Josue 8
8
Ja Josueji snol k'ab'in ja swinkil a chonab' Ai
1Ti alji yab' ja Josue yuj ja Dyosi:
—Tsatsal k'ujolan a b'aj. —Mok xiwan. K'e'an sok spetsanil ja wa soldado jumasa b'a chonab' Ai. Ke'n oj ka'a ch'ay sna'jel ja smandaranume'i, ja swinik jumasa sok ja schonab'ile'i. 2Ja jastal a k'u'lan sok ja swinkil ja chonab' Jerico, jach' oj cho a k'u'lyi ja smandaranum ja kristyano jumasa jawi. Ja majke iti, oj ch'ak a wi'kan yi ja jastik sb'aje'i, sok spetsanil ja schanste'e'i. Al yab' ja soldado jumasa, a kanuke snalan b'a spatik ja chonab'i, b'a jach' jun ita ch'ay k'ujol oj ochuke.
3Yajni och schap sb'aj ja Josue b'a oj k'e'uk ja b'a chonab' Ai, stsa'a jun tajb'e lajune (30,000) mil soldado, ja it jumasa a'kwal sjeka. 4Ti yala'a:
—Maklayik lek. Yajni la k'otyexi, ti'xa nak'a b'ajex b'a spatik ja chonab'i, mok jel najat wajanik, chapa a b'ajik jastal oj ochanik. 5Jaxa ke'n sok ja tuk soldado jumasa stojol oj ochkotikon. Yajnix yabye ja kristyano jumasa b'a Ai, oj el nol k'ab'inuke, jaxa ke'ntikoni oj paktikon ajnel jach'ni ja jastal ek' ja b'ajtani. 6Jaxa ye'nle'i oj yal'e yujni wa'ntikoxa spakjel ajnela, oj snochotikone, b'a jach' takal takal oj eluke b'a schonab'ile'i. 7Jaxa we'nlexi elanik b'a nak'anexi, ch'akan ochanik ja b'a chonab'i; ja ma' Dyos kujtiki, ojxa ya b'a jk'ab'tik. 8Yajni la ochyexi, chimawik sk'ajk'al, jach'ni jastal yalunej ja Dyosi. Ja' ab'al it ja wax ka' wi'exi.
9Ja Josue, ti sjeka ja soldado jumasa, b'a stojol wax och ja k'ak'u yuj ja chonab' jawi, ja b'a oj snak' sb'aje'i, ti b'a snalan ja Betel sok ja Ai. Ja jaw jumasa ti'ni wajye b'a chonab' jawa, kanye'to jun a'kwal ja Josue sok ja soldado jumasa it tey sok ja ye'n.
10Ja pilan sakb'eli, sajto lek k'e' ja Josue stsomo ja soldado jumasa. Jaxa Josue sok ja ma'tik ay ya'tel yuj ja israelenio jumasa, ye'n b'ajtan ek'ye yuj ja soldado jumasa, man k'otye ja b'a chonab' Ai. 11B'a stojol lek ja chonab' jawi ti k'otye tek'ana, ti jijliye tiwi. Ja b'a sk'u'lan ja snaje sok k'u'utsi, ay jun slomanal. 12Jo'e mil (5,000) kristyano jumasa yala yab' ja Josue tix waj snak' sb'aje b'a stojol wax och ja k'ak'u yuj ja chonab'i, b'a nalanajel yuj ja Betel sok ja Ai. 13Ja soldado b'a a'ayi, ti ajyiye b'a k'e'el k'inal, ja b'a t'usani, ti kanye b'a stojol wax och ja k'ak'u yuj ja chonab' jawi, ja Josue ti ek' yuj ja a'kwal b'a yoj loman yaman. 14Ja mandaranum b'a chonab' Ai, yajni yila ja soldado jumasa yi'oj ja Josue, ti schapa sb'aj sok ja swinik ye'n. Tojxta ko'ye ko b'a loman b'a Jordan, b'a oj tiro'anuke sok ja israelenio jumasa, mini t'un wa sna'awe ta ti oj och jan b'a spatike ja ma oj yi'kan ja schonab'ile'i. 15Jaxa Josue sok ja swinik ye'n, sje'a sb'aje wa'ne kumxel spatike, ti wajye b'a job'iltik Jordan. 16Spetsanil ja soldado jumasa sb'a chonab'i, ch'ak wajuke nutswanel, jaxa israelenio jumasa kechan wa'ne smajlajel oj wajuke b'a najat. 17Mini b'a chonab' Ai, sok mini b'a Beteli, mini jun soldado kana; spetsanil ch'ak wajuke b'a waj yi'e spatik ja israelenio jumasa, ti ya'wekan jaman ja b'a wax ajyi ochel ja niwan chonab'i.
Ch'ayji sna'jele ja swinkil ja chonab' Ai
18Jaxa Dyosi, ti yal yab' ja Josue: —Tojoyi ja wa pulte b'a stojol ja chonab' Ai, ke'nani oj ka'a ch'ay sna'jelea.
