Levitico 8
8
Tsa'jiye ja Aaron sok ja yuntikili
1Ja Dyosi, ti cho yal yab' ja Moisesi:
2-3—Tsomo ja Aaroni, ja yuntikil sok spetsanil ja israelenio jumasa, i'aj och b'a wax ajyi ochel b'a snajtsil tsomjeli. Cho i'aj och ja sk'u'e ja pagre jumasa, ja aceite b'a oj jaxuk sb'aje'i, ja yal wakax b'a majtanal b'a oj ch'ayjuk ja mulali, ja chab' cheji, ja smo'ochil ja pan mey yi'oj levadura.
4Ja Moisesi, ja sk'u'lan ja jastal alji yab' yuj ja Dyosi, yajni nakaxa ti tsomane k'ot b'a wax ajyi ochel b'a snajtsil tsomjeli, 5ti alji yabye yuj ja Moisesi: —Ja ke'n ja wax k'u'lan ja jas wax yala ja Dyosi—. 6Ti'xta'a ja Moisesi yal yab' ja Aaron sok ja yuntikil oj ochuke mojan, ti och ya atnuk sok ja'a. 7Yajni ch'ak ya atnuki, ti'xa ya slap ja sk'u' b'a pagre'ili, spita sok ja syujch'ili. B'a sat ja sk'u'i, ti ya ochyi ja spal k'u'i, b'a sat ja spal k'u'i, ti ya ochyi ja yal schompa, ti spita sok ja yak'il ja schompa. 8Ja schompa ti ya ochuk b'a ochel ja Urim sok ja Tumim#8:8 ja Urim sok ja Tumim: Wa sk'ana yale, chab' yal ton was jipawe b'a ti oj sna'e ja jas wa sk'ana ja Dyosi. ma ja chab' yal ton wax makuni b'a oj sna' ja jas wa sk'ana ja Dyosi. 9Ja b'a s'olomi ya ochyi ja sgorra, b'a sti' sat ja sgorra ti ya ochuk ja yal lechan k'anal tak'ini, jach'ni jastal yalunej ja Dyosi. Ja lechan k'anal tak'in iti, ja' wax yala yuj ja Aaroni, tsa'ub'al b'a kechan ja oj ya'telta ja Dyosi.
10Tsa'an ti yi'aj ja aceite it tsa'ub'al ja Moisesi, spek'a yi ja snajtsil tsomjeli, cho jach'ni spetsanil ja jas ay ja tiwi. 11Cho spek'a yi aceite ja b'a wax a'xi kajan jas majtan ja Dyosi, sok spetsanil ja jas wax makuni b'a wax a'xi kajan jas majtan ja Dyosi, jach'ni ja ye'tal bronce sok ja yuk'mali. B'a oj tsa'uxuk ja b'a wax a'xi kajan jas majtan ja Dyosi spek'ayi aceite juk majke. 12Yajni stsa'a ja Aaron b'a oj och pagre'ili, spek'a yi aceite ja s'olomi.
13Tsa'an ja Moisesi, spaya ja yuntikil ja Aaroni, ya slap ja sk'u'e' b'a pagre'ili, spita sok ja syujch'ile'i, ya slap sgorra'e, jach'ni jastal yalunej ja Dyosi.
Ja majtanal b'a oj tsa'xuk ja a'tijumi
14Ja Moisesi, sjeka sk'anjel ja yal wakax b'a majtanal b'a oj ch'ayjuk ja mulal jumasa. Jaxa Aaron sok ja yuntikil jumasa, ti ya kajan ja sk'ab'e b'a s'olom ja yal wakaxi, 15jaxa Moisesi smila. Ti'xta'a sla'a ja yal sk'ab' b'a schik'eli, sjaxa yi b'a jujune sts'e'el ja b'a wax a'xi kajan jas majtan ja Dyosi; jaxa tuki, ti spek'a b'a yuk'mal, jach' stsa'a ja b'a wax a'xi kajan jas majtan ja Dyosi.
16Ja Moisesi, cho yi'aj spetsanil ja skojlelal schaktop ja yal wakaxi, jach'ni ja schok'oli, schab'il ja srinion sok ja skojlelali, ti ch'ak stsik b'a sat ja b'a wax a'xi kajan jas majtan ja Dyosi, 17jaxa sts'ujmili, ja sb'ak'tel sok ja sk'oyi najat waj stsik ja b'a'y ja kristyano'i, jach'ni jastal yalunej ja Dyosi.
