Levitico 13
13
Chamel b'a ts'ujmil
1Ja Dyosi, yal yab' ja Moises sok ja Aaroni:
2—Ja yajni ay ma sits'el sb'ak'tel wa'n elel ya'lel ma wa'n k'a'eli, t'ilan oj waj sje' sb'aj yi junuk ja pagre jumasa. 3Jaxa pagre oj sk'el jastal ay ja sb'ak'teli, yuj k'a sak cho cha'an k'a wa'n ta'jel, yujni lepra'a, jaxa ma yi'oj ja chamel jawi, mi lekuk.
4—Yuj k'a sak ja sb'ak'teli, mik'a jel cha'anuk wa'n ta'jel b'a sts'ujmili, cho mik'a wa'nuk sakb'el ja stso'otsili, ja ma' yi'oj ja chamel jawi, kechan oj piljuk yuj ja pagre. 5B'a sjukil k'ak'u oj cho sk'el jastal aya, yuj k'a junxta ay mi yuj wa'nuk tojb'el, oj cho ya'kan pilan juke k'ak'u smoj. 6Yajnix ek' ja juke k'ak'u jawi, ja pagre ti oj cho sk'el jastal aya, yuj k'a mixa wa'nuk k'a'el, wa'nxa k'a tojb'el yujni lom chamela, ja pagre oj yale lekxa ay, jaxa ma yi'oj ja chameli oj schuk' lek ja jastik sb'aj yuj ja tojb'ita.
7—Tsa'an, yajni k'eljita cho aljita, lekxa ay ja ma' mi lek ay ajyi, yuj k'a waj spuk sb'aj b'a sts'ujmil ja sk'a'elali, jel t'ilan oj cho waj sje' sb'aj pilan majke sok ja pagre. 8Yajnix ch'ak sk'el jastal ay ja pagre, ta wan k'ax yila wa'n k'a'el oj yale, kistalni aya, oj cho yale, yujni lepra'a.
9—Ja ma wa'n k'a'el ja sb'ak'teli, oj i'xuk och b'a sti' sat ja pagre 10b'a oj yil jastal ay. Yuj k'a sak wa sje'a sb'aj ja sits'elali, cho sak k'a wa sje'a sb'a ja yal stso'otsil jumasa, jaxa b'a sits'eli wa'n k'ax ilxi sak'an ay ja sb'ak'teli, 11yujni ja' niwan chamel lepra'a. Jaxa pagre oj yale, mi lekuk ja chamel jawi, sok mixa t'ilanuk oj spile.
12—Juts'in oj b'ob' pukxuk b'a spetsanil ja sb'ak'teli. 13Ja pagre oj sk'el jastal ay ja ma' ay yi'oj ja chamel ajyi, yuj k'a pukxita spetsanil sb'ak'tel ja schameli, oj yale, mixa ti'uk yi'oj ja schameli, jun lom chamel jul sb'aj ja sts'ujmili. 14-15Kechan ta waj k'a sje' sb'aj ja b'ak'et sak'an ay, ja pagre oj sk'el lek ta yujni jach' aya, yuj k'a jach' ay ti oj yala mi lekil chameluk ja yi'oji, yuj ja sak'an b'ak'eti mi lekuk. Yujni lepra'a.
16—Yuj k'a sakb'i ja b'ak'eti, ja ma ay yi'oj chameli t'ilan oj cho waj sje' sb'ayi pilan majke ja pagre'i. 17Yuj k'a yila ja pagre sak ja b'a wa'n k'a'eli, oj yale, lekxa ay ja ma' mi lek ayi.
18-19—Ay k'a ma k'a'ta sb'ak'tel, jaxa b'a k'a'i sits' kani, sok sak wa sje'a sb'aj ma chak, t'ilan oj waj sje' sb'aj yi' ja pagre. 20Yuj k'a yila ja pagre mukxita ja sts'ujmili, sok ja yal stso'otsil jumasa sakxa, oj yale mixa lekuk ay sta'ata lepra. 21Kechan ta mi ja stuk yila b'a sts'ujmil ja chamum jawi, kechan oj spil juke k'ak'u. 22Yuj k'a takal takal wa'n spukjel sb'aj, ojni yale jel kistal ay ja chamum jawi. 23Yuj k'a wa'n ch'ayel wax yila ja schameli, oj yale lekxa ay.
24—Ay k'a ma tsikel, jaxa b'a tsikeli wa'n k'ax chakb'i, 25ja pagre oj sk'el lek jastal ay. Yuj k'a sakxa ja yal stso'otsil jumasa b'a sits'eli, cho mukxita k'a ja sts'ujmil b'a tsikeli, yuj paxta lepra'il. Ti oj yal ja pagre jelxa kistal ja chamum jawi. 26Ta mik'a jel tuk yila ja pagre ja chamel jawi, kechan oj spil juke k'ak'u ja chamumi. 27Ja k'ak'u jawi, oj cho sk'el jastal wajum, yuj k'a spukuta sb'aj ja schameli, oj yale jelxa kistal ay ja ma' mi lek ayi. 28Wan k'ax yila wanxa tojb'el ja schameli, oj yale lekxa ay, kechan yuj ja lom tsiki.
