Levitico 25
25
Ja jijlel b'a sjukil jab'ili
1Ja Dyosi, tey b'a wits Sinai, yal yab' ja Moisesi, 2ab'i yal yab' ja israelenio ja ab'al jumasa iti:
—Yajni la ochyex b'a lu'um jumasa oj ka'wi'exi, ja lu'um jawi t'ilan oj ja wa'wex jijluk jun jab'il b'a jtoyjel ke'na. 3Wake jab'il oj b'ob' a ts'un'ex sb'a'al wa walajexi, oj ja tojb'esex lek, oj ja tul'ex ja sb'a'ali, 4-7yajnix k'ot ja sjukil jab'ili, mi ma' oj b'ob' sts'un sb'a'al ja yalaji, mi ma' oj ya'telta ja jas b'aji. Cho mixa oj b'ob' a tul we'nlex ja sb'a'al wa walajex ja tsa'an yajni ek'yexta stsomjeli.
—Ja janek' oj ya' ja sb'a'al wa walajex ja k'ak'u oj jijluki, oj ya' b'a oj ja wab' ja we'nlexi, sb'a ma' yib' k'ab'al ay a wujilexi, sb'a wa wa'tijumexi, sb'a ma jakel tuk chonab' tey amokexi, sb'a wa chante'exi, cho ojni sta' ja chante jumasa b'a k'uli. Jachuk ja lu'umi, yuj ja ke'n oj jijluk spetsanil jun jab'ili.
Ja jab'il wax kan lom ja a'tijumi
8-13Sok mi kechanuka, t'ilan oj ja wajtab'anex juk majke juke, wax ya'a chab' tajb'e sok b'alune (49) jab'il, sok ja jun jab'il ti jakumi, wax ya'a chab' tajb'e sok lajune jab'il. Ja jab'il jawi, ja oj kan lom ja a'tijum jumasa. B'a lajune yajtab' ja yixawil Etanim,#25:8-13 yixawil Etanim: Ja sjukil ixaw b'a jab'il yuj ja judio jumasa. Jaxa b'a jtiempo ke'ntiki b'a snalan ixaw b'a septiembre sok snalan ja ixaw octubre. ja jab'il iti ja sk'ak'u'il ja sch'ayjel ja mulali, b'a spetsanil ja yoj chonab'i, oj ja wa'wex ok' korneta, sok oj ja wal'ex ek' yuj ja sk'ak'u'il oj kan lom ja a'tijum jumasa. Ay k'a ma schononej xa ja slu'umi, ja jab'il jawi, oj a'ji kumxuk yi, jaxa ma yib' k'ab'al ayi, oj a'jukan lom b'a oj waj sta' ja swinkil snaji.
—Ja jab'il chab' tajb'e sok lajune'i, mi oj b'ob' ya a'tijuk ja lu'umi, kechan ja oj ja wabyex ja jastik b'a oj ajyuk lom b'a lu'um jawi.
14Ay k'a ma smana, ma schono xe'n slu'um, mok a lo'la ja ma oj ja k'u'l sok a lo'ili, 15-16ja ma oj smani, ja oj stup ja jayexa k'ak'u ekta man kan lom ja a'tijum jumasa, jaxa ma oj schoni, ja oj sk'an sts'akol ja jayeto jab'il sk'ana oj eluk ja sb'a'al ja lu'um jawi.
17—Mok a lo'la wa mojexi, je'awik yuj waxa kisawonex. Ke'n Dyoson yuj ja israelenio jumasa. 18Ta wan k'axa k'u'anex ja jas wax kala, ta mik'axa k'okowex ja kab'al jumasa, jel lek oj ek' a wujilex, 19ja lu'umi, jel oj ya' ja sb'a'ali, jaxa we'nlexi jel oj ja lo'ex ja sat ja tek'ul jumasa man tsamal lek oj kananik.
