Levitico 14
14
Sak'jel k'a'el b'ak'tel jumasa
1Ja Dyosi, yal yab' ja Moisesi:
2—Yajni oj ja wal yuj tojb'ita ja ma' k'a'el sb'ak'teli, jach' oj ja k'u'l jastal iti:
—Ja ma' mi lek ayi, t'ilan oj waj sje' sb'aj yi' ja pagre, 3-4oj eluk b'a snaj b'a oj k'eljuk jastal ayi. Yuj k'a lekxa ay, ja pagre oj sjek sk'anjel chab' yal chan, jun mak'e segro, xe'n chakal k'u'uts, jun yal b'ome isopo. 5Oj ch'ak ya' och b'a jun oxom, sok ya'lel sat ja' oj ya' ochyi ti oj smil tiw june ja yal chani. 6Tsa'an oj cho yi' ja pilan yal chani, ja segro, ja chakal k'u'uts sok ja jun b'ome isopo, ja schik'el ja b'ajtan yal chani, ti oj waj stsijuk b'a sat ja'. 7Tsa'an oj cho stsijuk yi juk majke ja ma' mi lek ay ajyi yuj ja tojb'ita, yajnix ch'ak yal yuj lekxa ayi ti oj sijpa el ja pilan yal chana.
8—Jaxa ma' mi lek ay ajyi, oj schuk' lek ja sk'u' swexi, oj noxjuk lek, oj snok lek ja stso'otsil ja sb'ak'teli. Jach' oj stojb'es lek sb'aj, b'a oj b'ob' och jun majke smoj ja b'a slu'ume'i, a'nima juke k'ak'u mi oj ajyuk yoj na'its, mi oj b'ob' ochuk ja b'a yoj snaji. 9B'a sjukil k'ak'u oj cho schuk' jun majke smoj ja sk'u' swexi, oj noxjuk lek, oj snok lek ja stso'otsil ja sb'ak'teli. B'a jach' lek oj kanuka.
10Ja ma' tojb'i, b'a swaxakil k'ak'u, oj yi'jan oxe chej b'a smajtan ja Dyosi, wake kilo sok snalan arina wots'ob'al sok aceite, sok jun kwarta aceite. Ja cheji chab' swaw sok jun snan, b'a mey syajb'el. 11Ja pagre ti oj yi' och b'a wax ajyi ochel b'a snajtsil tsomjel sok ja ma' mi lek ay ajyi, sok ja smajtan wax ya'yi ja Dyosi. 12Ti oj yi' june ja chej sok ja aceite, oj ya'yi tiw ja smajtan ja Dyosi. Ja iti, jun majtanal b'a laman oj ajyanik jmok.
13—Ja pagre ti oj smil ja chej b'a k'ajyelni waxa wa'wex ki' ja jmajtan b'a laman oj ajyanik moki, cho jach'ni ja majtanal it waxa wa'wexki b'a waxa toyowonexi. Ja tiwi, yujni ja' ita schol pilub'ala. Ja chej oj ja mil'ex b'a laman oj ajyanik moki, ye'n oj yi' ja pagre, cho jach'ni ja jun oj ja wa'wexki b'a oj ch'ay ja mulali. Schab'il ja majtanal jawi, tsa'ub'alni'a.
14—Ja pagre oj sla' ja yal sk'ab' b'a schik'el ja chej milxita, oj sjaxyi b'a stojol schikin ja ma tojb'ita, jach'ni b'a stojol snan sk'ab'i, sok b'a stojol snan yoki. 15-16Tsa'an oj ya ochyi aceite b'a yoj slechanal sk'ab' b'a spakaxil sk'ab', oj ya' po'xuk ja stojol yal sk'ab'i, ti oj stsijuk juk majke b'a stojol ay ja b'a wax a'xi kajan jas majtani. 17Ja aceite janek' oj kan b'a yoj sk'ab'i, ti oj sjaxyi b'a stojol schikin ja ma' mi lek ay ajyi, jach'ni b'a stojol snan yal sk'ab'i, sok b'a stojol snan yal yoki. 18-20Jaxa aceite janek' oj kan b'a ye'tali, ti oj sjaxyi b'a s'olom ja ma' tojb'ita. Ti'xa oj yi' jan ja majtanal b'a oj sch'ay ja mulali, ti oj stsik b'a sti' sat ja Dyosi, oj cho ya och sok t'un sat trigo. B'a jach' lek oj kanuk ja ma' mi lek ay ajyi.
21—Yuj k'a jel ajula sb'aj ja ma oj tojb'uki, malan sok a ya' jun chej, chab' kilo arina, sok jun kwarta aceite. 22Ma ja' chikan jastal oj b'ob' yujil ja ye'ni, a'nima chab' yal pumus ma chab' yal tortola, ja juni ja majtanal oj makunuk b'a oj ch'ayxuk ja mulali, jaxa juni ti oj tsikxuk b'a stij sat. 23Spetsanil ja iti, ja ya'tel oj sk'u'luk ja pagre b'a swaxakil k'ak'u b'a wax ajyi ochel b'a snajtsil tsomjeli. 24Ti oj yi' och tiw ja cheji, ja aceite, ti oj sk'u'l tiw ja a'tel b'a oj ya'ki ja majtanal jumasa iti.
