Mateo 6

Oj a'xuk ja limosna

1Ja we'nlex ja yajni ay jas lek waxa k'u'lanexi, mok chikanxta b'a a wal'ex ek'a; ta yuj k'a jach' waxa k'u'lanexi, ja wa tatex tey b'a satk'inali, mini jas oj ya'wi'exa.

2—Ja we'nlexi, ta ay k'a ma' wa skolta a wujilex ja ma ajula sb'aji, mok a wal'ex b'a snajtsil ja tsomjeli, cho mini b'a niwak b'ej b'a wax ek' ja kristyano jumasa; ja jastal jawi, jach'ni wa sk'u'lan ja ma' toj chab' k'ujol ay tak, yujni kechan wa'ne sle'jel jastal oj toy juke yuj ja kristyano'a. Jaxa we'nlexi, oj kal a wabyex ja smeranili, ja jastal jawi, yujni kechan ja a ts'akol ja we'nlexa.

3—Ja we'nlexi, ay k'a ma' oj skolta a wujilex ja ma' jel ajula sb'aji, mok ma' a wal'ex yab'i. 4B'a jach' mi ma' oj sna ja koltanel jawi, jaxa Dyos Tatali, wa sna'a lek ja koltanel it mi ma' wa sna'a, ye'nani oj ya'wi'ex wa ts'akolexa.

Ja Jesusi, sje'a sk'umajel Dyos

(Lc 11:2-4)

5—Ja we'nlex ja yajni oj ja k'umukex ja Dyosi, mok a k'u'lukex ja jastale ja ma' mi stojoluk ja jastal wa sk'u'lane'i. Ja ye'nle'i, ja jel gusto wax yabye ja yajni ti wax iljiye yuj ja kristyano ja wa'ne sk'umajel ja Dyosi. Ja'yuj tek'an wa sk'umane ja Dyos b'a snajtsil ja tsomjel sok ja b'a niwak b'ej b'a wax ek' ja kristyano jumasa. Ja ye'nle'i, wa sna'awe lek yujni mey pilan jastal oj sta' ja skoltajele'a.

6—Jaxa we'nlexi, ay k'a ma' oj sk'umuk a wujilex ja Dyosi, k'u'lanik a tuch'ilex. Ochanik b'a yoj na'its lutu a b'ajik, ti'xa k'uman ch'ab'an ti' ab'al tiw ja Dyos wa Tati, ja ye'n ojni ya' ja jas ch'ab'an ti ab'al wax k'anxiyi'a.

7—Ja we'nlex ja yajni oj ja k'umukex ja Dyosi, mok junxta ja jas oj ja wal'ex jastal wa sk'u'lan ja ma' mi wa sk'u'an meran ja Dyosi. Ja ye'nle'i, wax ek' sk'ujole yuj jel wax kisjiye yuj ja Dyos yuj ja jel ja jas wax yalawe'i. 8Ja jastal jawi, mok a k'u'luk ja we'nlexi, yuj ja Dyos jTatiki, wa sna'a ja jas mey a wi'ojexi, a'nima mitoxa k'anawex yi'.

9—Ja we'nlexi, jach' oj ja k'umukex jastal it ja Dyosi:

Tatal Dyos

ti aya b'a satk'inal:

A sna'e a b'aj yuj

kechan we'n Dyos merana.

10La', kechan we'n jmandaranumatikon,

spetsanil ja ma' tey b'a lu'umi oj sk'u'uka,

jach' jastal wala k'u'aji yuj ja ma' tey b'a satk'inali.

11A'ki'tikon ja jwa'eltikon b'a ya'n k'ak'u.

12Mok wa jtuptikon ja jas mi lek wax k'u'lantikoni,

jach'ni ja ke'ntikoni mix ka'tikon stup

ja ma' mi lek ja jas wa sk'u'lanki'tikoni.

13Jaxa yajnix jak ja wokol jumasa

Mok wa spil'otikon a mok ja we'n,

koltayotikon ja b'a wokol wax ya'a tan pukuji.

14—Ja we'nlexi, yuj k'a mixa wa'wex stup ja smul ja ma' mi lek ja jas wa sk'u'lan a wi'exi, ja Dyos wa Tatex tey b'a satk'inali, mi oj ya'a tup wa mul we'nlexi. 15Kechan ta mi k'ax b'ob' a wujilex ja mi oj ja wa'wex stup ja smul ja tuk jumasa, jach'ni ja we'nlexi, ojni cho ya'a tup wa mul we'nlex wa Tatexi.

