Josue 22
22
Ja k'ole jumasa ma kumxi b'a slujmali
1Tsa'an ja Josue yajni ch'akta sk'ep ja lu'umi, ti sjeka spayjel ja k'ole jumasa sb'a Rubeni, sb'a Gad sok sb'a Manases it tey b'a stojol wax och ja k'ak'u, 2ti yala'a:
—Ja we'nlexi, ch'akni a k'u'ukex spetsanil ja jas yala ja Moisesi, cho jach'ni ja jas kala ja ke'n. 3Spetsanil ja jasti yala ja Dyosi, jel lek a k'u'anex, mixa wilawex k'elan ja wa mojex israelenio'ili, b'a mi oj ja koltayex. 4Jaxa ye'nle ja ya'n jel laman aye, jach'ni jastal yala ja Dyos kujtiki. Ja ya'n ojxa b'ob' kumxanik b'a wa lu'umex it a wa'wex el kan b'a stojol wax jak ja k'ak'u yuj ja niwan ja' Jordan it ye'n ya'wi'ex ja Moisesi. 5Ja'yuj mokni ch'ayuk a k'ujolex b'a mi oj ja k'u'ukex ja jastik yala wabyex ja Moisesi. Yajtayik ja Dyosi, sok k'u'lanik ja jas wa sk'ana ja ye'n. K'u'anik spetsanil ja jas wax yala, toj ajyanik sok ja ye'n. A'teltayik sok spetsanil a k'ujolex sok spetsanil a wipex.
6-9Ja we'nlexi, oj kumxanik sok jitsan jastik a b'ajex, yuj ja we'n ch'aka wi'ex kan yi spetsanil ja jastik sb'aje ja ma' mi lek waxa wila b'ajex soki, wakax, chej, k'anal tak'in, sakal tak'in, bronce, yerro sok jitsan k'u'uts. Ch'akan k'epa a b'ajik sok spetsanil ja wa moj alijelexi.
Oj k'an yi ja Dyos oj stalnayex lek sok oj yil'ex lek. Ojxa b'ob' kumxanik ja b'a wa lu'umexi.
Ja k'ole sb'a Ruben sok sb'a Gadi, ti ya'we kan ja tuk israelenio jumasa b'a Silo b'a chonab' Canaan, jaxa ye'nle'i kumxiye b'a slujmale. Ti wajye b'a Galaad, yuj ja syajal sk'ujol ja Dyosi, ya'we el kan ja lu'um jawi, sok a'ji yi'e yuj ja Moisesi. Jaxa Moisesi, ya' ojxa ni yi slu'um ja nalan k'ole sb'a Manases it tey b'a Basan b'a stojol wax jak ja k'ak'u yuj ja niwan ja' Jordani.
Jaxa Josue cho ya'yi slu'um ja nalan k'ole sb'a Manases it tey b'a stojol wax och ja k'ak'u yuj ja niwan ja' Jordani, yuj ja lom ti kanye b'a Silo sok ja tuk israelenio jumasa.
Ja altar it tey b'a stojol wax jak ja k'ak'u yuj ja niwan ja' Jordani
10Yajni k'otye b'a Jordan ja k'ole jumasa sb'a Rubeni, sb'a Gad sok snalan b'a Manases it ti aye b'a stojol wax och ja k'ak'u, ja mitox ek' sk'uts e' ja niwan ja'i, sk'u'lane jun niwan altar. 11Yajni yabye ja tuk israelenio jumasa, ya'weta k'e' jun altar ja k'ole jumasa jawi, ti ya'we k'e' b'a smojone sok ja lu'um b'a Canaan b'a stojol wax och ja k'ak'u yuj ja niwan ja' Jordani, ti b'a yoj slu'um ye'nle ja israelenio. 12Yajni yabye'i, jel tajkiye stsomo sb'aj spetsanil ja soldado jumasa b'a Silo b'a oj waj k'e'uke tiro'anel sok ja kristyano jumasa jawi, chab' k'ole sok snalan. 13B'a oj sta'e jastal oj ochuke'i, ja' sjekawe b'ajtan ja Finees yunin ja pagre Eliazari, b'a oj sk'umuk sb'aje sok ja k'ole sb'a Rubeni, sb'a Gad sok ja snalan sb'a Manases it tey b'a stojol wax jak ja k'ak'u yuj ja Galaad. 14Sok ja ye'n waj lajune tatal yuj ja k'ole jumasa ma'tik smoj alijel sb'aje' b'a k'ole israelenio. 15Yajni k'otye b'a chonab' Galaad ja b'a'ye ja kristyano chab' k'ole sok snalani, 16yalwe yab' ja kristyano jumasa jawi, ja wajele b'a spetsanil ja yuntikil ja Dyosi, ti yalawe'a:
¿Jas lom waxa lo'lanex ja Dyos yuj ja israelenio jumasa b'a? ¿Jas lom a k'u'lanex ja altar it ja ti waxa je'awex mixa kisawex ja Dyos b'a? 17¿Wa'nto ma xjak a k'ujolex ja wa mul a le'awex b'a Peori, sok ja niwan chamel ya'ki'tik ja Dyosi? Ti'to wa'ntik wokol yuj ja jaw jumasa, 18¿Jaxa ya'n ojxa cho a jipawex kan ja jas yala? ¿Mi ma t'un xjak a k'ujolex, ta oj ja k'ok'ex ja yab'al ja Dyosi, lajan oj ch'ak ya jtuptik sok spetsanil ja israelenio jumasa b'a?
