Levitico 10
10
Ja Dyosi, ya stup smul ja Nadab sok ja Abihu
1Ja Nadab sok ja Abihu, ja b'ajtan yuntikil ja Aaroni, yi'aje och jujune spachub' spome, stsikawe pom. Yuxta mi jach' sk'u'lane jastal wa sk'ana ja Dyosi, 2ja'yuj ja Dyosi, sjeka jun k'ak', ti ch'ak tsikuke kan tiwi. 3Ja'yuj ja Moisesi, ti yal yab' ja Aaroni:
—Ja' it ja' wa sna'a ajyi ja Dyos ja yajni yala:
Wax k'ana yuj ja jpagre jumasa a sk'u'uke ja kab'ali,
sok spetsanil ja kristyano jumasa a stoy'one.
Jaxa Aaroni, mi ja syala.
4Ja Moisesi, ti spaya ja Misael sok ja Elsafani, ja' yuntikil ja Uziel statjune ja Aaroni, ti yala yabye'a: —A'wik eluk ja b'a snajtsil tsomjel ja sb'ak'tel wa moj alijelexi, a'wik eluk ja b'a'y ja kristyano jumasa.
5Ti wajye ja ye'nle'i, spotsowe sok ja sk'u'e ja cham winiki, ya'we el ele ja'ni jastal alji yabye yuj ja Moisesi. 6-7Ja'yuj ja Moisesi, ti yala yab' ja Aaron sok ja chab' yuntikil jumasa, ja Itamar sok ja Eleazari:
—Ja we'nlexi, mok a na'ex ja jastal cham jawa moj alijelexi. Mok a wa' ch'etan wa olomexi, mok a ch'i' wa k'u'exi. Na'awik t'unuk ja k'ak'u tsa'jiyex sb'a pagre'ili, pek'ji aceite wa olomexi. Mok cho elanik najat ja b'a snajtsil tsomjeli, ta yuj k'a elyex, ja Dyosi, ojni tajkuk sok ja kristyano jumasa'a, jaxa we'nlexi ojni chamanika. Jawa mojex israelenio oj yal'e jasyuj jach' sjeka ja k'ak' it ja Dyosi.
Jaxa ye'nle'i, jach'ni sk'u'lane ja jastal alji yabye yuj ja Moisesi:
Ja jas mi lek oj yab' ja pagre jumasa
8Ja Dyosi, sk'uman ja Aaroni, ti yal yab'a:
9-10—Ja we'n sok wa wuntikili, yuj k'a oj ochanik ja b'a snajtsil tsomjeli, mi sb'ejuk oj ja wu'ex ya'lel ts'usub' b'a oj yakb'anbik. Yuj k'a a k'u'lanex ojni chamanika, ja we'nlexi sb'ej oj ja na'ex jasunk'a kistali, sok jasunk'a mi kistaluki, jasunk'a leki, sok jasunk'a mi lekuki. Ja iti jun ab'al b'a mi oj b'ob' tukb'esxuk. 11Oj cho a je'ex yi ja israelenio jumasa jastal oj sk'u'uke ja ab'al jumasa it ka'yi ja Moisesi, xchi ja Dyosi—.
12-13Jaxa Moisesi, cho yal yab' ja Aaron sok ja chab' yuntikili, ja Itamar sok ja Eleazari:
—Ja sat te' jumasa wax tsikxi yi b'a smajtan ja Dyosi, tsa'ub'alni'a. Ja'yuj t'ilan oj ja wa'wex ochyi jun waj b'a mey yi'oj levadura. Ja wa'el jawi ti oj ja wabyex b'a sti' ja b'a wax a'xi kajan jas majtan ja Dyosi, ja tiwi tsa'ub'alni'a.
14-15—Jaxa jmajtan oj ya'ki ja kristyano jumasa b'a oj sk'an e' sak'anile'i, we'n oj ja wi'ex kan sok wa wuntikil ja sni' sk'ujol sok ja yechmali, yujni ja wa b'aj we'nlexa. Le'awik b'a mi jel kistaluk b'a oj wa'aniki, ja wa'el jawi, b'ajtan oj a'xuk yi ja Dyosi, jaxa skojlelali oj ch'ak tsikxuk. Ja ab'al iti, ja wax ya'a ja Dyosi, sok mi oj b'ob' tukb'esxuk.
16Tsa'an t'usan ti sjob'o ja Moises yuj ja chivo it wax a'ji b'a oj sch'ay ja mulal jumasa. Wajto yab'i stsikaweta b'a sat ja b'a wax a'xi kajan jas majtan ja Dyosi ja Itamar sok ja Eleazari, jel tajki ja Moisesi, ti yala'a:
17—¿Jasyuj ja mi ti a wabyex ja wa'el b'a snajtsil tsomjel b'a? Ja we'nlexi waxa na'awex lek ja majtanal jawi, tsa'ub'al; —Jun majtanal b'a oj ch'ayjuk ja mulal jumasa—. Sok ja majtanal jawi, ja Dyosi oj sch'ay wa mul we'nlex sok sb'a kristyano jumasa. 18Yuj ja mi i'ji och ja chik' b'a yoj snajtsil tsomjeli, jaxa majtanal jawi, yujni t'ilan ti oj ja wabyex b'a na'its pilub'al b'a sb'aj ja jawi, jach'ni jastal kaloj a wabyexi.
19Ti yala ja Aaroni:
—Ja ya'an ja chab' kuntikil Nadab sok ja Abihu ya'weta yi ja smajtan ja Dyos b'a oj ch'akuk ja smule'i, cho smilawe june stsikawe b'a oj stoy'e' ja sb'i'il ja Dyosi. Ja ya'n ch'ayta ja majtanal jawi, ¿Jastal waxa wila ja we'n, lek to ma oj yil ja Dyos ja lek tix kab'tikon il ja ya'n ja majtanal b'a oj sch'ay ja mulal jumasa b'a?
20Yajni yab' ja jastal it ja Moisesi, jel tsamal yab'i.
Currently Selected:
Levitico 10: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
