Levitico 16
16
Ja niwan k'ak'u b'a sch'ayjel mulali
1Cham chab' yuntikil ja Aaron yuj ja ye'n jel ochye mojan b'a sti' b'a wax a'xi kajan jas majtan ja Dyosi, jaxa Dyosi ti yala yab' ja Moisesi:
2—A sna' jawa moj alijel Aaroni, ja b'a snajtsil tsomjel man b'a yojol ochi, tsa'ub'al lek, ti k'ajyel wax je'a jb'aj tiwi, yuj ja ti'ni ay tiw ja skajonil strato ja Dyosi. Ja'yuj mi chikanxta jas k'ak'u oj ochuk ja Aaroni, jaxa ta tey tiw ja yajnix waj je' jb'aji, ojni chamuka.
3-4—Kechan ta wa sna'a oj ochuk ja b'a tsa'ub'al b'a snajtsil tsomjeli, a noxjuk lek, a slap ja spal k'u'i; a ya ochuk ja syujch'ili, a slap ja smajkil s'olom. A ya'ki jun yal wakax b'a jmajtan b'a oj ch'ay ja mulal jumasa, a stsik jun chej b'a oj stoy'oni.
5-6—Ja iti, ja'ni b'a oj ch'ay yi ja smul ye'ni, sok ja sb'a yuntikili, jaxa b'a oj ch'ay yi ja smul ja kristyano jumasa, t'ilan oj ya'ki chab' chivo sok jun chej, b'a ye'n oj a'juk yi b'a sk'ab' yuj ja israelenio jumasa.
—Ja cheji, ja oj stsik b'a oj stoy'oni. 7-9Ke'n oj kal yab' ja schivo'il oj ya'ki ja ke'n, sok b'a'ya oj ya'yi ja tan pukuj Azazel it tey b'a takin lu'um k'inali. Ja chivo b'a oj ya'ki ke'n, ti oj ya'ki b'a wax ajyi ochel b'a snajtsil tsomjeli, ja' jmajtan b'a oj ch'ay ja mulali. 10Ja chivo sb'a tan Azazeli, oj kan sak'an ti oj smil b'a takin lu'um k'inal.
11—Tsa'an, yajni ya'taki ja yal wakax b'a oj ch'ayi ja smul ja Aaron sok ja yuntikili, 12ti oj yi' ja altar b'a wax tsikxi ja pomi, sok chab' b'eche sts'ub'il pom b'a wax ajb'ani yik'il. Oj ya och chakal k'ak' sb'a ja b'a wax a'xi kajan ja jmajtani 13sok ja iti, ja oj syam och b'a snajtsil tsomjel tsa'ub'al it tey b'a sts'e'el ja niwan k'u'utsi. Ti oj stik tiw b'a yoj chakal k'ak' ja pomi, man oj sb'ut' el tab' ja smajkil ja skajonil strato b'a jach' mi oj chamuk ja ye'n.
14—Tsa'an oj sla' b'a yoj chik' ja yal sk'ab' ja Aaroni, ti oj stsijuk b'a jun sts'e'el ja smakb'al sti' ja skajonil strato. Oj cho stsijuk juk majke b'a stojolili. 15Tsa'an oj cho yi' jan ja jun chivo sb'a jmajtan b'a oj ch'ay ja smul ja kristyano jumasa; jaxa schik'eli, ti oj yi'och b'a snajtsil tsomjel b'a man yojol b'a tsa'ub'al lek, jach' oj cho sk'u'l jastal sk'u'lan sok ja schik'el ja yal wakaxi. 16Ja Aaroni, Jach' oj sta jastal oj b'ob' ch'ayjuk ja mulal jumasa, cho jach'ni ja israelenio oj cho sak' juk yi ja smule b'a oj b'ob' ochuke b'a snajtsil tsomjel b'a man yojol b'a tsa'ub'al leki.
