Levitico 23
23
Ja sk'ak'u'il k'in jumasa tsa'ub'ali
1Ja Dyosi, yal yab' ja Moisesi 2-4ab'i ya' yi ja ab'al jumasa it ja israelenio:
—Ja k'in oj kala wabyex oj ja k'u'lukex b'a oj ja toy'onexi, tsa'ub'alni'a jach' oj ja k'u'lukex jastal iti:
Ja sk'ak'u'il jijleli
—Wake k'ak'u oj b'ob' a'tijananik, b'a sjukili, sk'ak'u'il jijlel, mi ma' oj b'ob' a'tijuk. Chikan b'a kulanexa ojni jijlanika, kechan oj ja tsom a b'ajex b'a oj ja toy'onex.
Ja sk'inil ja pan it mey yi'oj levadura
5—Ja k'in b'a sya'al k'inali, oj ja k'u'lukex b'a yoj a'kwal b'a chan lajune yajtab' ja ixaw b'a Abib. 6-8Jaxa b'a jo' lajune yajtab' b'a ixaw jawi, ja oj k'e a tul'ex yi ja sk'inil ja pan it mey yi'oj levadura. Ja sb'ajtanil k'ak'u, man b'a sjukil oj ja tsom a b'ajex b'a oj ja toy'onex. Ja k'ak'u jumasa jawi, mi ma' oj a'tijuk. Sjukil k'ak'u ja oj ja we'ex ja pan it mey yi'oj levadura, oj cho a tsik ex ja jmajtan b'a oj ja toy'onexi.
Ja sk'inil ja sb'ajtanil sat tek'ul jumasa
9Ja Dyosi, yala yab' ja Moisesi 10ab'i ya' yi ja israelenio ja ab'al jumasa iti:
—Yajni ti'xa ayex b'a lu'um oj ka'wi'exi, t'ilan oj ja wi'ex ochyi jun b'omuk ja pagre ja sb'ajtanil sat ja sebada oj ja wa'wex el b'a wa walajexi. 11Yajni ek'ta ja sk'ak'u'il jijleli, ja pagre oj yi' och ki ja majtanal jawi, jaxa ke'n jel lek oj kil ja ye'n. 12-13Jaxa we'nlex ja k'ak'u jawi jel t'ilan oj ja tsik ex jun jmajtan b'ax ajb'ani yik'il. Ja majtanal jawi jun chej b'a jun jab'il yi'oj, b'a mi yajb'eluk, sok chane kilo arina sokan sok aceite. Oj cho a pek'ex yi nalan prasko ya'lel ts'usub' yuj ja waxa toyowonexi. 14Ja k'ak'u oj ja wi'ex ochyi ja smajtan ja Dyosi, mi jas oj ja wabyex jach'ni ja b'akb'el sat trigo, chikan b'a kulanexa yujni jach' oj ja k'u'ukex ja ab'al ita.
Ja sk'inil ja jastiki
15-16—A'wik ek' chab' tajb'e k'ak'u, tix cho a wa'wex ki yajk'achil majke ja jmajtani, 17-18jach' oj ja k'u'lukex jastal iti, chab' lekil pan b'a tojb'el sok arina sok levadura, chane kilo b'a jujune pan, juke yal chej b'a yi'oj jun jab'il b'a mi yajb'eluk, jun yal wakax, chab' niwak chej. Ja chante jumasa jawi, ti oj ja tsikex b'a sat b'a wax a'xi kajan ja jmajtani, jun jmajtan b'ax ajb'ani yik'il sok jelni lek oj kab'a. 19Jaxa b'a oj ch'ay wa mulexi, oj ja wa'wex ki jun chivo, oj ja wa'wex ki b'a jmajtan chab' yal chej b'a yi'oj jun jab'il, yuj ja oj ja k'an wa sak'anilex sok wa lekilalexi. 20Ja majtanal jumasa iti, ye'n oj ya'ki ja pagre, lajan sok ja pani, sok ja chab' cheji. Jun majtanal waxa wa'wex ki b'a waxa toyowonex, kechan sb'aj ni ye'n ja pagre'a.
21—Ja k'ak'u jawi, oj ja tsom a b'ajex b'a oj ja toy'onex, sok mi ma oj a'tijuk. Chikan b'a kulanexa, t'ilan oj ja k'u'lukex ja jastal wax yala ja kab'ali.
22—Yajnix waj a jach' ex wa walajexi, mok ch'aka tsom'ex spetsanil, mok a tul'ex ja b'a wax mok' a wujilex b'a lu'umi. Ti'xa wa'wex kan b'a oj stul ja ma'tik ajula sb'aj sok ja ma'tik tuk chonab' jakel tey b'a wa chonab'ilexi. Ke'n Dyoson yuj ja israelenio jumasa.
