Josue 24
24
Ja Josue stsomo ja kristyano jumasa
1Spetsanil ja k'ole jumasa yuj ja israelenio, ti stsomo ja Josue b'a Siquem. Spaya spetsanil ja ma'tik ay ya'tele'i, ti stsomo sb'aj sok b'a sti' snajtsil tsomjel. 2Ti yala yab' spetsanil ja kristyano jumasa:
Jach' wax yala jastal it ja Dyos yuj ja israelenio jumasa:
Ayxa lek k'ak'u ja ma' ek' paxta a wujilexi ti ajyiye b'a Mesopotamia, stoyowe tuktukil dyos. June ja ma ek' paxta a wujilexi, sb'i'il Terah, ja stat ja Abraham sok ja Nahori. 3Man b'a chonab' jawi, ti kal yab' ja Abraham a waj b'a spetsanil ja slujmal ja Canaani, ka'yi jun yunin ya sb'i'iluk Isaac, b'a ye'n oj manxuk jitsan lek ja kristyano'i. 4Ja Isaac ka'yi chab' yuntikil sb'i'ile' Jacob sok Esau, Ja Esau ja ka'yi ja yaxk'ul jumasa b'a Seir, jaxa Jacobi, ti waj b'a Egipto sok ja yuntikili.
5-6Tsa'an jekawe ja Moises sok ja Aaron b'a oj ya'we eluk ja ma' ek' paxta a wujilexi, jaxa egipsiano jumasa jel ka'yi'e ja wokoli. Jach' b'ob' ka eluk ja ma' ek' paxta a wujilexi, yajni elye'i, ti ki'aje b'a niwan paman ja' it jel yakili. I'ji spatike yuj ja egipsiano jumasa sok karro sok kawu, 7yuj ja sk'anawe ki ts'akatal oj koltaye. Ja'yuj ja ke'n ka k'ik' b'uk k'inal ja b'a snalane sok ja egipsiano jumasa, ch'ak musjuke kan yuj ja ja'i, ti ch'ak sjik'je ja' tiwi. Ja we'nlexi waxa na'awex lek spetsanil ja jas jk'ulan b'a Egipto. Tsa'an jitsan k'ak'u ti ajyiye b'a takin lu'um k'inal, 8man ki'aje jan b'a slujmal ja amorreo jumasa b'a stojol wax jak ja k'ak'u yuj ja niwan ja' Jordani. Ja amorreo jumasa stsomo sb'aje b'a oj sch'ak e' a na'jelex, kechan yuj ja ke'nani ka'a b'ob' a wujilexi, jachuk a wi'ajex kan ja lu'um jumasa jawi.
9Tsa'an ja mandaranum Balac b'a Moabi, mixax yilawex lek, sjeka spayjel ja Balaami. Sk'ana yi ts'akatal a sk'u'luk a wi'ex b'a mi lekuk 10ja ke'n mi ki'aj lek, ja'yuj lek ja jas sk'u'lan a wi'exi. Jach' b'ob' jkoltanex jastal jaw ja ke'ni. 11Ek' sk'uts e' ja niwan ja' Jordani, k'otye man Jerico. Jaxa kristyano jumasa tiwi, och tiro'anuk a mokex, cho jach'ni ja kristyano jumasa b'a Canaani. Jaxa ke'n ka'ni b'ob' awujilexa. 12Mi we'nukex ja b'ob' a wujilex sok ja chab' smandaranum ja amorreo jumasa, ke'n ka och sxiwele wa'nxta k'itk'unuke ch'ak spak e' ajnel. 13Ke'n ka'wi'ex ja lu'um jumasa jawi, mini t'un we'n a wa'teltayexa, mini ja chonab' jumasa, mi we'n a tojb'esex. Ja ya'n ti ayex tiwi, waxa lo'owex sat ts'usub' aceituna mi a ts'unb'enuk we'nlex.
