Levitico 11
11
Ja chante b'a lek sok b'a mi lekuki
1Ja Dyosi, yal yab' ja Moises sok ja Aaron 2ab'i yalwe yab' ja israelenio ja ab'al jumasa iti:
—A petsanilex, chikan ja stik'e chante oj b'ob' a k'ux'ex ja sb'ak'tel 3ta yuj k'a ay set ja yechi, ma yuj wa sch'ach'a chab' majke ja swa'eli. 4-8Mok a k'ux'ex ja sb'ak'tel ja cameyo, ja chich b'a k'ul sok ja alak'il chichi, a'nima wa sch'ach'a chab' majke ja swa'ele'i, mey set ja yeche'i. Jach'ni ja sb'ak'tel ja chitami mok a k'ux'ex, a'nima ay set ja yechi mi sch'ach'a chab' majke ja swa'eli, mok a yam'ex yi ja sb'ak'tel ja cham chante jawi, na'awik mi lekil chante'uk.
9—Ja schajnul ja niwan paman ja'i, ma ja b'a niwan yok ja'i, oj b'ob' a k'ux'ex ja b'a ay yal swech'i sok ja b'a ay skajlab'il spatiki. 10-12Ta mik'a ay yal swech' sok mey skajlab'il ja spatiki, mi oj b'ob' a k'ux'ex, a'nima ti'uk wax ajyiye b'a yoj ja', ja we'nlexi ilawik jastal jun kistal chante.
13-19—Ja yal chan jumasa b'a wax jujpi, ja' it jumasa b'a mi oj ja k'ux'exi, yujni mi lekuka:
ja aguila
ja quebrantahueso,
ja aguila b'a niwan paman ja'i,
ja milano,
ja avestrusi,
ja b'ujlich'i,
ja gabiota,
ja xoch'i,
ja joj b'a niwan paman ja'i,
ja surukuj kuji,
ja ibisi,
ja pelicano,
ja useji,
ja cigwenya,
ja abubiya,
ja sots'i,
spetsanil tik'e xik,
spetsanil tik'e joj,
spetsanil tik'e liklik,
spetsanil tik'e ijkin.
20—Ja yal xanich jumasa mi lek sk'uxjel spetsanil ja b'a ay swech' sok wax b'ejyi sok chane yok sk'ab'i. 21Kechan ja b'a najtik ja yok yuj ja sk'ab' b'a wax b'ajti' ek' b'a lu'umi, oj b'ob' a k'ux'ex. 22Oj b'ob' a wabyex spetsanil tik'e chulchul, ma ts'itil. 23Jaxa tuk yal chan jumasa b'a ay swech' sok chane ja yok sk'ab'i, mi lekuk. 24-25Ta ay k'a ma syama ja sb'ak'tel ja yal chante jumasa jaw ja yajni chamelxa, wani sb'ats'a sb'aj kistala, man oj och ja a'kwali, sok t'ilan oj schuk' lek ja sk'u'i.
26—Spetsanil ja chante b'a ay set ja yechi, mik'a sch'ach'a chab' majke ja swa'eli, mi lekuk, ay k'a ma syama ja sb'ak'teli, kistalni wax kana.
27-28—Spetsanil ja chante b'a wax ya sb'at lu'um schanil ja yok sk'ab'i mi lekuk. Ay k'a ma syama ma stulu ja cham chante jawi, wa sb'ala sb'aj kistal, man yoj a'kwal sok t'ilan oj schuk' lek ja sk'u'i.
29—Ja chante jumasa wax b'its'its'i b'a lu'umi, spetsanil ja jaw jumasa mi lekuk: Ja tusa, ja sajb'eni, ja tuktukil tik'e niwak chay jumasa 30ja echej chani, ja ojkotsi', ja pilan tik'e ojkotsi'. 31Ta ay k'a ma syamayi ja sb'ak'tel ja cham chante jawi, ja skistalili, ti oj ajyuk sok man yoj a'kwal. 32Ja sb'ak'tel ja cham chante jumasa jaw ta wax mok' sb'aj jun te', ma ts'u'um, ma k'u' wexal, a'tijub', ja skistalili, ti oj ajyuk sok man yoj a'kwal, t'ilan oj chuk'xuk lek b'a oj eluk ja skuxili. 33-34Kechan ta tik'ax mok' b'a yojol jun oxom b'a ay ya'lel, ma b'a yoxmal wa'el, kistalxani wax kana, ja oxom jawi oj pojxuk ele. 35Ta tik'ax ko' sb'aj b'a jun orno, mixa ni lekuka, oj ch'ak jomxuk ele. 36Spetsanil ja ma oj syamyi ja sb'ak'tel ja cham chante jumasa jawi, wani sb'ala sb'aj kistala, jaxa poso b'a oj i'xuk ja ja'i lekni oj ajyuka. 37Ta tik'ax ko' sb'aj b'a jun inat oj ts'unxuk, ja inat jawi, mi oj sta' kistal. 38Kechan ta wan k'ax pek'xi ya'lel ja inat jawi, ojni sta skistalil ja cham chante jumasa jawa.
39—Ja k'ax cham junuk ja yal chante b'a waxa k'uxuwexi, ay k'a ma syama yi ja sb'ak'teli, ojni sta' skistalil man yoj a'kwala. 40Yuj k'a chamta ja chante jawi, ay k'a ma wa stulu ma wa sk'uxu, ojni sta' skistalil man yoj a'kwala, sok jel t'ilan oj schuk' ja sk'u' swexi.
41—Ja chante jumasa wax b'its'its'i b'a lu'umi, mi oj b'ob' a k'ux'ex yuj ja jel kistali. 42Mi oj b'ob' a k'ux'ex ja b'its'il chan sok ja chajnul chab'i, chajnul ako, jokox, xanich, ay jitsan ja jastal iti, mi lek oj ja wabyex, yuj ja jel kistali. 43-45Mok we'n ita oj ja jom a b'ajex sok ja chante jumasa jawi, na'awik yuj ja ke'n Dyoson yuj ja israelenio jumasa, ke'n ka elanik b'a Egipto, b'a jach' oj ja na'ex sb'aj wa Dyosexi. Ja we'nlexi, mok a laj'ex ja jastal ja tuk kristyano jumasa, jach'ni ja ke'n, mi jachukukon jastal ja tuk dyos jumasa.
46—Ja' ab'al jumasa it ja sb'aj schajnul jumasa ja lu'umi, jujpum chan, schajnul ja', b'its'il chan, 47ja' sb'a oj ja na'ex b'a'ya leki sok b'a'ya mi lekuki, b'a'ya lek yab'jeli sok b'a'ya mi lekuki.
Currently Selected:
Levitico 11: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