29—Ta jun winik ma jun ixuk wa'n k'a'el b'a yoj s'olom ma b'a yisim, 30ja pagre oj sk'el jastal ay ja sk'a'elali. Yuj k'a mukxita ja sts'ujmili, wa'n k'a mok'el ja tso'otsil s'olomi cho wa'n k'a k'anb'el, ja ma' mi lek ayi yuj lepra yi'oj sok jelni kistal aya oj chi'uk.
31—Yuj k'a wax yila ja pagre mi mukxeluk ja sts'ujmili, kechan mix tojb'i ja stso'otsil s'olomi, oj ya' pilan juke k'ak'u. 32B'a sjukil k'ak'u oj cho sk'el jastal ay, yila k'a me' spuku sb'aj ja sk'a'elal sb'ak'teli, 33ja ma' mi lek ayi, oj yal yab' oj sjox'el ja stso'otsil s'olomi, kechan ja b'a k'a'eli mi oj sjoxe. Oj cho ya' pilan juke k'ak'u smoj, 34b'a sjukil k'ak'u oj cho sk'el jastal ay. Mi k'a spuku sb'aj ja sk'a'elal ja sb'ak'teli, oj yale lekxa ay. 35-37Kechan ta kumxi ja schameli, ja pagre oj yale mi lek ay.
38—Ta jun winik ma jun ixuk wa sje'a jun senya k'ik'tik b'a sts'ujmili, 39kechan jun lom chamel b'a sts'ujmil, ja jawi oj aljuk lek ay.
40-41—Jun winik yuj k'a wax mok' ja stso'otsil s'olomi, b'asan k'a wax kan ja sti' spatani, ja jawi mi oj alxuk yuj mi lek ay. 42Ta wan k'a sje'a jun chak sok sak b'a b'asani, yujni sta'ata lepra'a. 43Ja jastal jawi, oj sk'el lek jastal ay ja pagre. Yuj k'a yila jach' jastal wax och sje' sb'aj lepra, 44ja winik jawi yujni ay yi'oj lepra'a, jaxa pagre oj yale mi lekuk ay ja chamum jawi.
45-46—Ja ma ay yi'oj ja chamel lepra oj ch'ixuk yi ja sk'u' swexi, ch'etan ja stso'otsil s'olom oj b'ejyuk ek'e, ja janek' oj alb'uk sok ja chamel jawi, jelni kistal oj iljuke'a. Oj smus'e t'usan ja sate'i, ti oj awanuke ek'a: —Kistal ayon. Kistal ayon.
Ja skuxil b'a k'u'al sok b'a ts'u'um jumasa
47—Ayni wax chiknaji ja ya'lel b'a k'u'ala, a'nima jel lekuk ja k'u'uts jumasa jawi, 48cho jach'ni b'a ts'u'um jumasa. 49Yuj k'a chak ma k'an ja ya'leli, oj je'xuk yi ja pagre 50b'a oj sk'ele', jaxa k'u'uts jawi, juke k'ak'u oj pilxuk. 51-52B'a sjukil k'ak'u oj cho sk'el ja pagre jastal ay ja ya'leli, yuj k'a spukuta lek sb'aj, mixa ni oj makunuk ja k'u'uts b'a sta'a ja ya'lela, oj ch'ak tsikxuk, yuj ja yajb'el jawi oj milwanuk.
53—Yuj k'a mi spuku sb'aj ja ya'leli, 54jaxa pagre oj yale oj sak'xuk lek ja b'a el ja ya'leli, jaxa k'u'uts jumasa oj pilxuk juke k'ak'u smoj. 55Yajni sak'xita ja ya'leli, ti oj sk'el ja pagre'a, yuj k'a mitox tojb'i, oj tsikxuk ja sk'u' jumasa, yujni mi lekuk ja chamela.
56—Yajnix chuk'xi ja k'u'utsi, ch'ak k'a eluk ja yelaw ja ya'lel sta'a, ja pagre oj sk'uts el ja xe'n k'u'uts jawi. 57Tsa'an ta cho sje'a k'a sb'aj ja skuxil ja k'u'uts jawi, ojni tsikxuk ela. 58Kechan ta ch'ak k'a el spetsanil ja skuxili, oj chuk'xuk jun majke smoj, sok lektoni ja k'u'uts jawa.
59—Ja' ab'al jumasa it ja sb'a k'u'uts b'a sta'unej ya'lel chameli, b'a jach' oj na'xuk ja sk'ak'u'il lek slapjel sok ja sk'ak'u'il miyuk.
Currently Selected:
Levitico 13: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