Ja Dyosi, wax yala jel lek oj yil ja yuntikili
20—Sen oj ja wal'ex: ¿Jasun oj kab'tikon b'a sjukil jab'il ta mi k'a oj jts'untikon sb'a'al ja jlu'umtikon b'a? 21Mix cham a k'ujolex, ja b'a swakil jab'ili, jel oj ka' ajyuk ja sb'a'al wa walajexi, jel oj ajyuk wa jas a b'ajexi, oj ya b'a oj ja wabyex b'a oxe jab'il ti jakumi. 22Ja'yuj ja b'a swaxakil jab'ili, oj ja ts'un'ex sb'a'al wa walajexi, jaxa wa wa'elexi, ja oj ja wabyex ja b'a oj ja nol'ex kani. Jach' oj cho a k'u'lukex ja b'a sb'alunil jab'ili, malan oj ja jach' ex wa walajexi.
Oj kumxuk sok ja ma sb'aj ja lu'umi
23—Mi ma oj b'ob' oj schon ja slu'umi. Ja lu'umi jb'aj ke'na. Ja we'nlexi kechan wax ka'wi'ex majan, yuj ja ek'um b'ej itani ayexa.
24—Ay k'axa mana xe'n lu'um, na'awik lek ja tsa'ani ojni wa kumxuk yi ja ma sb'aj ja.
25—Ay k'a jun israelenio jel wokol ay ja'yuj ti schono xet'an ja slu'umi, jun smoj alijel oj b'ob' ya och slok'ol ja tak'in jawi, b'a jach' oj b'ob' kumxuk sok ja slu'um ja tsa'ani. 26Yuj k'a mey jun smoj alijel, ye'n oj b'ob' sle' jastal oj ya och slok'ol ja tak'in jawi, 27a yajtab'en jay majketo oj el sb'a'al ja lu'umi, b'a jach' oj sna' janek' oj stupa.
28—Yuj k'a mi sta'a ja tak'in b'a oj yi'kan ja slu'um ja ma schono, ja ma smana ye'nani oj sb'ajuk ocha, man oj k'otuk ja sk'ak'u'il ja k'in b'a wax kan lom ja a'tijum jumasa, ja k'ak'u jawi ti oj kumxuk sok ja ma sb'aj ajyi ja lu'umi.
Jun na'its oj kumxuk sok ja ma sb'aji
29—Ay k'a ma schono jun na'its tey b'a yoj chonab' b'a makan sjoyanali, ja ma schono ay yi'oj jun jab'il b'a oj cho b'ob' smane. 30Kechan ta mik'a b'ob' sman ja k'ak'u jawi, mi oj a'ji kumxuk yi ja yajnix el jul ja k'ak'u oj kan lom ja a'tijum jumasa, ja ma smana ti'xani wa sb'ajan kan sok ja yuntikil jumasa'a.
31—Jaxa na'itsaltik tey b'a ti chonab'i, mi jach' wax k'u'laxi sok jastal jawi, ja na'its jumasa jawi, jach' wax k'u'laxi, jastal wax k'u'laxi sok ja lu'um jumasa: Ja k'ak'u oj kan lom ja a'tijum jumasa, oj b'ob' kumxuk sok ja ma sb'aj ajyi ja na'its jawi.
Ja jastik sb'aje ja yintil ja Levi
32—Jaxa sk'ole jumasa ja Levi, oj b'ob' sman'e na'its chikan jas k'ak'u, kechan ti'ni oj stojb'ese b'a yoj slu'um ye'nle'a. 33Yuj k'a ay ma mi oj b'ob' smane, ojni a'ji kumxuk yi ja k'ak'u oj a'juke kan lom ja a'tijum jumasa'a. 34Ja lu'um jumasa tey b'a sjoyanal ja schonab'il ja levita jumasa, mi oj b'ob' chonxuk, yujni sb'aj ye'nle spetsanil k'ak'u'a.