19Ta yuj k'a waxa wilawex mi oj b'ob' a toy'ex ja Dyos ja b'a lu'um a wi'ojex kani, la'ik ja b'a lu'um b'a ye'n stsa'unej ja Dyos b'a oj toyxuki. Tsa'awik b'a' oj toytikon ja ke'ntikon b'a oj b'ob' a toy'exi, kechan moka pil a b'ajex sok ja Dyosi. Ta yuj k'a a pila a b'ajex ja we'nlexi, jach'ni ja ke'ntikoni, ojni cho jta' jmultikona. Ja'yuj mok a k'u'lukex pilan altar yuj ja yaltar ja Dyosi. 20Mok ch'ayuk a k'ujolex ja jas k'u'lan ja Acan yunin ja Zerahi, yuj ja lom snolo ja jas oj sch'ay sna'jel ajyi, ja'yuj spetsanil ja israelenio jumasa a'ji stup'e yuj ja Dyosi. —Mi kechanuk ye'n cham ja Acan yuj ja smul sle'a.
21Jaxa chab' k'ole sok snalani, ti yalawe'a:
22-23—Ja ma' Dyos kujtiki, kechani ye'n jel ja yip yuj spetsanil ja tuk dyos jumasa. —Ja ye'n wa sna'a jasyuj, ja k'u'lantikon ja iti, jachuk ja we'nlexi, wax k'anatikon oj cho a na'ex. Yuj k'a jk'u'lantikon, b'a ja mi oj kistikon ja Dyosi, ma yuj wa'ntikon sle'jel jastal oj pil jb'ajtikon sok, ja lek ch'ayawik jna'jeltikon. A'nima ti xya jtuptikon ja Dyos ta yuj k'a jk'u'lantikon jun altar b'a ti oj ka'tikon yi ja smajtani.
24Ja smeranili, mi jachukuk jastal jawi, jk'u'lantikon ja altar jawi, yuj wa'ntikon xiwel lek xk'ot jun k'ak'u oj yal'e yab' ja kuntikiltikon ja wa wuntikil we'nlexi: Ja we'nlexi, mi jas a wi'ojex sok ja Dyos yuj ja israelenio jumasa. 25Ja Dyosi, ye'n yala oj makunuk kujtik b'a jmojontik ja niwan ja' Jordani, ja'ni ja k'ole sb'a Ruben sok sb'a Gadi. Ja'yuj ja we'nlexi, mini jas a wi'ojex sok ja Dyosi. Ta yuj k'a jach' jastal jawi, oj b'ob' t'enjuk ja kuntikil ke'ntikon yuj ja wa wuntikil we'nlex a sjip'e kan ja Dyosi.
26Ja'yuj jtojb'estikon jun altar, mi yuj b'a ti oj ka'tikon yi' tiw ja smajtan ja Dyosi, 27jtojb'estikon jastal jun senya b'a oj na'tik lajan jasunk'a ek'i, jach'ni ja kuntikiltiki, oj sna'e wanix toyotik ja sb'i'il ja Dyosi, cho ye'nani wax ka'tik yi ja smajtani. Ja wa wuntikil we'nlexi, mi oj b'ob' yal'e yab' ja kuntikil ke'ntikoni: Ja we'nlexi mi jas a wi'ojex sok ja jDyostikoni.
28Ta jach' k'a waj ek' jastal jawi, ja kuntikil ke'ntikoni, oj b'ob' yal'e jastal iti: Ja ma' ek' paxta kujtikoni, stojb'ese jun altar jastal tojb'el b'a chonab' silo, b'a ti oj iljuk jach'ni ja ke'ntikoni, wanix cho jtoyotikon ja sb'i'il ja Dyosi, mi yuj b'a oj makunuk b'a oj ka'tikon yi smajtan ja Dyosi. 29Ja smeranili, mi yuj wanukotikon spiljel jb'ajtikon sok ja Dyosi, mi yuj jk'u'lantikon ja altar it b'a oj tsiktikon yi chante ja Dyosi, ja altar iti, mix k'anatikon oj ka'tikon slok'oluk ja altar it tey b'a Silo.
30Yajni ch'ak yabye ja sb'ej ja pagre Finees sok ja smoj jumasa, ti'xa tsamal ajyiye'a. 31Jaxa Fineesi, ti yala'a:
—Man ya'n wax na'atikon mi yuj wa'nukex spiljel a b'ajex. Ja Dyosi, ti'ni ay jmoktika, mi jas mi lekuj oj sk'u'lki'tik.
32Tsa'an ja Finees sok ja smoj jumasa, ya'we kan ja kristyano jumasa it ti aye b'a Galaadi, kumxiye b'a Canaan b'a waj yal'e yab' ja smoje israelenio'il ja jas ch'ak sna'e'i. 33Yajni ch'ak smaklaye ja israelenio jumasa, jel lek yabye ja jas wa'ne sk'u'lajel ja kristyano jumasa jawi, jel stoyowe ja Dyosi. Mixa ma' yala yujile oj ochuke tiro'anel sok ja k'ole sb'a Ruben sok sb'a Gadi, mini ja slu'ume'i mi ma jas oj sk'u'l yi. 34Ja k'ole jumasa jawi ya'we sb'i'iluk ja altari, Ala ja smeranili. Ti yalawe'a, ja smeranili, yujni kechani ye'n Dyos ja ma' Dyos kujtika.
Currently Selected:
Josue 22: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
