Mateo 3

Ja Juan ma ya'a yijel ja'i

(Mr 1:1-8; Lc 3:1-9,15-17; Jn 1:19-28)

1Tsa'an ek' jitsan jab'il, ja Juan ma ya'a yijel ja'i ti waj b'a chayan lugar jumasa b'a Judea, waj yal ek' yab' ja kristyano jumasa ja yab'al ja Dyosi. Ti yala'a: 2—A'xa sutxuk wa k'ujolex sok ja Dyosi, yuj ja jelxa mojan oj jak sk'u'l mandar ja ili—.

3Ja Juan jawi, ja it ma' ta'ji ti' yuj ja aluman Dyos Isaias ja yajni yala jastal iti:

—Ay ma' tsats lek oj awanuk ja b'a chayan lugari:

Tojb'esik yi ja sb'ej ja Kajwaltiki.

—Jamawik lek ja b'eji—.

—Mok jas timjuk yuj—.

4Ja sk'u' wa slapa ja Juani, k'u'lub'al sok stso'otsil cameyo, ja syujch'ili, ts'u'um. Jaxa swa'eli, yal k'ujlub', sok ya'al chab'.

5Jel jitsan ja ma' wax maklaji yuj ja Juani. Mi kechanuk ja' k'otye ja ma'tik ti aye b'a sjoyanal ja niwan ja' Jordani, cho k'otye jitsan sb'a Judea sok sb'a Jerusalen. 6Ch'ak yal spetsanil ja smule jumasa, jaxa Juani, ti ya yi' ja' b'a niwan ja' Jordan 7Yajni yila ja Juan jel jitsan jakum ja fariseo sok ja saduseo jumasa b'a oj ya yi' ja'i, ti yal yabye'a:

—Ja we'nlexi, ja a mojex ja b'its'il chan jumasa— ¿Wa'n a maxa walawex oj ja kolta a b'ajex ja b'a wokol oj ya'wi'ex ja Dyosi? 8Je'awik yuj a wa'wexta kan sle'jel wa mulexi. 9Mok a wal yuj ti oj ja ta a koltajelex yuj ja yintilex ja Abrahami, yuj ja Dyosi, asta ja ton jumasa iti oj b'ob' ya pax yintilil ja Abrahami. 10Ta yuj k'a ay jun te' b'a mi lek wax satini, oj sk'uts el man yech ja swinkili, oj ch'ak slap k'ak'. Jach'ni oj sk'u'l jastal jaw ja Dyos sok ja we'nlexi, ja Dyosi, chapanxta b'a oj sch'ay sna'jel ja ma' mi lekuk ja jas wa sk'u'lani.

11—Ja ke'n wax ka' awi'ex ja', sok toj ja', b'a jach' oj ja je'ex yi ja tuk jumasa jastal tukb'iyex ja we'nlexi. Ay ma' ti jakum tsa'an yuj ja ke'n, mas jel ja yip yuj ja ke'ni. Ja ye'n oj ya' wi'ex ja', ja sok ja Espiritu Santo, sokni k'ak'a. —Jaxa ke'n mini b'a ya'tijumil oj makunukon yuj—. 12Ja ma' ti' jakum tsa'an yuj ja ke'ni, oj ch'ak spil ja b'a lek sok ja b'a mi lekuki. Ja b'a leki oj snolkani, jaxa b'a mi lekuki, ti oj sjip b'a yoj k'ak' b'a it mini wax tupi—.

Ja Juani, ya yi' ja' ja Jesusi

(Mr 1:9-11; Lc 3:21-22)

13Ti el ja Kajwaltik Jesús b'a Galilea, ti waj b'a niwan ja' Jordan, b'a oj a'ji yi' ja' yuj ja Juani. 14Jaxa Juani, mi sk'ana oj sk'u'luk. Ja'yuj ti yala yab'a:

—Mi sb'ejuk ja ke'n oj ka' a wi' ja'i. —Ja sb'eji we'n oj wa ki' ja', ja ke'ni—

15Ti yala ja Jesusi:

—Merani ye'na, k'u'lan jachuk, yuj ja jel t'ilan oj ka'tik k'ot smeranil ja jastal wa'n mandar ja Dyosi.

Jaxa Juani, lekni yab'a, 16ti'xa ya yi' ja'a. Yajni elk'en b'a yoj ja' ja Jesusi, ti yila sjama sb'aj ja satk'inali, ti ko'jan sb'aj ja Yespiritu ja Dyosi, jach' jastal jun yal pumus. 17Ti yab' jun k'umal ja b'a satk'inali, ti yala'a: —Ja iti ja kunini. Jel yaj wax kab', sok jel gusto ayon sok, xchi ja Dyosi.

Currently Selected:

Mateo 3: YABD

Highlight

Copy

Compare