Mok a lo'layex ja ma ajula sb'aji
35—Ay k'a jun israelenio jel wokol wa'n ek'el yuj, jel t'ilan oj ja koltayex jastal waxa koltanex ja ma' tuk chonab' jakeli. 36-37Ta wan k'a smaja a wi'ex tak'in, mok a tajb'ayex sok yal; ta wan k'axa wa'wex wa'uk, mok a k'an'ex yi sts'akol. Je'awik jastal jel waxa kisawonex, sok tix ajyi a mokexa. 38Ja'yuj ka elanik b'a Egipto b'a oj ka'wi'ex ja lu'um b'a Canaani, cho ja'ni b'a oj ja na'ex yuj ja ke'n wa Dyosonexi. Ke'n Dyoson yuj ja israelenio jumasa.
Ja israelenio yib' k'ab'al aye
39—Ay k'a jun israelenio jel wokol wa'n ek'el yuj, ta wan k'ax cho schono sb'aj a'tel, mok a wil'ex ch'in. 40Ilawik jastal jun a wa'tijumex, ma jastal jun a wula'ex, sok kechani we'n oj ya'teltaya man oj a'juk kan lom ja a'tijum jumasa. 41Yajnix a'ji kan lomi, oj waj sok ja yuntikili, ti oj waj kulan sok ja smoj alijel jumasa b'a slu'um ye'nle'i. 42Ja israelenio jumasa, naka jb'aje ke'na, mi oj b'ob' chonxuk b'a yib' k'ab'al oj ajyuk, yuj ja yib k'ab'alni aye ajyi b'a Egipto, ke'nani ka'we kan loma.
43—Mok a wil'ex ch'in ja israelenio jumasa. Je'awik jastal jel waxa kisawonex.
Ja ma'tik yib' k'ab'al ay tuk chonab' jakeli
44—Ta wan k'axa k'ana a wa'tijumex, kax manawik b'a chonab' mojan ki'ojtiki, 45-46ta mi k'a, tey ja yuntikil ja ma'tik tuk chonab' jakeli, ma' ti'xa manxiyeta b'a wa chonab'ilexi. Ja ye'nle'i oj b'ob' a'tijuk amokex, oj cho sk'eb' a wi'ex ja yuntikile'i. Kechan ja israelenio mokni a wil'ex ch'ina.
Lomxa ay ja israelenio ma yib' k'ab'al ay ajyi
47—Ay k'a june b'a tuk chonab' jakel jel tsamal k'e' riko'il, jaxa jun israelenio sok jel ajula sb'aj ojxa schon sb'aj a'telil sok ja ma' tuk chonab' jakeli, 48-49ja israelenio jawi, oj b'ob' koltajuk yuj junuk ja ma' smoj alijel sb'aj soki, cho ojni b'ob' skolta sb'aj ye'n ita'a yuj k'a wax k'ax b'ob' yuji. 50-52Ja yajwali oj yajtab'en jayeto jab'il wa sk'ana oj k'otuk ja oj kan lom ja a'tijum jumasa, ti oj och yajtab'en janek'xa elta yuj jun a'tijum, spetsanil ja k'ak'u ek'ta. Ja janek' oj el yujili, ja janek' oj stup ja ma oj kan lomi. 53We'nlex oj ja talnayex b'a mok ch'in iljuke ja israelenio ma wa'ne a'tel sok ja ma'tik tuk chonab' jakele'i.
54—Kechan ta mik'a b'ob' skolta sb'aj ja israelenio ma schono sb'aj a'telili, ti'toni oj b'ob' kan lom ja yajnix k'ot ja k'ak'u oj kan lom ja a'tijum jumasa, cho jach'ni ja yuntikil jumasa. 55Ja we'nlexi jb'ajexni ke'n yuj ja ke'n ka elanik b'a Egipto. Ke'n Dyoson yuj ja israelenio jumasa.
Currently Selected:
Levitico 25: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
