Levitico 19
19
Ja ab'al jumasa
1Ja Dyosi, yal yab' ja Moises 2ab'i yal yab' ja ab'al jumasa it ja b'a kulane israelenio:
—Ke'n Dyoson yuj ja israelenio jumasa, ja ke'n tukon yuj ja tuk dyos jumasa. Ja'yuj ja we'nlexi, jel t'ilan tuk oj ja wa'a b'ajex yuj ja tuk kristyano jumasa.
3—Kisawik wa nan a tatexi, cho kisawik ja sk'ak'u'il jijleli. Ke'n Dyoson yuj ja israelenio jumasa.
4—Mok a toy'ex k'u'lub'al dyos, mok a nol'ex dyos k'u'lub'al mak'ub'al tak'in. Ke'n Dyoson yuj ja israelenio jumasa.
5—Yajni oj ja wa'wexki jun jmajtan b'a oj ja k'an a sak'anilex, jach' oj ja k'u'lukex ja jastal wax k'ana.
6—Ja sb'ak'tel ja jmajtan oj ja wa'wex ki'i, t'ilan oj ch'ak a wabyex ja k'ak'u jawi, ma ja pilan k'ak'u, ayto k'a ja skan b'a yoxil k'ak'u ch'akan tsikawik. 7Ay k'a ma mi oj sk'u'uk ja iti 8ojni sta smula, sok oj nuts el b'a chonab' jawi.
9—Yajnixa tuluwex ja sb'a'al wa walajexi, mok ch'ak a wi'ex spetsanil, ay k'a b'a wax mok' a wujilex b'a lu'um ti'xax kana. 10Jach'ni ja sat ts'usub'i, mok ch'ak a tul'ex spetsanil, ja b'a wax mok' a wujilex b'a lu'umi ti'xax kana. A'wikan b'a oj stul ja ma ajula sb'aji, jun israelenio ma jun ma' tuk chonab' jakel. Ke'n Dyoson yuj ja israelenio jumasa.
11—Mok elk'ananik, mok a le'ex ab'al, mok a lo'la a b'ajex, 12mok a ta'ex ti' lom ja jb'i'ili. Ke'n Dyoson yuj ja israelenio jumasa.
13—Mok a wixtala'uk wa mojexi, mok a japyi ja jas b'aji.
—Mok a wal b'a mi oj ja tup wa wa'tijum b'a jujune k'ak'u.
14—Mok a k'e'na ja ma' mix yab' k'inali, mok a wa wex sk'ojchuk yok ja ma' mix yila k'inali. Je'awik jastal wala kiswaniyex. Ke'n Dyoson yuj ja israelenio jumasa.
15—Ta oj k'a a tojb'esex jun lo'il, toj ajyanik, mok ma a koltayex a'nima jel ja jastik sb'aji ma yuj jel ajula sb'aj.
16—Mok ma a wab'alta, b'a oj b'ob' a kolta jawa mojexi alawik ja smeranili. Ke'n Dyoson yuj ja israelenio jumasa.
17-19—Mi lom la tajki, mok ma' b'uk'an oj ajyan sok. Ay k'a ma oj ja kom'ex alawik yab' toj, mok a tsajlayex ja jas mi lek wa sk'u'lan ja tuki.
—Na'awik jel t'ilan oj ja yajta wa mojex ja jastal waxa yajta a b'aj ja we'nlexi.
—K'u'anik ja kab'al jumasa. Ke'n Dyoson yuj ja israelenio jumasa.
—Mok wa sta' sb'aj sok wa wakax tuk chante. Mok a ts'un tuktukil inat b'a junxta alaj. Mok a lap wa k'u'ex b'a ts'isub'al sok tuktukil yelaw ja ts'okob'i.
20Ay k'a ma wa sta'a sb'aj sok jun ixuk a'tijum sok ojxa k'otuk ja k'ak'u oj nupanuki, yuxta mitox el ja b'a ya'teli, ja ma oj sk'u'l jachuki, ojni stupyi ja kerem ma oj nupanuk sok ja ak'ix jawi. Mi oj ch'ay sna'jel ja ak'ixi jach'ni ja keremi, yuj ja mitox el ja b'a ya'tel ja ak'ixi. 21Jaxa b'a oj ch'ayi ja smul ja winik jawi, t'ilan oj yi' och jun chej b'a snajtsil tsomjeli 22oj ya'yi b'a sk'ab' ja pagre, ye'nxa ja pagre oj ya'ki ja ke'na.
23—Yajni ti'xa ayex b'a wa chonab'ilexi, ja tek'ul jumasa oj ja ts'un'exi, oxe jab'il mi oj b'ob' a lo'ex ja sati. 24Jaxa b'a schanil jab'ili, oj ja k'u'l'ex jun k'in b'a oj ja wa'wex yi b'a sti sat ja Dyos spetsanil ja sat wa tek'ulexi, yuj ja tsa'ub'al ja ma' ya'wi'exi. 25Kechan, ja b'a sjo'il jab'ili, oj b'ob' a lo'ex ja tek'ul jumasa, yuj ja jel oj ajyuki. Ke'n Dyoson yuj ja israelenio jumasa.
26—Mok a wabyex ja jas ay yi'oj chik'i.
—Mok a tsajlayex ja jas wa sk'u'lan ja tantik brujo.
27-28—Mok kechan a k'uts'ex ja sjoyanal ja stso'otsil wa olomexi, mok kechan a k'uts'ex ja sni' wa wisimexi, moka nos wa b'ak'telex b'a oj ja wa'wex och senya b'a oj b'ob' a toy'ex ja cham winik jumasa. Ke'n Dyoson yuj ja israelenio jumasa.
29—Mok a t'en wa wuntikilex ixuk b'a oj schon sb'aj. Sok ja jawi, mi jas lek oj jak sb'aj ja sb'ak'teli, cho mi jas lek oj sk'u'lyi ja jchonab'iltiki.
30—Kisawik ja sk'ak'u'il jijleli, cho kisawik ja snajtsil jtsomjeli. Ke'n Dyoson yuj ja israelenio jumasa.
31—Mok jas a job' ex yi ja tantik k'intanum jumasa. Yuj k'a ay jas a job'owex yi'e, ojni jomanika. Ke'n Dyoson yuj ja israelenio jumasa.
32—Kisawik ja ma' ayxa sk'ujol a wujilexi, k'e'anik tek'an ja yajni waxa ta'a b'ajex soke'i.
33—Mok a wixtala'ukex ja ma' tuk chonab' jakel tey a mokexi. 34Jach' ilawik jastal jun israelenio, yajtayik jastal waxa yajta a b'ajex ja we'nlexi, cho jach'ni ja we'nlexi, mi yuj ti'ukni a b'ajex b'a Egipto'a. Ke'n Dyoson yuj ja israelenio jumasa.
35-37—Mok lo'lananik sok ja jas likub'al waxa chonowexi. Ts'ikan lek awik ochuk ja b'a slikulab'il a wujilexi. Yuj ja ke'na Dyosonex ka elanik b'a Egipto. Ja'yuj k'u'anik spetsanil ja ab'al jumasa wax ka'wi'exi. Ke'n Dyoson yuj ja israelenio jumasa.
Currently Selected:
Levitico 19: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
