Mateo 7

Mok a wocheluk ja tuk jumasa

(Lc 6:37-38,41-42)

1—Mok a k'el'ex ja jas mi lek wa sk'u'lan ja tuk jumasa, b'a jach' mi jas oj sk'u'luk a wi'ex ja Dyos ja we'nlexi. 2Jel k'a tsats waxa k'elawex ja jas mi lek wa sk'u'lan ja tuk jumasa, cho jach' tsats oj ya'wi'ex ja Dyos ja we'nlexi, ja ye'n jach' oj sk'u'luk ja jastal oj ja k'u'lukex yi ja we'nlex ja tuk jumasa.

3—¿Jas lom ja waxa k'ela ja jas mi lek wa'n sk'u'lajel ja tuk jumasa, jas mi ja'xa k'ela ja jas jel jitsan ja jas mi lek waxa k'u'lan ja we'n b'a? Lajan sok jastal waxa k'ela yi jun yal ts'i'lel b'a sat wa moji, mix jak a k'ujol ta jun niwan k'ab' te' tey b'a yoj wa sat we'ni. 4¿Jastal lek pilan ma' waxa wal yab' majla oj ka eluk ja yal ts'i'lel tey b'a yoj wa sati, jaxa b'a wa b'aj we'n jun niwan k'ab' te' tey ta? 5—Mini jun sb'ej aya'a— A el b'ajtan ja k'ab' te' tey b'a yoj wa sat we'n, b'a jachuk oj b'ob' a wil lek ja yal sts'i'lel b'a sat wa moji.

6—Mok a wa'wex yi ja ts'i',#7:6 Ja ts'i' jumasa, sok ja chitami: Mi yuj chante'uk meran, ja wa sk'ana yal ja ma' mi judio'uki. ja kosa jumasa sb'a Dyosi, mok a jip'ex yi ja chitam jumasa ja jas niwan waxa wilawex ja we'nlexi. Ja chitam jumasa mi yuj oj sna'e syajtajel, jach'ni ja tantik ts'i' jumasa oj b'ob' sk'ux'ex.

K'ana, le'a, cho k'ojtsin

(Lc 11:9-13; 6:31)

7—K'anawik yi ja Dyos ja jas waxa k'anawexi, ja ye'n ojni ya'wi'exa. K'umanik ja Dyosi, oj ja ta'ex ja jas wa'nex sle'jeli. K'ojtsinik ja pwerta ja ye'n oj smaklayex. 8Yuj ja ma' wa sk'u'an ja Dyosi, wax a'ji yi ja jas wa sk'ana, wa sta'a ja jas wa sle'a, ta wa sk'ojtsin oj maklajuk.

9—Ay k'a ma' wax k'anji yi waj yuj ja yuntikili, mi oj ya'yi jun ton. 10Yuj k'a jun chay wa sk'ana, mi oj ja wa'yi jun b'its'il chan.

11—Ja we'nlexi, mi lekuk wa modoexi, waxa na'awex ja jas lek oj ja wa'wex yi wa wuntikilexi, ja'uktoma wa Tatex Dyos tey b'a satk'inal mi oj ya'yi ja jastik lek ja ma' wax k'anji yi yuji.

12—Ja ma' waxa k'ana oj yil'ex lek ja we'nlexi, ilawik lek ja we'nlexi, yujni jach' wa sje'aki'tik ja b'a ts'ijb'anub'al ja yab'al ja Dyosi.

Ja ch'in b'eji

(Lc 13:24)

13—Ja b'ej b'a jch'ayelaltiki,#7:13 Ja b'ej b'a jch'ayelaltiki: Ja b'a oj jta'tik jun wokol b'a mini nunka oj ch'akuki. mi wokoluk snochjel, yujni jel niwan ja b'ej jawa. —Cho jel jitsan ja kristyano ma' wa'n wajel ja tiwi—. 14Jaxa b'a oj ya jta' jsak'aniltiki, jel wokol snochjel, yuj ja b'ej jawi jel ch'in. Ja'yuj jel t'usan ja ma wa sta'a ja b'ej jawi.

