Levitico 15
15
Ja tuk jastik mi lekuki
1Ja Dyosi, yala yab' ja Moises sok ja Aaroni 2ab'i yal'e yab' ja israelenio ja ab'al jumasa iti:
—Spetsanil winik ma wax k'a b'a sk'unili, ja winik jawi, yujni kistal aya, 3A'nima wax el spojwil ma miyuk.
4-7—Jach'ni ja ch'at b'a wax way ja winik jawi kistalni'a, cho jach'ni b'a wax kulani. Ay k'a ma syama ja winik iti, ja swaynub'i ma ja skujlayub'i, wa sb'ats'a kistal man yoj a'kwal, sok t'ilan oj schuk' lek ja sk'u' swexi, oj cho noxjuk lek.
8—Ja winik jawi, wan k'a stsuj b'an junuk ja ma lek ayi, wax ya' sta' kistal man yoj a'kwal, t'ilan oj schuk' lek ja sk'u' swexi, sok oj noxjuk lek.
9—Ja winik jawi wan kax kulani b'a jun siya b'a kawu wax ya sta' kistal. 10Ay k'a ma syama yi ja sk'ab' ja winik jawi, kistal wax kan man och a'kwal t'ilan oj schuk' lek ja sk'u' swexi, oj cho noxjuk lek. 11Cho jach'ni oj sk'u'l yi ja ma' syamunej ja winik jaw ta yuj k'a mito sak'a ja sk'ab'i. 12Spetsanil lu'um oxom ta b'a oj syam ja winik jawi, oj ch'ak pojxuk sok spetsanil ja te' b'a oj syami, oj sak'xuk lek.
13—Yajnix tojb'i ja winik jawi, t'ilan oj smajla juke k'ak'u, tsa'an oj b'ob' schuk' ja sk'u' swexi, oj noxjuk sok ya'lel sat ja'. Kechani jach' oj b'ob' tojb'uka. 14B'a swaxakil k'ak'u oj waj sje' sb'ajyi ja Dyos b'a wax ajyi ochel b'a snajtsil tsomjeli. Oj yi'och chab' yal pumus sok chab' yal tortola, ye'n oj k'ot b'a sk'ab' ja pagre. 15Jaxa pagre oj ya'yi june b'a smajtan ja Dyos b'a oj sch'ay ja mulal jumasa, jaxa juni oj stsiki yuj ja wa stoyowoni. Jach' oj b'ob' aljuk, lekxa ay ja ma' mi lek ay ajyi.
16—Jun winik wan k'a spek'a lom ja inat yi'oj ja sb'ak'teli, kistal wax kan man yoj a'kwal, jel t'ilan oj sak' lek spetsanil ja sb'ak'teli. 17Ta wan k'ax ko' sb'aj t'ujan yintil winik jun k'u'uts ma b'a jun ts'u'um, kistal wax kan man yoj a'kwal, t'ilan oj sak'xuk lek.
18—Jun winik sok jun ixuk ta wan k'a sta'a sb'aje. Kistal wax kanye man yoj a'kwal, jel t'ilan oj nochjuke lek.
Kistal b'a ixuk
19—Jun ixuk ti k'a ay sok ja skuxili, juke k'ak'u ti oj ajyuk sok ja chamel jawi, sok kistalni oj ajyuka. Ay k'a ma oj syam ja ixuk jawi, 20-23ma ja sch'ati, ma ja chikan jastik wa syama ja ixuk jawi, kistal oj ayuk man och a'kwal, t'ilan oj schuk' lek ja sk'u' swexi, oj cho noxjuk lek. 24Ay k'a ma sta'a sb'aj sok ja ixuk jawi, juke k'ak'u kistal oj ajyuk, ja jastal kistal ay ja ixuki, ojni cho ek' sb'aj ja winika. Jach'ni ja ch'at b'a wax wayi, kistalni oj kanuka.
25—Jun ixuk yuj k'a jelxa jitsan k'ak'u wa'n yiljel ja skuxili, ek'ta ja jastal k'ajyel wax yila, yujni kistal ay ja ixuk jawa. 26Jach'ni, ja sch'at b'a wax wayi, ja sbanko wax kulani, nakani kistala. 27Spetsanil ja ma oj syam ja jastik jumasa jawi, kistalni oj ajyuke man och a'kwala, t'ilan oj schuk' e' ja sk'u' swexe'i, oj cho noxjuke lek.
28—B'a oj cho na'xuk yuj lekxa ay ja ixuk jawi, oj yajtab'en juke k'ak'u man ch'ak yil ja skuxili. 29Jaxa b'a swaxakil k'ak'u, oj yi' jan chab' pumus sok chab' tortola, ti oj yi' och yi ja pagre b'a wax ajyi ochel b'a snajtsil tsomjeli. 30June ja yal chan jawi, oj yi' ja pagre, oj ya'yi b'a smajtan ja Dyos b'a oj sch'ay ja mulal jumasa, jaxa juni oj sts'ik ki' yuj ja wa stoyowoni. Jach' wax tojb'i jastal it ja ixuk ma mi lek ay ajyi.
31—Jaxa we'nlex Moises, Aaron, t'ilan oj ja wal'ex yabye mok kistal ajyuke ja israelenio jumasa, yuj k'a mi oj sk'u'uke, ojni ch'ay sna'jele'a, yuj ja toj kistal wa'ne sb'ut'jel k'ot ja yoj snajtsil jtsomjeli.
32-33—Ja ab'al jumasa iti, ja' sb'aj ja winik sok ja ixuk ma kistal wax ajyi—.
Currently Selected:
Levitico 15: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
