Mateo 5

Ja jastik leki

(Lc 6:20-23)

1Yajni yila jel jitsan ja kristyano ja Jesusi, ti k'e' b'a jun wits yajni kajpuji, ti och kulana.#5:1 Ja b'a stiempo ye'n ja Kajwaltik Jesusi: Jach'ni kulan yujile'a, wax och kulan ja ma' oj sje'i. Ti ochye mas mojan ja sneb'uman jumasa, 2ti och aljuk yabye yuj ja Jesusi:

3—Jel lek oj iljuk ja ma'tik kechan ja'

niwan sk'ujole ja Dyosi,

ja ye'nle'i, yujni ti aye b'a yib' sk'ab' ja Dyosi.

4Jel lek oj iljuke yuj ja Dyos ja ma' wax yi'aj wokoli,

yujni ye'n ja Dyos oj a'ji kulan sk'ujole'a.

5Jel lek oj iljuke yuj ja Dyos ja ma' jel ch'in wax ya'a sb'aji

yujni ye'n oj a'juk yi'e ja lu'um it sk'apunej ja Dyosi.

6Jel lek oj iljuke yuj ja Dyos ja ma' wa stsatsal k'ujolan sb'aj toj oj ajyuki,

yujni jach' wa sk'ana ja Dyosi.

7Jel lek oj iljuke yuj ja Dyos ja ma wa stalna sya'ujlal ja smoji,

yujni oj cho talnajuk sya'ujlal ja ye'nle yuj ja Dyosi.

8Jel lek oj iljuke yuj ja Dyos

ja ma'tik toj ay ja yaltsile'i,

ja ye'nle'i, ojni yil'e sat ja Dyosi.

9Jel lek oj iljuke yuj ja Dyos ja ma' wa sk'elawe

laman a ek' yuj ja swinkil ja b'a lu'um iti,

ja ye'nle'i, jach' oj iljuke jastal yuntikil ja Dyosi.

10Jel lek oj iljuke yuj ja Dyos ja ma' wax yi'aj wokol

yuj ja toj aye'i,

ja ye'nle'i, yujni ti aye b'a yib' sk'ab' ja Dyosi.

11-12—Ja we'nlexi, jel lek oj yil'ex ja Dyos ta yuj k'a jmul ke'n ja mila kisjiyexi, ma yuj wax le'ji a mulex lom. Mi lom xcham a k'ujolex. Tsamal ajyanik—. Yuj ja b'a satk'inali, jel niwan ja wa majtan oj a'juk a wi'exi. Jach' jastal ixta iljiye ja aluman Dyos jumasa ma'tik b'ajtane yuj ja we'nlexi.

Ja ats'am sok ja jas wax ijlab'ani

(Mr 9:50; Lc 14:34-35)

13—Ja we'nlexi, lajanex sok jastal ats'am it wax a'ji och b'a orno b'a juts'in wax ya k'ixnajuk. Kechan ta waj k'a ch'ayuk ja yip ja ats'am jawi, mixani ojto makunuka, ojxa b'ob' jipxuk ele a'nima ti sb'atala'an ja kristyano jumasa.#5:13 Ja ats'am ja najate', wax makuni b'a wax och xe'ntiyaman b'a yoj orno b'a wax ya' k'ixnajuk juts'in, wax cho b'ob' sokxuk sok k'oy chante b'a oj tsikxuk jastal si'. Wax cho makuni b'a yabono'il tek'ul jumasa.

14—Ja we'nlexi, lajanex sok jastal jun k'ak' wax ijlab'ani b'a spetsanil. Lajanex sok jastal jun chonab' b'a ti tojb'el b'a jun cha'anil wits, b'a jach' mini jun ma' mi oj b'ob' yila. 15Cho mi ma' oj ya' ajluk jun kandil, b'a ti' oj ya' och b'a yib'el jun kajon. Mini t'un jachukuk jastal jawa, Man wa sle'a jun lugar b'a mas cha'an b'a oj ya' kajan, b'a jach' oj b'ob' ya ijlab'anuk spetsanil ja ma' tey b'a yoj na'itsi. 16Jach'ni ja we'nlexi, ja wa modoexi jach' a' ajyuk jastal ja k'ak' wax ijlab'ani, cho a sje' jastal wax k'u'axi ja Dyosi. Ja jas lek oj ja k'u'lukexi, yajni oj yil ja tuk jumasa jel oj stoy'e ja Dyos wa tat we'nlex it tey b'a satk'inali.