Ja te' sok ja sati

(Lc 6:43-44)

15—Talna b'ajik sok ja ma' wa stoyo sb'aj yuj aluman Dyos b'i, wax yalawe ja wa'ne ek sta'jel ti' ja jas wax yala ja Dyosi— Ja b'a sti' wa satexi, wa sje'a sb'aje jel toje jastal jun yal chej, ja smeranili, jel xiwela sb'aje jastal jun tan ok'il. 16Wego oj ja na'ex sb'aje ja we'nlexi, yuj ja jas wa sk'u'lane'i, mini t'un lekuka. Jachuke jastal ja k'i'ix kechan oj syajb'esa. 17-18Ja lekil te'i, jach'ni ja sati cho lekni'a, jaxa te' b'a mi lekuki, cho jach'ni ja sati mini lekuka. 19Ja te' b'a mix satini leki, wax k'utsxi sok wax tsikxi ele. 20Jachuk wego oj ja na'ex sb'aj ja tantik le'a ab'al jumasa jawi, yuj ja jas wa sk'u'lane'i, mini t'un lekuka.

—Talna a b'aj—

(Lc 13:25-27)

21—Ja ma'tik wax yala: Kajwal, Kajwal, mi oj ochuke spetsanil ja b'a wa sk'ulan mandar ja Dyosi. Sok ja jawi mi malanuk; jel t'ilan oj ja k'u'ukex b'ajtan ja jastik wax yala ja jtat it tey b'a satk'inali. 22Yajnix k'ot ja k'ak'u oj ch'ak sk'el ja Dyos spetsanil ja smul ja kristyano b'a lu'um iti, jel jitsan ja ma' oj yal kab'i: —Kajwal, Kajwal ja ke'ntikoni, jlo'iltatikon yab' ja tuk kristyano jumasa wa wab'ali. Cho kechan ja jta'atikon ti' wa b'i'ili, ch'ak jnutstikon ja tan pukuji, cho jk'u'lantikon jitsan milagro yuj ja wa b'i'ili. 23Jaxa ke'n ti oj kal yabye'a: —Elanik b'a jts'e'eli, kechan ja wajel a k'ujolex ja smalo'il wa k'ujolexi. Ja ke'n mi jas wax na'a yuj ja we'nlexi—

Chab' k'ole kristyano

(Mr 1:22; Lc 6:47-49)

24—Ja ma' wa smaklan ja jas wax je'a, sok wa sk'u'lan ja jas wax kala, ja' lajan sok ja winik it jel sna'a b'a oj sk'u'luk ja snaji, ti sk'u'lan b'a yoj ton, tsats lek ya' kani sta'a lek yip. 25Yajni jak ja ja'i, jak ja tsatsal b'ut' ja'i, cho jak ja tsatsal ik'i, tsats lek k'ot pak'an sb'aj ja na'its jawi. Mi mok' ja na'its yuj ja ts'unan leki.

26—Jaxa ma' wa smaklan ja jas wax je'a sok mi sk'u'lan ja jas wax kala, lajan sok jastal jun winik b'a mi chink'inaluk ay, mi sna'a b'a oj sk'u'luk ja snaji, ti sk'u'lan yoj jijkab'. 27Yajni jak ja ja'i, jak ja tsatsal b'ut' ja'i, cho jak ja tsatsal ik'i, tsats lek spak'tsun sb'aj ja b'a na'itsi. Jaxa na'its jawi, juts'in ch'ak mok'uk—.

28Yajni ch'ak k'umanuk ja Jesusi, spetsanil ja ma'tik ch'ak smaklaye ja jas yala, jel cham sk'ujole yuj ja jastal wa sje'a ja yab'al ja Dyosi, 29yuj ja tsats lek wax yala ja ye'n, mini t'un oj slaj ja jastal ja ma'tik wa sje'a ja mandar it a'ji yi ja Moisesi.

Currently Selected:

Mateo 7: YABD

Highlight

Copy

Compare