Levitico 24
24
Stalnajel ja ajlub' jumasa
1Ja Dyosi, yal yab' ja Moisesi:
2Ala yab' ja israelenio jumasa, a yi'e jan jitsan aceite olivo, b'a jach' k'ak'u a'kwal oj ajluk b'a snajtsil tsomjeli. 3-4Ja a'tel jawi, ye'n oj yil ja Aaron b'a oj schap lek, b'a jach' snajtil a'kwal oj ajluk ja k'ak' b'a snajtsil jtsomjeli. Ja ajlub' jumasa ti oj ajyuk b'a snajtsil tsomjel ja b'ay ja kandelerio jumasa it toj k'anal tak'in tey b'a yoj snajtsil tsomjeli. Ja ab'al iti, spetsanil k'ak'u oj ja k'u'ukex.
Ja pan sb'a Dyosi
5-6—Tojb'es lajchawe pan sok jitsan arina, i'aj och b'a yoj snajtsil tsomjel. A' cholan chab' chole b'a sat ja mesa b'a toj k'anal tak'in. B'a jujune pan chantike kilo sok snalan.
7—A ochyi ts'ub'il pom b'a sts'e'el ja cholan pan jumasa, ti'xa tsika jastal wax tsikjiki ja jmajtan b'a wala toyjiyon soki. 8Ja pan jawi, spetsanil sk'ak'u'il jijlel t'ilan ti oj ya'ki b'a snajtsil jtsomjel ja pagre, yuj ja ye'n niwan ya'tel yuj ja israelenio jumasa. Ja'ni oj scholuk spetsanil k'ak'u'a.
9—Ja pan jawi, oj b'ob' yabye ja pagre jumasa, kechan ti'ni oj wa'uke ja b'a lu'um pilub'ala, ja ita schol ja jawa yuj ja jun majtanal tsa'ub'ali.
Oj stup ja ma' mi lek wa sta'a ti' ja Dyosi
10-11Jun k'ak'u, yal jun ixuk israelenia sok jun swinkil Egipto syama sb'aje sok pilan israelenio. Ja nanal israelenia sb'i'il Selomit ja stat ja Dibri, tey sok ja k'ole sb'a Dani. Yajni syama sb'aje'i, ja yal ja Selomit ya tajkuk ja Dyosi. Ja'yuj ti yi'aje och yi ja Moisesi, 12ya'we talnuman, man yala ja Dyos jasunk'a oj k'u'laxuk yi ja winik jawi. 13Ja Dyosi, ti yala yab' ja Moisesi:
14Yuj ja mi sb'ejuk sta'awon ti' ja winik jawi, ja'yuj a'wik eluk ja b'a'yexi. Spetsanil ja ma yab' mi sb'ejuk ja jastal sta'awon ti'i, a ya'we kajan ja sk'ab'e b'a s'olom ja winik jawi, a smil'e' ch'ojob'al ton. 15-16Tixa wal yab' ja israelenio jumasa'a: Chikan ma' mi sb'ejuk oj sta' ti' ja Dyosi, ojni milxuka. Israelenio ma mi israelenio'uk, spetsanil ja swinkil ja lugari, ojni miljuk yuj ja.
B'a oj a'juk a wi'i ti oj cho a wa' ja we'n
17-21—Ja ma oj milwanuki, ojni cho miljuk ja ye'na.
—Ja ma oj smil jun chante'i, ojni cho miljuk yi ja schanste ye'na.
—Ay k'a ma syajb'esa, jach'ni ja we'n ojni a yajb'esa, ay k'a ma' ya' el junuk wa sati jach'ni ja we'n cho a elyi junuk ja sb'aj ye'n, ay k'a ma sk'oko junuk wa weji, jach'ni ja we'n cho k'ok yi junuk ja sb'aji, ay k'a ma sk'oko junuk wa b'akeli, jach'ni ja we'n cho k'oko yi junuk ja sb'aj ye'n.
22—Ja ab'al iti, oj makunuk yuj spetsanil kristyano'i, a'nima israelenio ma jun ma' tuk chonab' jakel ojni makunuk yuj ja. Yuj ja ke'n Dyoson yuj ja israelenio jumasa.
23Ja Moisesi, ch'ak yal yab' spetsanil ja israelenio jumasa ja jastal iti, ja'yuj ja ye'nle'i, ch'ak ya'we eluk, ja b'a slugare ja ma' mi sb'ejuk wa sta'a ti' ja sb'i'il ja Dyosi, sok ch'akni smil'e'a. Jach' sk'u'lane spetsanil ja jastal alji yab' ja Moises yuj ja Dyosi.
Currently Selected:
Levitico 24: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
