Levitico 20
20
Ja niwak mulal jumasa
1Ja Dyosi, yal yab' ja Moisesi 2-3ab'i yal yab' ja israelenio ja ab'al jumasa iti:
—Chikan machunk'a, jun israelenio ma jun ma tuk chonab' jakel tey tiwi, wan k'ax ya'a junuk ja yuntikil b'a smajtan ja dyos Moloki, wani sta'a smul jmoka, sok mi skisa ja snajtsil jtsomjeli. Oj miljuk el yuj ja kristyano jumasa ja ma' jach' oj sk'u'luki, jach' oj ch'ay sna'jel ja b'a chonab' jawi. 4Mi k'axa milawex ja ma oj sk'u'l jastal jawi, 5ke'n oj ka stup sok spetsanil ja swinkil snaji, oj ch'ay el sna'jel b'a schonab'il ja israelenio jumasa. Mi kechanuk ye'nle, ojni cho jch'ay sna'jel spetsanil ja ma wa stoyo ja dyos Moloki.
6—Ay k'a ma oj waj sok ja tantik k'intanum jumasa, jel oj ya'we tajkukon sok ojni jch'ay sna'jele'a.
7-8—Pila b'ajik kechan ke'n oj ajyanik jmok; toj ajyanik k'u'anik spetsanil ja ab'al jumasa. Ke'n Dyoson yuj ja israelenio jumasa; jaxa we'nlexi, jb'ajex ni ke'na'a.
9—Ta ay k'a ma mi sb'ejuk oj sta' ti' ja snan stati, ojni ch'ay sna'jela.
10—Ay k'a ma oj sta' sb'aj sok jun ixuk sche'um pilan winik, oj jch'ay sna'jele schawanile.
11—Ay k'a ma sta'a sb'aj sok ja sche'um ja stati, oj jch'ay sna'jele schawanile. Yuj ja lajan sok ja'ni wa sta'a sb'aj sok ja stati.
12—Ay k'a ma sta'a sb'aj sok ja yalib'i, oj jch'ay sna'jele schawanile, yujni jel niwan ja mulal jastal jawa.
13—Ay k'a jun winik wa sta'a sb'aj sok smoj winikil, schawanil oj ch'ay sna'jele.
14—Ay k'a ma wa sche'uman ja snan ja sche'umi, wani sch'ika sb'aj jun niwan mulala. Yoxwanile oj tsikxuke. B'a jach' mi ma oj sk'u'l pilan majke ja jastal jawi.
15-16—Jun winik ma jun ixuk wa sta'a sb'aj sok chante, oj ch'ay sna'jel ja kristyano jastal jawi, jach'ni ja chante oj sta' sb'aj soki.
17—Ay k'a ma wa sta'a sb'aj sok ja swatsi, wani sch'ika sb'aj jun niwan mulala, ye'nani oj stup ja smula', sok ti b'a sti' sat ka kristyano jumasa, oj nutsjuke el schawanile b'a chonab' jawi.
18—Ay k'a ma wa sta'a sb'aj sok jun ixuk tey ja skuxili, schawanile oj nutsjuke b'a chonab' jawi.
19—Ay k'a ma wa sta'a sb'aj sok ja sme'juni, schawanile oj a'ji stup ja smule' yuj ja lom smoj alijel sb'aje'i.
20—Ay k'a ma wa sta'a sb'aj sok ja sche'um ja statjuni, mi oj ajyuk yuntikile yuj ja lom wax ya sta' k'ixwel ja statjuni.
21—Ay k'a ma wa sta'a sb'aj sok ja smoj alijel ja sche'umi, wani sch'ika sb'aj jun niwan mulala, sok mi oj ajyuk yuntikile.
Jel lek sk'u'ajel ja yab'al Dyosi
22—Oj k'a ch'ak a k'u'ukex ja kab'al jumasa, mi oj ka elanik b'a lu'um oj ka' wi'exi, yujni a b'aj we'nlexa. 23Kechan, mokni waj ja k'u'lukex ja we'nlex ja jastal wa sk'u'lane ja ma'tik ti' aye tiwi, yuj ja jas mi lek wa sk'u'lane'i, ja'yuj ya'we'ni tajkukona. 24Ja lu'um b'a'ye ja ye'nle'i, we'n oj ka'wi'ex, ja lu'um jawi jel lek oj ajyuk wa jas a b'ajexi.
25-26—Ke'n Dyoson yuj ja israelenio jumasa. Ke'n jpilawex ja b'a tuk kristyano jumasa, b'a kechan ke'n oj b'ajukex. Ja'yuj jel t'ilan oj ja na'ex sb'aj ja chante jumasa, b'aya leki sok b'aya mi lekuki, b'a jach' mi oj jomanik ja we'nlex ta yuj k'a a yamawex jun chante b'a mi lekuki. Ja we'nlexi sb'ej toj oj ajyanik. Ke'n Dyoson yuj ja israelenio jumasa tojni ayona.
27—Jun winik ma jun ixuk wa'n sna'jel b'a mi sb'ejuk wa sk'ana oj k'intanuk, ja kristyano jastal jawi, ch'ojob'al ton oj chamuke.
Currently Selected:
Levitico 20: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
