Mateo 2

Ja ma'tik jel sna'awe'i

1Ja Jesusi, ti manxi b'a Belen sb'a Judea, ja yajni ye'n niwan mandaranum ay ja Herodes b'a chonab' jawi. Ja k'ak'u jawi, ay chab' oxe winike jel wa sna'awe ja jas wax ek' ja b'a satk'inali, ti sb'aje b'a jun chonab' b'a lado stojol wax jak ja k'ak'u, ti k'otye b'a Jerusalen 2ti sjob'owe'a: —¿B'ay ja yal kerem it manxita ja smandaranum ja judio jumasa? Ti kilatikon jas k'anal b'a stojol wax jak ja k'ak'u, ja'yuj jaktikon b'a oj toytikon ja sb'i'ili.

3Ja mandaranum Herodes sok spetsanil ja swinkil b'a Jerusaleni, jel xiwye ja yajni yabye ja jastal iti. 4Ja'yuj ja Herodesi, stsomo spetsanil ja pagre jumasa ma'tik jel niwak ja ya'teli, sok ja ma'tik wa sje'awe ja mandar it a'ji yi ja Moises yuj ja Dyosi, ti sjob'o yi'e'a:

—¿B'a b'i oj manxuk ja Mesiasi? —xchi ja Herodesi.

5Jaxa ye'nle'i, ti yalawe yab'a:

—Ti b'a Belen b'a chonab' Judea, yujni jach' yalawe ja aluman Dyos, ja yajni sts'ijb'aye jastal iti:

6—Ja we'n chonab' Belen

jel niwan oj iljan yuj ja

swinkil jumasa ja chonab' Juda.

Ja b'a'ya ja we'n ti oj manxuk jun ma' niwan lek ja ya'teli,

b'a oj sje'yi jas oj sk'u'luk ja israelenio jumasa—.

7Jaxa Herodesi, ti sjeka spayjel ch'ab'an ti' ab'al ja ma'tik jel wa sna'awe'i, ti sjob'o yi'e'a, jas k'ak'u sje'a sb'aj a wilawex ja k'anali. 8Tsa'an ti cho yala'a: —Ka'axik ja b'a Beleni, k'elawik spetsanil jastal ay yuj ja yal kerem jawi. Yajnixa ta'awexi, ti'xa walawex kab'a. Jach'ni ja ke'n wax k'ana oj waj toye'—.

9Tsa'an yajni ch'ak smakla ja jas yala ja mandaranumi, ti'xa elye ja ma'tik jel wa sna'awe'i, ti'xa wajye b'a Belen. Ja k'anal it yilawe b'a schonab'il ja mandaranumi, ti wa'n b'ejyel och b'a sti' sate. Ja k'anal jawi, ti k'ot tek'an b'a na'its b'a manxi ja yal keremi. 10—Ja ma'tik jel wa sna'awe'i, jel gusto axiye ja yajni yilawe k'ot tek'an ja k'anali—.

11Yajni ochye b'a yoj na'itsi, ti yilawe ja yal kerem sok ja Maria snani, ti ch'ak ko'uke mek'an stoyjela. Sjamawe ja skajone yi'oje ochi, sk'eb'awe yi k'anal tak'in ja yal alatsi, pom sok jun perjume sb'i'il mirra.

12Ja ma'tik jel sna'awe'i, a'ji swaychuk sb'aje ke mokxa ek'uke ja b'a niwan na'its ja b'ay ja mandaranum Herodesi. Jaxa ye'nle'i, tukxa b'ej yi'aje ja yajni kumxiye'i.

Ja snan stat ja Jesusi, wajye b'a Egipto

13Tsa'an yajni kumxiyeta b'a schonab'ile ja ma'tik jel sna'awe'i, ti je'ji sb'aj yi jun yanjel ja Dyos b'a swayich ja Jose, ti alji yab'a: —Nutsa b'aj, k'e'an, elanik ja ili, ti la wajyex b'a Egipto, ti la ajyiyex tiw man ke'n oj kal a wabyex jas k'ak'u oj elanik, yuj ja tan mandaranum Herodesi, oj sle' ja yal kerem b'a oj smile—.

14Ja a'kwal jawi ja Jose yi'aj ja alats sok ja snani, 15ti ajyi tiwi, man smajla cham ja mandaranum Herodesi. Jach' k'ot smeranil ja jas yal yab' ja Dyos ja aluman Dyosi: —Man b'a chonab' Egipto ka eluk ja kunini, —xchi ja aluman Dyosi.

Ja Herodesi, wa sle'a jastal oj smil ja Jesusi

16Yajni jak sk'ujol ja mandaranum Herodes ke lo'lajita yuj ja ma'tik jel wa sna'awe'i, jel tajki, ja'yuj sjeka miluman spetsanil ja yal keremtik b'a mito ts'ikanuk yi'oj ja chab' jab'il b'a ti aye b'a Beleni, sok ja ma'tik tey b'a sjoyanal ja chonab' jawi. 17Ja jastal ch'ak aljuk yab' ja aluman Dyos Jeremias yuj ja Dyosi, jach'ni k'ot smeranila:

18—Xwo'oljiyexta ok'el ja

swinkil ja chonab' Rama.

Ja'ni ja Raquel ja jex ok'

yuj ja ch'ak chamuk ja yuntikili,

sok mi sk'ana ma' oj a'ji kulan yi sk'ujol—.

Ti wajye b'a Nazaret

19Ja yajni cham ja Herodesi, ti'to ay b'a Egipto ja Jose'i. Ja'yuj ja Jose ti je'ji sb'aj yi jun yanjel ja Dyos b'a swayich 20ti alji yab'a: —K'e'an Jose ojxa b'ob' kumxan ja ya'n b'a schonab'il ja israelenio, i'aj ja yal kerem sok ja snani, yuj ja ch'akta chamuke ja ma' wa sk'ana oj smil ajyi ja yal keremi—.

21Jaxa Jose sok ja Maria yi'aje ja yal keremi, ti'xa kumxi ye b'a schonab'il ja israelenio. 22Jaxa Jose wa'n xiwel ja oj wajuk ja b'a chonab' jumasa b'a Judea, yuj ja lom yab' yab'alil ye'n cho och kan yajk'achil mandaranumil ja Arquelao yunin ja Herodes ja b'a chonab' jumasa jawi. Ja'yuj ti alji yab' ja Jose yuj ja yanjel ja Dyos a'nima ti'itax k'ot man b'a chonab' jumasa b'a Galilea.

23Yajni k'otye ja tiwi, ti wajye kulan b'a jun chonab' sb'i'il Nazaret. Jach' k'ot smeranil ja jas alji yabye yuj ja Dyos ja aluman Dyos jumasa: —Ja Mesiasi, oj sb'i'iluk Nazareno—.

Currently Selected:

Mateo 2: YABD

Highlight

Copy

Compare