Ja skomjel wa'eli

16—Ja we'nlex ja yajni oj ja kom wa wa'elexi, mi lomxa je'awex ke yuj cham k'ujol ayex jastal wa sk'u'lane ja ma' mi toj ayuke'i. Ja ye'nle'i, ja jel sgusto wax yabye ja wa sna'a ja kristyano yuj ja wa'ne skomjel ja swa'ele'i. Ja smeranili wax kala wabyex yujni kechan ja sts'akol oj sta'e ja jawa. 17Ja we'nlex ja yajni oj ja kom wa wa'elexi, jixa lek wa olomexi, sak'a lek wa satexi, 18b'a jach' mi oj sna' k'inal ja kristyano ta yuj wa'nex skomjel wa wa'elexi. Kechan ye'n ja Dyos wa Tatex wax ch'ak sna' spetsanil ja jas mix na'xi, wani sna'a ja wa'nex skomjel wa wa'elexi, cho ojni ya' wa ts'akolexa.

Ja jastik smeranili

(Lc 12:33-34)

19—Mok a le' jastal jel oj ajyuk ja jas a b'aj ja b'a lu'um iti. Ja jaw jumasa wanix joma, ma ja' wa sch'aka el ja xoji. Mi kechanuka, ja elk'anumi oj b'ob' och yelk'an. 20Jel lek ja'xa le'a jastal jel oj ajyuk wa jas a b'aj b'a satk'inali. Ja tiwi mi jas wax jomi, sok mi xojb'i. Cho mini ja elk'anumi mix och b'a oj yelk'ane. 21Na'awik ja mero slekili, ja oja k'u'ukonex sok spetsanil a k'ujolex.

22-23—Ja jsatiki, ja wax ya' ijlab'anuk ja jastalotiki. Ja'yuj, ja syajal wa k'ujoli, ma ja jastal mi lekuka, ti wax ijlab'ani b'a wa sat.

Ja tak'ini

(Lc 16:13)

24—Mini jun ma' yib' k'ab'al ay oj b'ob' ya'telta chab' yajwal b'a jun ita k'ak'u, oj b'ob' sk'u'uk yi yab'al ja juni jaxa juni miyuk. Cho jachuk ja we'nlexi, mi oj b'ob' a wa'teltayex jun ita k'ak'u ja Dyos sok wa jastik a b'ajexi.

Cham k'ujol jumasa

(Lc 12:22-31)

25—Mok a pensarukex ja jas oj ja wabyexi, jasun oj ja wu'exi, sok jas a k'u'il oj ja lap'exi. Ja b'a sak'anili, mi kechan wa'el oj makunuk cho mini ja Dyosi mi stojb'es wa kwerpo'ex b'a kechan oj ja k'u'tesex.

26—K'elawilex ja yal chan jumasa wax jujpi b'a nalan cha'ani. Ja ye'nle'i mi jas wa sts'unuwe sok mix jach'ulaniye, mi snolo ja jas wax yabye'i. Jachuk, ja Dyos Tatal it tey b'a satk'inali, wax ch'ak ya'yi spetsanil ja jas wax yabye'i. —Ja'uktoma ja we'nlexi ojni ch'ak yawi'exa—.

27—¿Yuj a ma waxa walawex yuj ja cham k'ujolxta ayexi, ja'yuj ti oj najatb'uk jun k'ak'u wa sak'anilexi? 28K'elawilex ja yal nichim jumasa tey b'a witsi. Ja ye'nle'i, mix a'tijiye b'a oj stojb'es ja sk'u'e'i. 29Jachuk, ja smeranili, mini ja jastal ja sk'u' was lapa ja mandaranum Salomoni mi oj slaj ja jastal ja yelaw ye'nle'i. A'nima jeluk ja jastik sb'aj ja Salomoni.

30—Yuj k'a jel tsamal wa sk'u'lan ja yal nichim jumasa ja Dyosi, sok kechan t'usan k'ak'u ti wax ajyi'a, ¿Yuj a ma mi jeluk ja jas oj sk'u'l yuj ja we'nlex b'a? —Lajan sok wax kila mitoxa na'awex jastal oj ja wa' sniwanil a k'ujolex ja Dyosi—.

31—Mixax cham a k'ujolex yuj ja jas oj ja wabyexi, ja jas oj ja wu'exi, sok yuj wa k'u' oj a lap'exi. 32Kechan ja ma' mi sk'u'an ja Dyosi, wanix cham sk'ujol yuj ja jastik jumasa jawa. Ja we'nlexi, ja' a Tatex ja Dyos it tey b'a satk'inali, jaxa ye'n wax ch'ak sna' jasunk'a waxa k'anawexi.

33—Ja jel t'ilani, ja oj ja na'ex sb'aj ja Dyosi kechani ye'n mandaranuma, cho k'u'lanik ja jas wax yala wabyexi. Yajnix k'ot ja sk'ak'u'ili, ja Dyosi, ojni ya'wi'ex ja jas waxa k'anawexi. 34Ja'yuj mi lom xcham a k'ujolex yuj ja jas oj ek'uk ja jecheli. Ja jecheli, pilan jas oj cham jk'ujoltik, na'awik t'unuk b'a kada k'ak'u ayni jas jitsan mi lek yi'oj ja.

Currently Selected:

Mateo 6: YABD

Highlight

Copy

Compare