Levitico 21
21
Ja jastik oj sk'u'luk ja pagre jumasa
1Ja Dyosi, yal yab' ja Moisesi, ab'i yal yab' ja yuntikil ja Aaron ja ab'al jumasa iti:
—Ja we'nlexi, pagre'ex, mi oj b'ob' a yam'ex jun cham winik, b'a jach' mi oj ja ta'ex kistal. 2-4Ja b'a oj b'ob' a yam'exi, jun swinkil a najex ma jun a moj alijelex. Jach' jastal jun a watsex mi nupaneluk cho ti' ajyi a mokex. Yuj k'a nupanel mok ni a yam'ex ja sb'ak'tela.
5—Mok a jox ja stso'otsil wa olomexi, jach'ni wa wisimexi, mok a yajb'es wa b'ak'telex jastal wa sk'u'lane ja tuk jumasa ma' cham k'ujol ayi. 6Ja we'nlexi, pilub'alex b'a oj a'tijananik jmok, ja'yuj sb'ej mok apil ab'ajex sok ja kab'ali. Toj ajyanik yuj ja we'n waxa wi'ajex och ja jmajtan jumasa b'a wax tsikxi b'a jtoyjeli.
7—Mok nupananik sok jun ixuk ma' tuktukil winik wa sta'a sb'aj sok, jach'ni sok jun ma jipub'al kani, sok jun ma lo'lanub'al, yuj ja we'n, pilub'alex b'a oj a'tijananik jmok.
8—Jel t'ilan oj ja pila b'ajex sok spetsanil ja jastik mi lekuk yuj ja we'n waxa wa'wexki ja wa'el b'a jtoyjeli. Jel t'ilan pilan oj ja wa'a b'ajex, yujni pilanon ja ke'n yuj ja tuk dyos jumasa'a. Ke'n Dyoson yuj ja israelenio, jaxa we'nlexi ke'n jpilunejex.
9Jun pagre, wan k'ax ya'a sb'aj ja yak'ix b'a ya'telta dyos k'u'lub'al jastal jun ixuk ma' tuktukil winik wax ya'a sb'aj sok, wax ya sta' k'ixwel ja stati, jaxa ak'ix jawi, tsikub'al oj chamuk.
Ja jas oj sk'u'luk ja ma' niwan ya'tele'i
10—Ja ma' niwan ya'tel yuj ja pagre jumasa, ye'nani niwan ya'tel yuj spetsanil ja tuk pagre jumasa'a, yuj ja yajni tsa'ji b'a oj ya'teltayoni, yi'aj ja pal k'u' jastal wa slapa ja pagre jumasa, cho pek'ji sb'a aceite tsa'ub'al b'a s'olomi, ja'yuj ja ye'n mi sb'ejuk mi oj sjix lek ja s'olomi, sok mi oj b'ob' sch'i' ja sk'u' b'a oj sje' yuj cham k'ujol ayi. 11-12Mi oj b'ob' eluk ja b'a yoj na'its b'a wax ajyi ja tsomjeli, mi oj b'ob' och mojan sok jun cham winik, a'nima ja'uk ja snan stati, yujni oj sjom sb'aja, ojni cho sjom ja na'its b'a wax ajyi ja tsomjeli. Ke'n ja Dyoson yujile'i, ke'n jpilunej b'a oj a'tijuk jmok. Ja'yuj pek'xi aceite b'a s'olom yuj ja tsa'ub'ali.
13-14Ja ma' niwan ya'tel yuj ja pagre jumasa, t'ilan oj nupanuk sok jun ixuk b'a smoj alijel sb'a sok, b'a mito sta'unejuk sb'aj sok winik. Mi oj b'ob' nupanuk sok jun ixuk b'a lo'lanub'al, sok jun viwuda, sok jun ma jipub'al kani, sok jun ixuk ma' tuktukil winik wax ya'a sb'aj sok. 15Jach' jastal it b'a mi oj sjom ja yintil jumasa, sok toj oj ajyuke b'a ka'teli. Ke'n Dyoson yuj ja israelenio, ke'n jpila ja ma' niwan ya'tel yuj ja pagre jumasa, b'a oj a'tijuk jmok.
Mi k'a lek ay mi oj b'ob' och pagre'il
16Ja Dyosi, yal yab' ja Moisesi 17-21ab'i yal yab' ja smoj alijel Aaron ja ab'al jumasa iti:
—Ay k'a jun a wuntikil mi lek ay ja sb'ak'teli, mok och mojan sok ja b'a wax a'xi kajan ja jmajtani b'a oj ya'ki ja jmajtan b'a wax tsikxi b'a jtoyjeli. Mi oj b'ob' och pagre'il jun tupel sat, jun ma ts'elan wax k'elwani, jun renko, jun ma mey sk'ab', jun k'uju patik, jun tsapo, jun ma mi ts'ikanuk, ma jun ma ay yi'oj chamel ja sts'ujmili, ma jun ma pach'an ja sk'unili. 22Ay k'a ma jach' ay jastal jawi, ojni b'ob' yabye ja jmajtan wax ya'ki ja israelenio jumasa, 23kechan mi oj b'ob' ochuke mojan ja b'a niwan lechan k'u'uts b'a snajtsil tsomjeli, jach'ni ja b'a'y ja b'a wax a'xi kajan ja jmajtani. Yuj k'a jach' a k'u'lanexi, ojni a wa'wex sta' kistal ja snajtsil jtsomjela. Yuj ja Ke'n Dyoson yuj ja israelenio, ja'yuj ke'n wax tsa'a ja ma oj a'tijuk jmoki.
24Ja Moisesi, ch'ak ya'yi spetsanil ja ab'al jumasa it ja Aaron sok ja yuntikili, sok spetsanil ja israelenio jumasa.
Currently Selected:
Levitico 21: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