Jaxa Josue sxijpun ja sk'ab'i, stojo lek yi ja spulte b'a stojol ja chonab'i. 19Yajni yilawe wa'n slikjel ja spulte ja Josue, ajnel ch'ak eluke jan ja soldado jumasa b'a nak'ane ajyi, ch'ak ochuke b'a yoj chonab'i, slapawe sk'ajk'al. 20-21Yajni kumxiye jan ja soldado jumasa sb'a Ai, wajto yil'e tatxta wa'n k'e'el ja stab'il ja schonab'ile'i. Jach'ni ja Josue sok ja swinik jumasa ye'n, cho yilawe'ni jastal wa'n k'e'el ja tab'a, ja swinkil ja chonab' Ai, yabye ochyeta ja israelenio jumasa b'a schonab'ile'i, sok ch'akta lapjuk k'ak' ja jas b'aje'i. Mixa sta'a b'a oj skolta sb'aje'a, ja'yuj ja Josue sok jas soldado jumasa ye'n, yochele smiljel ja kristyano jumasa jawi. 22-23Ja israelenio jumasa ma'tik stsika ja chonab'i, ch'ak eluke, sjoyb'ane ja swinkil ja chonab' jawi, ch'ak smil'e spetsanil. Mini jun ma spaka yujile ajnela, jaxa mandaranum it syamawe'i, ti yi'aje och b'a sti' sat ja Josue.
24Ja israelenio jumasa jach' b'ob' smil'e jastal it ja ma i'ji spatike yuji, tsa'an ochye b'a yoj chonab'i, ch'ak smil'e' ja ma tey b'a yoj chonab'i. 25-26Ja Josue ja k'ak'u jawi, ti'toni ch'ipan yuj ja spulte b'a stojol ja chonab' jawa, jaxa israelenio jumasa ch'ak smil'e spetsanil ja swinkil ja chonab' jawi, ja spetsanil janek' ay ja kristyano jumasa, ay mojan lajchawe (12,000) mil. 27Spetsanil ja chante jumasa, sok spetsanil ja jas ay b'a yoj chonab'i, ch'ak yi'e kan ja israelenio jumasa. Yujni jach' alub'al yab' ja Josue yuj ja Dyos jach' oj sk'u'luke'a. 28Ti yala ja Josue lapawik sk'ajk'al ja chonab' Ai, man oj kan jastal jun jipub'al lu'um b'a wantox b'ob' ilxuk. 29Cho yala a ya'we k'e' lokan te' ja sb'ak'tel ja mandaranum b'a Ai, ti kan lokan tiwi, man och ja a'kwali. Ti'to waj yawe ko'uka, ti waj sjip'e kan b'a wax ajyi ochel ja chonab'i. Tsa'an st'enawe kan sok jun monton ton man ya'n tini wax ilxi'a.
Ja ab'al ts'ijb'anub'ali, ti sk'uman ja Josue b'a wits Ebal
30Tsa'an ja Josue, sjeka k'u'luman jun yaltar ja Dyos yuj ja israelenio b'a wits Ebal. 31Jach' sk'u'lan jastal yaloj kan yab' ja israelenio jumasa ja Moises ya'tijum ja Dyosi, B'a jas ts'ijb'anub'al yuj ja Moisesi, jach' wax yala jastal iti. K'u'lan jun altar sok ton b'a mi polob'aluk, ma b'a mi k'okeluk. Ja tiwi sjekawe jitsan tik'e smajtan ja Dyosi.
32Spetsanil ja israelenio jumasa, yilawe ja jastal sts'ijb'an ja Josue b'a ton ja jas yala kan ja Moisesi. 33Tsa'an ch'ak stsom sb'aj spetsanil ja kristyano jumasa, ma israelenio, ma jakel pilan chonab'i, sok spetsanil ja ma ay ya'tel yujile'i, stsomo sb'aje chab' k'ole. Scholo sb'aje, nupnup sat kanye, ti yi'oje b'a snalane ja skajonil ja strato sk'u'lunej ja Dyosi. B'a spatik ja jun k'ole'i, tey ja wits Gerizim, b'a spatik ja pilan k'ole'i, tey ja wits Ebal. Ja pagre jumasa yintil ja Levi, ti aye sok lajan ja skajonil strato ja Dyosi. Jach' yala kan ja Moises jach'ni oj schol sb'aje'a, ja b'a oj b'ob' yil'e lek ja kristyano jumasa ja pagre jumasa. 34-35Jaxa Josue sk'uman tsats spetsanil ja jas ts'ijb'anub'al b'a sju'unil ja jas yala ja Moisesi, ti ts'ijb'anub'al tiw ja b'a slekilale'i, sok ja b'a mi lekuki. Ti aye spetsanil ja israelenio jumasa, winik ixuk, yal untik, sok b'a pilan chonab' ti aye'a.
Currently Selected:
Josue 8: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