25—Oj cho smil ja chej it oj ja wa'wex b'a laman oj ajyanik jmoki, ja schik'eli, oj ya sta' ja yal sk'ab'i, ti oj sjaxyi b'a stojol schikin ja ma' mi lek ay ajyi, jach'ni b'a stojol snan sk'ab'i, sok b'a stojol snan yoki. 26-27Oj ya po'xuk sok aceite ja stojol yal sk'ab'i, ti oj stsijuk juk majke b'a stojol ay ja b'a wax a'xi kajan ja jmajtani. 28Oj cho sjaxyi aceite b'a stojol schikin ja ma' mi lek ay ajyi, b'a stojol snan sk'ab', sok b'a stojol snan yok. 29Jaxa aceite janek' oj kanuki ti oj sjaxyi b'a s'olom ja ma' tojb'ita, 30-31ti'xa oj smilki june ja yal chan b'a oj ch'ay ja mulali, jaxa juni oj stsik yuj ja wa stoyowoni, oj ya sta' sb'aj sok arina sok ja aceite b'a jmajtan oj ya'ki'i.
32—Jach' wax k'u'laxi yi jastal it ja ma jel ajula sb'aj wax k'a' sb'ak'teli.
Oj sak'xuk ja smakb'al ja na'itsi
33Ja Dyosi, ti yal yab' ja Moises sok ja Aaroni:
34—Ja we'nlexi, yajni la ochyex b'a slujmal ja Canaani, mi na'b'en ta mi ojto chiknajuk ja jas sb'ats'ub'al yi ja smakb'al ja na'itsi. 35Ta ay k'a a wilawex ja jastal jawi, kax alawik yab' ja pagre: Ja smakb'al ja jnaji ay jas b'ats'ub'al yi, utajik.
36—Ja yajni mitox och b'a yoj na'its ja pagre, oj yale oj jamxuk lek ja yoj na'itsi, tsa'an ti oj och sk'ela. B'a jach' mixa oj sta' kistal ja jas naka tey tiwi.
37—Yuj k'a yila ya'ax ma chak ja jas b'ats'ub'al yi'i, ma yuj jel cha'an ochel ja skuxil ja smakb'al ja na'itsi, 38ja pagre oj eluk ja b'a yoj na'its jawi, oj yale, juke k'ak'u mi ma oj ochuk. 39Yajnix ek' ja juke k'ak'u, ti oj cho sk'el jastal aya. Yuj k'a spukuta sb'aj ja skuxil ja na'itsi, 40-41oj yale oj eluk ja smakb'al ja na'itsi oj a'xi eluk ja ton jumasa b'a kistal ayi, oj nokxuk lek ja smakb'al ja na'itsi. Spetsanil ja ton jumasa sok ja snokolab'ili, oj eluk ja b'a na'itsi, oj waj jipxuk kan najat yuj ja b'ay ja kristyano jumasa, b'a jun jipub'al lu'um. 42Tsa'an oj och slok'ol ja ton jumasa, sok yajk'achil ton, jaxa b'a smakb'al ja na'itsi, oj och yajk'achil semento sok jijkab'.
43—Kechan ta ch'akta k'u'laxuk ja a'tel jumasa jawi, cho sje'a k'a sb'aj pilan majke smoj ja skuxili, 44-45oj ochuk ja pagre b'a yoj na'itsi, oj cho sk'el jastal ay. Yuj k'a spukuta sb'aj ja skuxili, ja na'its jawi, yujni mixa lekuka, kechan lek oj jipxuk ko'e; yuj ay jun schajnul wa sk'ana oj sch'ake. Spetsanil ja jas ay b'a na'its jawi, oj ch'ak waj jipxuk kan najat b'a jun jipub'al lu'um.
46—Ay k'a ma' och ja b'a na'its jaw yuj ja lutan ayi, ja ma oj ochuki, kistal oj kan man yoj a'kwal. 47Ay k'a ma' oj wa'uk ma' oj wayuk b'a na'its jawi, a schuk' lek ja sk'u' swexi.
48—Kechan ta yila k'a ja pagre ch'ayta ja skuxili, oj yale lekxa ay ja na'its jawi. 49B'a oj yal lekxa ay ja na'its jawi, oj yi'och chab' yal chan, jun mak'e te' segro, xe'n chakal k'u'uts, sok jun b'ome isopo. 50Oj yi'och ja' b'a jun lu'um oxom, ja ja'i t'ilan ti jakel b'a jun sat ja', ti oj smil june ja yal chan jawi; 51ti oj cho yi' ja jun mak'e ste'il segro ja isopo, ja chakal k'u'utsi, sok ja jun sak'an yal chani, ti oj sla' b'a yoj chik' it sokan sok ya'lel sat ja'i. Sok ja chik' jawi, oj stsijuk yi juk majke ja na'itsi, 52-53tsa'an oj sijpa el sak'an ja yal chan jaw ja pagre. Jach' wax tojb'i kan jastal it ja na'itsi.
54-56—Jach' wax k'u'laxi yi jastal it ja tuktukil sits'el ma k'a'el b'ak'teli, jach'ni ja skuxil wa sje'a sb'aj b'a k'u'al ma b'a smakb'al na'itsi. 57Ta wan k'axa neb'awex ja jastal iti, oj ja na'ex sk'eljel b'aya leki, sok b'aya mi lekuki.
Currently Selected:
Levitico 14: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