18-19Ja Moisesi, sjeka sk'anjel ja chab' cheji, ja' majtanal b'a oj tsikxuk b'a stoyjel ja Dyosi. Jaxa Aaron sok ja yuntikil jumasa, ti ya' kajan ja sk'ab'e b'a s'olom ja cheji, ti smila ja Moisesi. Jaxa schik'eli ti spek'a yi b'a schanil sts'e'el ja b'a wax a'xi kajan jas majtan ja Dyosi, 20ch'ak schok'b'es ja sb'ak'teli, ti ch'ak stsik sok ja s'olom sok ja skojlelali. 21Sak'a lek yi ja yok sk'ab' jumasa, jach'ni ja schaktopi, jach' stsika jastal wax tsikxi ja smajtan ja Dyos it jex ajb'ani yik'il wax yab'i. Spetsanil jach' sk'u'lan ja Moises ja jastal yalunej ja Dyosi.
22-23Ja Moisesi, sjeka i'k'uman ja pilan chej b'a oj makunuk b'a stsa'jel ja a'tijumi. Jaxa Aaron sok ja yuntikili, ti ya'we kajan ja sk'ab'e b'a s'olom ja cheji, ja Moisesi, ti smila'a. Jaxa b'a schik'eli, ti sla'a ja yal sk'ab'i, sjaxayi b'a stojol schikin ja Aaroni, b'a stojol snan sk'ab'i, sok b'a stojol snan yoki. 24Cho yala yab' a jitsuke jan ja yuntikil ja Aaroni, jach' cho sk'u'lan yi ja ye'nle'i, jaxa janek' kani ti spek'a yi b'a schanil sts'e'el ja b'a wax a'xi kajan jas majtan ja Dyosi.
25Ja Moisesi, yi'aj ja sneji, skojlelal schaktopi, b'a schok'oli, schab'il ja srinion sok ja stojol yechmal ja cheji. 26B'a sat ti ya och jun waj, jun gayeta, ti ya el b'a smo'ochil ja waj mey yi'oj levadura it tey mojan b'a sti' b'a wax a'xi kajan jas majtan ja Dyosi. 27Ti ya'kan yi ja Aaron sok ja yuntikil b'a oj ya'we yi ja Dyos ja majtanal jawi.
28Yajni ch'ak ya'we yi ja smajtan ja Dyos ja Aaron sok ja yuntikili, ti'xa ya'we yi ja Moisesa, jaxa ye'n ti stsika sok lajan b'a sat ja b'a wax a'xi kajan jas majtan ja Dyosi ja majtanal it jex ajb'ani yik'il wax a'xi yi ja Dyosi, schab'il ja majtanal jumasa jawi, tsa'ub'alni'a.
29Jaxa Moisesi, yi'aj ja sni' sk'ujol ja chej majtanal jawi, yujni ye'n wax yi'aj ja jawa, ti waj sje' yi ja Dyosi, spetsanil jach' sk'u'lan ja jastal alji yab' yuj ja Dyosi.
Ja a'tel tsa'ub'ali
30Ja Aaron sok ja yuntikili, pek'ji sb'aje jun aceite tsa'ub'al yuj ja Moisesi, sok ja chik' it tey b'a sat ja b'a wax a'xi kajan jas majtan ja Dyosi pek'ji sb'aje. Cho tsijuji sb'aj ja sk'u'e'i. 31Yajni ch'aki ti yala'a:
—Ts'anawik ja b'ak'et it a wi'ojexi, ti'xa wabyex b'a mojan wax ajyi ochel b'a snajtsil tsomjeli. Ab'anik sok ja waj it tey b'a mo'och tsa'ub'ali. 32Spetsanil ja janek' oj kanuki, ch'akan tsikawik.
33-35—Ja k'in jaw b'a oj tsa'xuk ja pagre jumasa, oj alb'uk juke k'ak'u, jaxa we'nlex ja k'ak'u jumasa jawi, ti oj ajyanik k'ak'u a'kwal b'a wax ajyi ochel b'a snajtsil tsomjeli. Mi kechanuka cho jach'ni tsa'ub'al oj kananik a petsanilex ja we'nlexi, ja Dyosi wax yala b'a sjukil k'ak'u k'u'lanik ja jastal wa'ntik sk'u'lajel ja ya'ni. Ch'akan k'u'anik ja jastal iti, b'a jach' mi oj chamanik. Ja' ab'al it ja ya'ki ja Dyosi.
36Ja Aaron sok ja yuntikili, jach'ni sk'u'lane ja jastal alji yab' ja Moises yuj ja Dyosi.
Currently Selected:
Levitico 8: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
