Josue 23
23
Ja Josue spila b'aj sok jas moj jumasa
1Ja Dyosi, jel jitsan k'ak'u ya'yi slamanil sk'ujol ja israelenio jumasa. Jelxa awel ja Josue, 2ti sjeka spayjel ja ma'tik ay ya'tel yuj ja israelenio jumasa. Ti yala'a:
Ja ke'n jelxa awelon. 3A petsanilex ch'aka wil'ex ja jas sk'u'laji yi ja niwak chonab' jumasa, jach' sk'u'lan ja Dyosi, b'a a lekilal we'nlex, ye'n a'tiji ja Dyos yuj ja we'nlexi. 4Spetsanil ja lu'umi, man b'a niwan ja' Jordan man b'a niwan paman ja' Mediterraneo, ch'ak ka'yi e' ja wa k'ole'ex jumasa, ja lu'um jumasa jawi, ja b'a ch'akta ka'tik el kani, cho jach'ni ja b'a mitox el kujtiki, ti'ni ay b'a yojola. 5Ja ma' Dyos kujtiki, yala kab'tik: Ke'n oj ka kumxuk spatik ja ma' mi lek wax yilawexi. Jaxa we'nlexi ojni b'ob' a'tijanik jitsana, ja ma' mi lek wax yilawexi oj ch'ak jnuts el ja b'a slu'ume'i, B'a jach' oj b'ob' a b'ajukex ja lu'um jumasa jawi. Ja jas yala ojni sk'u'luka: Ja kristyano jumasa ma ti'to ay b'a yojoli, oj ch'ak snuts ele. 6Kechan toj lek k'u'anik ja ab'al ts'ijb'anub'al yuj ja Moisesi. Mokni waj ch'ayuk a k'ujolexa.
7Mok a sok a b'ajex sok ja kristyano jumasa jaw ti'to ay a mokexi. Mok a toy'ex yi ja sdyose'i, mok a k'u'ukex ja jas oj yal'e'i. Mok a ta'ex ti' ja sdyose'i, mok a ta'ex ti' ja sb'i'ili. 8Toj ajyanik ja b'a sti' sat ja Dyosi, jach'ni jastal ayex ja ya'n, 9ja Dyosi jitsan kristyano ch'ak snutse, a'nima jeluk ja yipe'i. Mi'ma b'ob' k'e' tek'an b'a sti' wa satexi. 10Malan sok june ja we'nlexi, jel jitsan oj ya spak ajnel ja ma' mi lek wax yilawexi, jach'ni jastal yala wabyex ja Dyos ye'n oj tiro'anuk yuj ja we'nlexi.
11Ja'yuj kechani ye'n ja Dyos oj ja yajtayexa, Yujni kechan ye'n Dyos kujtika. 12Toj ajyanik sok ja ye'n. Mok a sok a b'ajex sok ja kristyano jumasa ma' ti'to ay tiwi, mok cho nupananik soke. 13Ta yuj k'a mi oj ja k'u'ukexi, ja Dyosi, mi oj ya eluk ja kristyano jumasa b'a sti' wa satexi, ja ye'nle oj b'ob' yixtala'ukex, jaxa Dyosi, oj makunuk yuj jastal jun ts'u'um oj sb'its' yi ja wa patikexi, ma jastal jun k'i'ix oj sch'ub' yi wa satexi. Ja iti, jach'ni oj waj ocha, man mini jun ma' oj kan awujilex ja b'a lekil lu'um ya'wi'ex ja ma' Dyos kujtiki.
14Ja ke'n ojxa chamkon, jach' jastalni wax cham spetsanil ja kristyano jumasa. Ja we'nlexi, waxa na'awex lek, ja Dyosi, spetsanil ja jas lek yala oj sk'u'luki, mini jas wax ya'kan b'a mi oj sk'u'luka. Spetsanil ja jas yala oj sk'u'luki, smeranil ni sk'u'lana. 15-16Jach' jastal ch'ak sk'u'l spetsanil ja jas lek yala oj sk'u'luki, jach' oj cho ya' a tup'ex ta yuj k'a waxa k'okowex ja yab'ali. Ja Dyosi, sk'u'lunej jun lo'il a mokex, wa smajla oj ch'ak a k'u'lukex. Ta mik'a la ajyiyex toj sok ja ye'n, ta wan k'axa k'u'anex pilan dyos, ja ye'n ojni tajkuka wujilexa, oj ya a tup'ex spetsanil ja jas mi lek oj ja k'u'lukexi, man mini jun ma oj kanuk a wujilex ja b'a lekil lu'um ya'wi'ex ja Dyos kujtiki.
Currently Selected:
Josue 23: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
