Levitico 9
9
Ja sb'ajtanil majtanal jumasa
1B'a swaxakil k'ak'u ch'ak payjuke yuj ja Moises ja Aaron sok ja yuntikili, cho jach'ni ja ma'tik ay ya'tel yuj ja israelenio jumasa. 2Ja'yuj ti yala yab' ja Aaroni:
—Kax a'yi jun yal wakax ja Dyos b'a smajtan b'a jach' oj sch'ay wa muli, cho tsika yi jun chej b'a oj ja toy ja sb'i'ili. 3Cho ala yabye ja israelenio jumasa a ya'we jun chivo b'a smajtan ja Dyosi, b'a jach' oj ch'ayjuk yi'e ja smule'i, jaxa b'a oj stoy'e lek ja sb'i'il ja Dyosi, a stsik e' jun yal wakax sok jun yal chej, b'a jujune jab'il yi'oj sok b'a mi yajb'eluk.
4—Ya'n oj sje'a wi jastal jel ja yip' ja Dyosi. Ja'yuj jel t'ilan oj ja wa'wex yi jun wakax sok jun chej b'a smajtani, b'a jach' oj ja k'an'ex yi wa lekilalex sok wa sak'anilexi, cho a'wik yi ja yal sat te' jumasa, wots'owik lek sok aceite.
5Ja israelenio jumasa, ti yi'aje och b'a snajtsil tsomjel spetsanil ja jastik yala ja Moisesi. Spetsanil ja kristyano jumasa ch'ak ochuke mojan b'a sti' b'a wax a'xi kajan jas majtan ja Dyosi, ti'xani kan tiwa. 6Ti alji yabye yuj ja Moisesi: —Ja iti, ja' yab'al jumasa ja Dyosi. Ta yuj k'a a k'u'anex ojni sje'a wi'ex spetsanil ja yipa— 7Ja Moisesi, cho yala yab' ja Aaroni: —Ochan mojan ja b'a wax a'xi kajan jas majtan ja Dyosi, a'yi ja smajtan ja Dyos b'a oj sch'ay wa mul jumasa, cho tsika yi pilan smajtan ja b'a oj ja toy ja sb'i'ili, jach'ni ja majtanal oj ya' ja kristyano cho a'yi ja Dyosi, b'a jach' oj sch'ay jawa mul we'n sok ja sb'aj ye'nle'i.
8Ja Aaroni, smila ja wakaxi, ya'yi ja smajtan ja Dyosi, ja'ni b'a oj ch'ayjuk yi ja smuli. 9Ja yuntikili, ya'we jits jan yi mojan ja schik'el ja wakaxi, sla'a ja yal sk'ab' ja Aaroni, ti sjaxa yi b'a jujune schikin ja b'a wax a'xi kajan jas majtan ja Dyosi. Jaxa chik' ayto kani ti spek'a yi b'a yuk'mal ja b'a wax a'xi kajan jas majtan ja Dyosi. 10Jaxa skojlelali, ja srinyoni, ja skojlelal schok'oli, ti stsika b'a sat ja b'a wax a'xi kajan jas majtan ja Dyosi, ja'ni jastal alji yab' ja Moises yuj ja Dyosi. 11Ja sb'ak'tel sok ja sts'ujmili, najat waj stsik yuj ja b'a'y ja kristyano'i.
12-14Ja Aaroni, smila ja wa'el it wax tsikxi b'a stoyjel ja Dyosi. Jaxa yuntikili nakaxa t'osob'al yi'aje och ja wa'el jawi, jaxa Aaroni ti stsika sok lajan ja s'olom b'a sat ja b'a wax a'xi kajan jas majtan ja Dyosi. Jaxa schaktop sok ja yok sk'ab' jumasa sak'a lek cho stsikani'a. Ja yuntikili, ya'we jits jan mojan ja chik'i, jaxa Aaroni ti spek'a b'a schanil sts'e'el ja b'a wax a'xi kajan jas majtan ja Dyosi.
15Tsa'an ja Aaroni, cho ya'a yi ja smajtan ja Dyos b'a oj ch'ayjuk yi ja smul ja kristyano jumasa. Yi'aj ja chivo, ya'yi ja Dyosi, jach'ni cho sk'u'lan jastal sk'u'lan sok ja b'ajtani. 16Cho stsika ja majtanal it wax toyxi sok ja Dyosi, jach' sk'u'lan jastalni k'ajyel wa sk'u'lani. 17Yi'aj jun b'eche ja majtanal sat te'i, ti stsika sok lajan b'a sat ja b'a wax a'xi kajan jas majtan ja Dyosi ja majtanal it wax tsikxi b'a sakb'el b'a wax toyxi ja Dyosi.
18Ja Aaroni, smila ja wakax sok ja chej yuj ja waj sk'an'e' sak'anile ja kristyano jumasa, jaxa Aaroni, ya'yi ja Dyos ja majtanal jumasa jawi. Cho a'ji jits jan yi ja chik' yuj ja yuntikili, ja Aaroni ti spek'a b'a schanil sts'e'el ja b'a wax a'xi kajan jas majtan ja Dyosi. 19-20Ja sneji, ja srinyoni, ja skojlelal schok'ol sok spetsanil ja skojlelal schaktop ja wakax sok ja cheji, ti ch'ak stsik b'a sat ja b'a wax a'xi kajan jas majtan ja Dyosi. 21Ja Aaroni kechan ja yi'aj ja sni' sk'ujol sok ja sb'ak'tel stojol yechmali, ya'yi ja Dyosi, jach' sk'u'lan sok b'a schab'il ja chante jumasa. 22Ti slika ja sk'ab' ja Aaroni, jel tsamal sta'a ti' ja kristyano jumasa.
Ja israelenio jumasa je'ji yi'e ja yip ja Dyosi
Yajni ch'ak ya'yi ja smajtan ja Dyos ja Aaroni, ti'xa el ja b'a wax a'xi kajan jas majtan ja Dyosi 23ti ochye b'a yoj na'its tsa'ub'al sok ja Moisesi. Yajni elye'i, schawanile sta'awe ti' tsamal ja kristyano'i. Spetsanile yilawe ja yip ja Dyosi, 24sjeka jun k'ak' b'a ch'ak stsik spetsanil ja jas tey b'a sat ja b'a wax a'xi kajan jas majtan ja Dyosi. Yajni yilawe'i, jex awaniye yuj ja jel tsamal aye'i, ti snujts'in sb'aje'a, man sta'a ja lu'um ja spatane yuj ja wa stoyowe ja Dyosi.
Currently Selected:
Levitico 9: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