Jastal oj sak'xuk ja b'a wax a'xi kajan ja majtani
17—Yuj k'a tey tiw ja Aaron wa'n sk'anjel b'a oj ch'ayjuk ja smul ja kristyano'i, mi ma oj b'ob' och mojan b'a snajtsil tsomjeli. 18Yajnix el ja tiwi, toj oj waj man b'a wax a'xi kajan ja jmajtani oj sak' lek. B'a schik'el ja yal wakax sok sb'a chivo oj sla' ja yal sk'ab'i, ti oj sjaxyi b'a schikin jumasa ja b'a wax a'xi kajan jas majtan ja Dyosi, 19b'a oj ya'kan lek ja b'a wax a'xi kajan jas majtan ja Dyosi, oj cho stsijuk yi juk majke smoj yuj ja smul ja israelenio jumasa, oj ya'kan lek b'a kechani ke'n oj makunuk kuja.
Ja chivo jekji b'a takin lu'um k'inali
20—Yajnix ch'ak sk'u'luk ja jastal it ja Aaroni, ti'xa oj ya'ki, ja jun yal chivo ya'oj kan sak'ani. 21-22Oj ya' kajan schab'il ja sk'ab' b'a s'olom ja chivo jawi, ti oj och yal yab' spetsanil ja smul ja israelenio jumasa, jachuk ye'n oj ch'ak skuch ja smul ja kristyano. Ti'xa oj i'juk och b'a takin lu'um k'inal ja chivo jawi, ye'nxa naka kuchan yuj ja smul sle'a ja kristyano jumasa.
23—Tsa'an yuj ja jawi, ti'xa oj ochuk ja Aaron b'a yoj snajtsil ja tsomjela, sopo ja sk'u' it och sok b'a tsa'ub'al leki, 24b'a wax chuk'xi b'a tsa'ub'al b'a ja'ita schol ja jastal jawi, ti' slapa ja sk'u' it k'ajyelni wa slapa. Ti'xa oj stsik ja jmajtan wax yaki'i, sok ja it wax ya'ki ja kristyano jumasa, ja'ni b'a oj ch'ayi ja smul ye'n, sok sb'a kristyano jumasa. 25Oj ch'ak stsik b'a sat b'a wax a'xi kajan ja jmajtani spetsanil ja skojlelal ja majtanal jumasa wax a'xi b'a wa sch'aya ja mulali.
26—Ja ma oj yi'och ja chivo b'a takin lu'um k'inali, t'ilan oj schuk' lek ja sk'u' swexi, oj noxjuk lek, b'a jach' oj b'ob' och pilan majke ja b'a'y ja kristyano jumasa. 27Ja jastik oj kan b'a yal wakax sok b'a chivo, oj jipxuk el najat ja b'a'y ja kristyano'i, ti oj tsikxuk tiwi. 28Ja ma' oj waj stsiki, oj schuk' lek ja sk'u' swexi, oj noxjuk lek, ti oj b'ob' ochuk ja b'ay ja kristyano jumasa'a.
29-31Ja ab'al iti, mi kechan ye'n oj makunuk yuj ja israelenio jumasa, oj cho makunuk yuj ja ma'tik jakel b'a tuk chonab' ma' tey b'a yoj chonab'i, b'a sjukil k'ak'u ja b'a yixawil Tebet. Mi oj a'tijananik, sok mi jas oj ja wabyex. Snajtil ja k'ak'u oj ja kom wa wa'elexi, ja' k'ak'u jaw oj ch'ay spetsanil wa mulexi.
32—Ja a'tel iti, jun pagre oj sk'u'luk, oj slap ja snajtil k'u' it jel tsamali, 33oj sak' lek ja b'a snajtsil tsomjel b'a tsa'ub'al lek sok b'a wax a'xi kajan jas majtan ja Dyosi, cho jach'ni ja pagre jumasa, sok spetsanil ja kristyano'i. 34Ja iti, a petsanilex t'ilan oj ja k'u'lukex jun majke smoj b'a jab'il jumasa b'a jach' oj b'ob' jch'ay a wi'ex wa mulexi.
Spetsanil ja jas yala ja Moisesi, jach'ni b'ob'a.
Currently Selected:
Levitico 16: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