Ja mandar sok ja aluman Dyos jumasa

17—Mok a wal'ex ta yuj jakyon b'a jak jch'ay ja yab'al ja Dyos it a'ji yi ja Moisesi, cho mi jak kale yuj mixa lekuk ja jas sje'awe ja aluman Dyos jumasa ja najate'. Miyuk, mi jachuk jastal jawi: Jakyon ja ke'n, ja jak je'awi'ex ja jastal sb'ej ja mandar jawi. 18Ja smeranili, wax kala wabyex, ja janek' mitox xch'ak ja satk'inal sok ja lu'umi, mi jas oj ch'ayuk ja b'a mandar it ajiyi ja Moises yuj ja Dyosi, man oj ch'ak k'ot smeranil. 19Ja'yuj, ay k'a jun ma' mi oj sk'u'uk ja jastik yalunej ja Dyosi a'nima kechan june ja b'a ch'in oj yili jach' jel ch'in oj iljuk ja ye'n ja b'a wa sk'ulan mandar ja Dyosi. Cho jach'ni oj ek' yuj ja ma' oj sje'yi ja smoj jumasa, ke a sk'u'uk ja yab'al ja Dyosi. Jaxa ma' oj sk'u'uk ja mandar jumasa iti, b'a oj cho sje'yi ja tuk jumasa ke aj sk'u'uke, jel niwan oj iljuk ja b'a wa sk'u'lan mandar ja Dyosi. 20Ja smeranili, oj kal a wabyex, yuj k'a mi oj ja tsatsal k'ujoluk ab'ajex oj a k'u'ukex tsats ja Dyos ja we'nlex yuj ja fariseo jumasa sok ja ma'tik wa sje'awe ja mandar it a'ji yi ja Moisesi, mini oj ochanik ja b'a wa sk'ulan mandar ja Dyosi.

Ja tajkeli

(Lc 12:57-59)

21—Na'awik t'unuk, man najate' yala ja Moises: Mok ma' milwananuk, ta ay k'a ma' oj milwanuki, ojni cho a'ji stupa. 22Jaxa ke'n oj kal a wabyex ja smeranili, chikan ma' oj tajkuk ja smoji, jach'ni ja ye'n mini oj cho iljuk leka. Chikan ma lom oj och yut ja smoji, ojni i'juk och b'a sti' sat ja ma' ay ya'teli. Jaxa ma' lom oj sta' ti' malo ja smoji, ti oj jipjuk b'a yoj k'ak' b'a jel ja wokoli.

23—Ja'yuj, yuj k'a oj ja wi'och wa limosna b'a altar b'a snajtsil ja tsomjel b'a oj ja wa' yi ja Dyosi, ti b'i jak a k'ujol ay ma' kechan a wab'al sok, 24jaxa limosna tixa wa'kan kajan b'a sat altar, ka'ax kax tojb'es ab'aj sok ja ma' kechan a wab'al soki, tsa'an tix jaka wa' yi wa limosna ja Dyosi.

25—Ay k'a ma' wa sle'a a mul ke ay jas mi lek a k'u'lunej, tojb'es ab'aj sok b'ajtan ja ma' ay a wi'oj sok ab'al k'umali, lek ja mitox k'ot b'a sk'ab' ja jwesi. Mik'a ja jwesi kechan oj yal yab' jun spolisia b'a oj waj slut a kani. 26Ja smeranili, wax kala wab'i, mi oj elan ja tiwi, ta mi k'ax ch'ak a tup spetsanil wa jeli.

Ja nupaneli

27—Ja Moisesi, cho yalani'a: Mok a wi'a ab'aj sok pilan ixuk ma pilan winik. 28Jaxa ke'n ja ya'n, wax kala wabyex ja smeranili, malan sok ta yuj k'a ay jun winik kechan wax yila jun ixuk, lajan sok wego oj yi' sb'aj sok, sta'atani smul ja b'a yaltsila.

29—Yuj k'a ja' wa sat ja wax ya'a le' a mul b'a mi oj ja k'u'uk ja Dyosi, a eluk jipa ele. Mas lek ja june'ita oj ch'ay sna'jel wa kwerpo yuj ja lom spetsanil wa kwerpo oj jipjuk b'a yoj k'ak' b'a jel ja wokoli. 30Yuj k'a ja stojol wa k'ab' wax ya'a le' wa muli, k'utsu jipa ele. Mas lek ja june'ita oj ch'ay sna'jel wa kwerpo yuj ja lom spetsanil wa kwerpo oj jipjuk b'a yoj k'ak' b'a jel ja wokoli.

Ja ma' nupanel wa spila sb'aji

(Mt 19:9; Mr 10:11-12; Lc 16:18)

31—Cho jach'ni, ja najate' yala ja Moisesi: Ta yuj k'a ay ma' mixa sk'ana ja tey sok ja sche'umi, a ya' yi jun ju'un b'a wax yala ti wa spila sb'aj soka. 32Jaxa ya'n, wax kala wabyex ja ke'n, kechan oj b'ob' spil sb'aj sok ja che'um ja winik ta yuj k'a wa'n yijel sb'aj sok tuk winik ma tuk ixuki, yuj k'a lom wa sjipa kani, ojni b'ob' sta' smul ja winika. Jaxa ixuk jawi, ta wan k'ax nupani sok pilan winik, schawanile ojni sta' smule ja b'a sti' sat ja Dyosi.