Ja sk'inil ja korneta jumasa
23Ja Dyosi, yal yab' ja Moisesi 24-25ab'i yal yab' ja israelenio ja ab'al jumasa iti:
—Ja sb'ajtanil k'ak'u ja yixawil Etanim.#23:24-25 yixawil Etanim: Ja sjukil ixaw b'a jab'il yuj ja judio jumasa. Jaxa b'a jtiempo ke'ntiki b'a ya'n, snalan ja septiembre sok snalan ja octubre. Sk'ak'u'il jijlel, sok niwan k'in oj ja k'u'lukex. Ja k'ak'u jawi, mi ma' oj a'tijuk yuj ja israelenio, kechan oj ja tsom a b'ajex b'a oj ja toy'onex. Oj ja wa'wex ok'uk ja korneta jumasa, jaxa jmajtan oj ja wa'wex ki'i, ti oj ja tsik ex b'a sat b'a wax a'xi kajan ja jmajtani, yuj ja waxa toyowonexi.
Ja k'ak'u oj ch'ayjuk mulali
26Ja Dyosi, cho yal yab' ja Moisesi:
27-32—Ja b'a slajunil k'ak'u ja yixawil Etanim, ja sk'ak'u'il b'a oj ch'ayjuk ja mulali. Ja k'ak'u jawi, oj ja tsom a b'ajex b'a oj ja toy'onex, sok oj ja kom wa wa'elexi, ja k'ak'u jawi, yuj ja jel waxa toyowonexi ja'yuj ja jmajtan oj ja wa'ex k'i'i, ti oj ja tsikex b'a sat b'a wax a'xi kajan ja jmajtani, yuj ja ja'ni sk'ak'u'il b'a oj ch'ay spetsanil wa mulexa, mi ma' oj a'tijuk a wujilex. Ja ma mi oj sk'u'uk ja ab'al jumasa iti, oj nutsxuk ja b'a chonab' jawi.
—Ja k'ini, oj ja noch ex yi b'a och k'ak'u b'alune yajtab' ja ixawi, oj ch'ak man b'a och k'ak'u b'a lajune yajtab'. Ja iti jun ab'al b'a jach' oj ja k'u'lukex spetsanil k'ak'u.
Ja sk'inil ja lejchupati
33-43Ja Dyosi, yal yab' ja Moisesi ab'i yal yab' ja israelenio ja ab'al jumasa iti:
—B'a jo' lajune yajtab' ja yixawil Etanimi, yajni ch'akta a tul'ex ja sb'a'al wa walajexi, mi ma oj b'ob' a'tijuk, spetsanil ja kristyano'i oj stsom sb'aj b'a oj stoy'one. Ja' k'ak'u jaw oj stulyi jun niwan k'in b'a oj ja toy'onexi, oj alb'uk juke k'ak'u. Spetsanil ja k'ak'u jumasa jawi, man b'a swaxakil k'ak'u, ti oj ja tsik exki ja jmajtan b'a sat b'a wax a'xi kajan ja jmajtani, oj ja k'u'lukex jun niwan kulto. Man sb'ajtanil k'ak'u masan b'a swaxakil, sk'ak'u'il k'in a wujilex sok sk'ak'u'il jijlel. Ja sb'ajtanil k'ak'u oj ja wi'ex och ja sat tek'ul jumasa b'a lektiki, cho le'awik sk'ab xa'an k'ab' te' b'a oj ja k'u'lukex ja lejchupati. Sjukil k'ak'u ja janek' oj ajyuk ja k'ini ti oj ajyanik b'a yib'el ja lejchupat jawi, b'a ti oj jak a k'ujolex yuj ja ti ka elanik jan b'a Egipto, yuj ja ti'ni ajyiyex b'a yib' lejchupat ja k'ak'u jawa.
—Ja k'in iti, t'ilan oj ja k'u'lukex b'a spetsanil ja jab'il jumasa; jun ab'al b'a mi oj b'ob' a k'okex. Ke'n Dyoson yuj ja israelenio jumasa.
—Ja' spetsanil ja k'in jumasa it ja t'ilan oj ja k'u'lukex b'a oj ja toy'onexi. Ja b'a k'in jumasa iti, oj ja k'u'lukex jun niwan tsomjel, sok oj ja wa'wex ki spetsanil tik'e majtanal, ja chikan ja jas oj ja wa'wex ki b'a spetsanil k'ak'u, ja k'in jumasa iti, ja sb'a oj ja kis'ex lek ja sk'ak'u'il jijleli, sok ja sb'a oj ja k'eb' exki ja jmajtan waxa k'ana oj ja wa'ex ki'i.
44Ja Moisesi, jach' ch'ak sje' yi jastal it ja israelenio jumasa, ja jastal ja k'in jumasa b'a stoyjel ja Dyosi.
Currently Selected:
Levitico 23: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
