3: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