Ja jastik k'apub'ali

33—Ja k'ak'u jumasa jawi, cho sje'ani ja Moisesi: Mok a ta'ex ti' lom ja sb'i'il ja Dyos ta yuj k'a mi oj ja k'u'lukex meran ja jas oj ja wal'exi. 34Jaxa ya'n wax kala wabyex ja ke'n, yajni waxa walawex ay jas oj ja k'u'lukexi, mok jas a ta'ex ti'. Mok a ta'ex ti' ja satk'inali, yuj ja ti kulan tiw ja Dyosi, 35mok a ta'ex ti' ja lu'um k'inali, cho ye'nani wa stalna ja Dyosi. Mok cho a ta'ex ti' ja chonab' Jerusalen yuj ja ye'n schonab'il ja Dyos ja niwan mandaranumi. 36Mok a ta'ex ti' yuj ja wa sak'anil we'nlexi, yuj ja mi a b'ajuk a we'nlex ja sak'anil jawi. 37Yuj k'a ay jas oj ja k'u'lukex, alawik ojni a k'u'lukexa, kechan ta yuj mi oj ja k'u'lukex meran alawik mi oj ja k'u'lukex. Yuj spetsanil ja jas oj ja wali, ja'xani sb'aj ja tan pukuja.

Mok a nol wa tajkeli

(Lc 6:29-30)

38—Ja tuk jastik tuk sje'a ja Moisesi, ja it jumasa: Ay k'a ma' wax ya el yi junuk ja sat ja smoji, jach'ni ja ye'n ojni cho a'ji elyi junuk ja sat ye'ni; ay k'a ma' wa sk'oko yi junuk ja yej ja smoji, jach'ni ja ye'n ojni cho k'okjuk yi june ja yeja. 39Jaxa ya'n wax kala wabyex ja ke'n: Mok a wa'wex stup ja ma' wa sk'u'lan a wi'ex b'a mi leki. Ay ka' ma' spojo yi junuk ja wa choji, cho sutu yi ja juni. 40Ay k'a ma' wa sle'a a mulex b'a sti' sat ja ma' ay ya'teli, sok wa sk'ana oj sjap a wi'ex ja wa k'u'exi, cho a wik yi ja wa chompa'exi. 41Ay k'a jun soldado wax yala a wabyex oj a kuch ex yi ja yijkats b'a jun kilometro, kuchuwik yi b'a chab'e. 42Ja ma' ay jas oj sk'an a wi'exi, jaxa ma' ay jas oj smaj a wi'exi, a'wik yi majan.

Yajta ja ma' mi lek wax yilawa

(Lc 6:27-28,32-36)

43—Ja iti, pilan jas yala ja Moises ja najate' leki: Yajtayik ja wa mojexi, mok a wil'ex lek ja ma' staklayexi. 44Jaxa ya'n wax kala a wabyex ja ke'n: Yajtayik ja ma' mix yilawex leki, cho k'umanik ja Dyos yuj ja ma' mi' lek wax yilawexi. 45B'a jach' oj je'ex jastal wa Tatex Dyos it tey b'a satk'inali. Ja Dyosi, ye'n wax ya' eljan ja k'ak'u, wax ya ijlab'anuk b'a spetsanil, lek ma mi lekuk ja jastali. Ja Dyosi, ye'n wa sjeka kon ja ja' b'a satk'inal b'a slekilal ja ma wax k'u'aji yuji, cho jach'ni ja ma mix k'u'aji yuji.

46—Jaxa we'nlexi, kechan ja waxa yajtayex ja ma wa syajtayexi, mini t'un lek oj yil'ex ja Dyos ja jastal jawa. A jak t'un a k'ujolex ja ma'tik wa sk'anawe kontribusyon sb'a Roma jach'ni ja ye'nle'i, wani syajtaye ja ma' lek wax iljiye yuja. 47Yuj k'a ja'ita waxa kumana b'a sok ja ma lek waxa wila b'aj soki, mini jas wa'nex sk'u'lajela. —Jach'ni ja ma' mi sk'u'an ja Dyosi, wa sk'u'lane ja jastal jawi—.

48—Ja we'nlexi jel sb'ej toj oj ajyanik jastal ja Dyos wa tatex it tey b'a satk'inali, ja ye'ni tojni'a.

Currently Selected:

Mateo 5: YABD

Highlight

Copy

Compare