Mateo 4

K'u'laji ganar ja tan pukuj yuj ja Jesusi

(Mr 1:12-13; Lc 4:1-13)

1Tsa'an, ti i'ji och b'a takin lu'um k'inal ja Jesús yuj ja Yespiritu ja Dyosi, b'a jach' sta'a smodo'il ja tan pukuj b'a oj yil sk'ujol.

2Ja Jesusi, ek' yuj chab' tajb'e (40) k'ak'u sok chab' tajb'e (40) a'kwal mi wa'i, tsa'an ti'xa och wa'in yab'a. 3Ti waj ta'juk yuj ja tan pukuj b'a oj k'ulajuk probar ti alji yab'a:

—Yuj k'a meran ja we'n yunina ja Dyosi, ala yab' ja ton jumasa it a paxuk panil.

4Ti yala ja Jesusi:

—Ja b'a ts'ijb'anub'al ja yab'al ja Dyosi, jach' wax yala jastal iti:

mi kechanuk sok wa'el oj ajyuk sak'anil ja kristyano jumasa;

cho jel t'ilan oj sk'u'uk

spetsanil ja jastal wa'n yaljel ja Dyosi.

5Tsa'an ja tan pukuji, ti yi'aj b'a chonab' Jerusalen ja Jesusi. Ti ya k'e' b'a cha'an b'a s'olom ja snajtsil tsomjeli, 6ti yal yab'a:

—Yuj k'a meran we'n yunina ja Dyosi, man ili jipa ko a b'aj man lu'um, yuj ja b'a ts'ijb'anub'al ja yab'al ja Dyosi, jach' wax yala jastal iti:

Ja Dyosi, oj sjek ja yanjel jumasa

b'a oj stalnaya.

Ja ye'nle'i, oj syam a lek,

b'a mok a k'ojchuk a wok

sok mini jun ton.

7Ti yala ja Jesusi:

—Ja b'a ts'ijb'anub'al ja yab'al ja Dyosi, jach' wax yala jastal iti: Mok a k'ul probar ja wa wajwal Dyosi.

8Tsa'an ja tan pukuji, ti yi'aj ja Jesús b'a jun cha'anil wits. Man tiwi, wax ch'ak b'ob' ilxuk spetsanil ja niwak chonab' jumasa b'a jel ja kosa b'a lu'um iti. 9Ti yala ja tan pukuji:

—Spetsanil ja chonab' jumasa iti, oj ja b'ajuk ta yuj k'a oj ko'an mek'an b'a sti jsat oj ja toy'oni.

10Ti yala ja Jesusi:

—Elan ja il pukuj, ja b'a ts'ijb'anub'al ja yab'al ja Dyosi, jach' wax yala jastal iti:

K'u'anik sok toyowik kechan ye'n ja Dyosi.

11Yajni yab' ja jas alji yab' ja tan pukuji, ti'xa waja, jaxa Jesusi, wajto yile tey sok jitsan anjel ja b'a sts'e'el jak koltajuk yuj.

Ja Jesusi, stulu yi ja ya'teli

(Mr 1:14-15; Lc 4:14-15)

12Yajni yab' ja Jesús lutan ja Juan it ma' wax ya'a yi'jel ja'i, ti waj b'a Galilea. 13Mixa kumxi ja b'a snaj b'a Nazareti, ti'xa waj kulan b'a Cafernaum. Ja chonab' iti, tey b'a sti' paman ja' jumasa b'a Galilea. Ti ajyiye tiw ja k'ole jumasa sb'a israelenio jumasa, sb'a Zabulon sok b'a Neftali.

14Ja Dyosi, jach' ya k'ot smeranil ja jas yaloj yab' ja aluman Dyos Isaias ja yajni sts'ijb'a jastal iti:

15—Swinkil jumasa Zabulon maklayik lek,

ja ma' ti ayex mojan sok ja niwan paman ja'i;

swinik jumasa Neftali, maklayik lek,

ja ma' ti ayex b'a stojol wax och ja k'ak'u yuj ja niwan ja' Jordani;

swinkil b'a chonab' Galilea, maklanik lek,

jach'ni ja we'nlex ja ma'tik tuk b'a jakelexi.

16Ja kristyano ma' tey a moki, a'nima tey b'a k'ik'inal

oj yil jun niwan yijlab' k'ak',

jun k'ak' oj ijlab'anuk

ja ma' ti' mojan aye sok

ja chamel ch'akeli—.

17Man k'ak'u jawi, spetsanile ti k'e' aljuk yabye yuj ja Jesusi: —A' sutxuk wa k'ujolexi, k'u'anik ja Dyosi, yuj ja jelxa mojan oj jak sje' ja yab'al ja ili—.

Ja Jesusi, stsa'a ja chanwane yama chayi

(Mr 1:16-20; Lc 5:1-11)

18Ja Jesusi, ti wa'n b'ejyel ek' b'a sti' paman ja' b'a Galilea, ti yila ja Simon Pedro sok ja Andresi, ja ye'nle'i smoj alijel sb'aje sok ja' ya'tele syamjel ja chay sok ja yenub'e'i. 19Ti alji yabye yuj ja Jesusi: —La'ik, la nochowonik, x'utjiye. Ja ya'n oj tukb'es wa wa'telexi, ja jastal waxa na'awex syamjel ja chayi, jach' oj je'a wi'ex jastal oj ja wal'ex yab' ja kristyano b'a oj snochone'i—.

20Ja k'ak'u jawi, ya'we kan ja yenub'e ja Pedro sok ja Andresi, waj snoch e' ja Jesusi.

21Ja Jesusi, ti'ni wa'n b'ejyel ek' b'a sti' ja ja'i, ti cho yila ja Santiago sok ja Juani, cho smoj alijelni sb'aje'a, jani ya'tele ja ya'jel el chayi. Schawanile ti aye b'a jun barco wa'ne sts'akb'ajel ja yenub'e'i, cho ti'ni aye sok ja Zebedeo state'i. Ti payjiye schawanile yuj ja Jesusi. 22Jaxa yajni yabye ja ye'nle'i, wego ko'ye jan ja b'a barco aye'i, ti ya'we kan tiw ja state'i, jakye sok ja Jesusi.

23Jaxa Jesusi, sb'ejtes ek' spetsanil ja slujmal ja chonab' Galilea. Ti wa'n sje'jel ek' ja smandar b'a snajtsil tsomjel jumasa ja tsamal yab'al ja Dyosi, wax ya tojb'uk spetsanil ja ma' mi lek ayi.

24Ja Jesusi, jel niwan ilji, b'a spetsanil ja slujmal ja chonab' Siria. Ja kristyano wax yi'aje jan yi ja Jesús ja spetsanil ja ma' yaj ay ja skwerpo, sok ja ma'tik mi lek ayi, sok ja ma' ochel sb'aj tan pukuji. Cho jach'ni wax yi'aje jan ja ma' wax k'e' yik'i, ja ma' mix b'ob' b'ejyuki, ja ma' mix b'ob' snik sb'aji, spetsanil ja jaw jumasa ch'ak ya tojb'uk.

25Jel jitsan ja kristyano jumasa ja b'a lugar jumasa b'a Galilea, b'a Judea sok b'a Decapolis#4:25 Ja Decapolisi: Wa sk'ana yale, lajune chonab'. snochowe ja Jesusi. Ay jak swinkil b'a chonab' Jerusalen cho ay jakye b'a chonab' jumasa b'a ti aye b'a sk'axil ja niwan ja' Jordani.

Currently Selected:

Mateo 4: YABD

Highlight

Copy

Compare