Levitico 12
12
Me'y skuxil ja ixuk ma' wax tojb'ikani
1Ja Dyosi yal yab' ja Moisesi 2ab'i yal yab' ja israelenio ja ab'al jumasa iti:
—Jun ixuk yuj k'a yal kerem manxi ja yalatsi, juke k'ak'u ti oj ajyuk sok ja skuxili, lajan sok ja jastalni k'ajyel wax yila. 3B'a swaxakil k'ak'u oj a'xuk yi senya b'a sk'unil ja yal keremi, 4jaxa snani mi oj ya'kan sak'jel sb'aj b'a yojol jun tajb'e lajune sok oxe k'ak'u, spetsanil ja k'ak'u jumasa jawi, mi oj b'ob' syam jun jas b'a wax makuni b'a kulto, sok mi oj b'ob' waj b'a snajtsil tsomjel.
5—Yuj k'a jun yal ak'ix manxi ja yalatsi, chan lajune k'ak'u ti oj ajyuk sok ja skuxili, lajan sok ja jastalni k'ajyel wax yila ja skuxili, cho jel t'ilan oj sak' sb'aj b'a yojol ox tajb'e sok wake k'ak'u.
6-7—Yajnix ch'ak ja skuxil ja nanal yuj ja smana ja yalatsi, a'nima kerem ma ak'ix, t'ilan oj waj b'a wax ajyi ochel b'a snajtsil tsomjeli, ja pagre ti oj stsik tiw jun chej b'a ay yi'oj jun jab'il ma jun yal pumus, ma jun yal tortola, ja pagre oj stsik ja chej b'a stoyjel ja Dyosi, jaxa yal pumus sok ja yal tortola ja oj ya'yi ja Dyos b'a oj sch'ay ja mulali, jaxa nanali, ti'xa wax ch'ak yil ja skuxila.
—Jach' jastal it ja ab'al sb'a ixuk jumasa ma' wax manxi jun yal skerem ma jun yal yak'ixi. 8Kechan ta yuj k'a ja nanal mey yi'oj sts'akol ja oj sman jun yal cheji, oj b'ob' ya'yi b'a smajtan ja Dyos chab' yal pumus ma chab' yal tortola. Ja pagre oj stsik june b'a oj stoy ja Dyosi, jaxa juni oj ya'yi b'a oj sch'ay ja mulali. Jaxa nanali ti'xa wax ch'ak yil ja skuxila.
Currently Selected:
Levitico 12: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