Ja kristyano sk'u'lan yajk'achil lo'il sok ja Dyosi
14Ti cho yala ja Josue:
Kisawik ja Dyosi, k'u'anik ja ye'n, toj ajyanik sok, pila b'ajik sok ja tantik k'u'lub'al dyos stoyowe ja ma ek' paxta a wujilex b'a Mesopotamia sok b'a Egipto, kechan ye'n k'u'anik ja Dyosi. 15Kechan ta mixa k'ana oj ja k'u'ukex ja ye'n, ja ya'an alawik b'a'ya waxa k'ana oj a k'u'ukexi. Tsa'awik junuk ja sdyos wa sk'u'ane b'a Mesopotamia ja ma ek paxta a wujilexi, ma ja sdyos sk'u'ane ja amorreo jumasa, yujni slu'um ye'nle ja b'a ayex ja ya'n. Jaxa ke'n sok ja swinkil jnaj jumasa, ja'ni oj k'u'uktikon ja ma' Dyos kujtika.
16Ti yalawe ja kristyano jumasa:
Mini oj ka'tikon kan ja ma' Dyos kujtiki. Mini oj nochtikon pilan dyos jumasa'a. 17Ye'n ja Dyos ya eluk ja ma ek' paxta kujtikoni; ya elkotikon b'a sk'ab ja b'a Egipto. Wax na'atikon lek ja milagro jumasa sk'u'lan ki'tikoni, wax cho jna'atikon jastal stalnanotikon ja ek' jk'utstikon ja niwak chonab' jumasa, man jultikon ja ili. 18Ye'n ja Dyos ch'ak snuts el ja kristyano jumasa ma tey b'a jb'ejtikoni, sok ja amorreo jumasa ma ti ajyiye ili. Ja'yuj wanix k'u'antikon ja Dyos kujtiki.
19Ti cho yala ja Josue:
Mi oj b'ob' a wa'teltayex ja Dyosi, ja ye'n mix yi'aj lek ja ma je sle'jel smuli, mix yi'aj lek ja tuktukil dyos oj ja k'u'ukexi, ja ye'n wa sk'ana ay ma oj k'u'ajuk yuj. Ta mi la ajyiyex toj, mini oj ya'wex b'a mi oj ya tup'exa.
20A'nima jel lek wax yilawex, wanix tajki ta yuj k'a waxa jipawex kan sok waxa k'u'anex pilan dyosi. Oj ya' a tup'ex, sok oj sch'ay a na'jelex.
21Ja kristyano jumasa ti yalawe yab' ja Josue:
Mini oj b'ob' jk'u'ltikon jachuka. Kalatikonta oj ka' jb'ajtikon sok spetsanil k'ak'u ja Dyos kujtiki.
22Ja'yuj ti cho yala ja Josue:
We'n waxa walawex ti oj ajyanik sok ja Dyosi.
Jach'ni'a, —xchi ja ye'nle'i.
23Ti cho yala ja Josue:
Ta jach' k'a'i, pila a b'ajik sok ja wa dyosex it ti'to a wi'ojexi, alawik oj ajyanik toj sok ja Dyos yuj ja israelenio jumasa.
24Ti yalawe ja kristyano jumasa:
Ja ke'ntikoni, ti oj ajyukotikon sok ja Dyosi, kechan ja oj k'u'uktikon ja jas wax yala ja ye'n.
25Ja junxta k'ak'u jawi, yuj ja ti aye b'a Siquemi, ja Josue sok ja kristyano jumasa, ya'we ajk'achb'uk ja slo'ile sok ja Dyosi. Ja b'a lo'il jawi, yalawe jun majke smoj, ja ab'al jumasa jawi, jel t'ilan oj sk'u'uke ja kristyano jumasa. 26Jaxa Josue, ti sts'ijb'an kan b'a sju'unil ja yab'al ja Dyosi. Ti yi'aj jun niwan ton ti stojb'es lek b'a yib'el ja niwan yaxte it tey sok lajan ja snajtsil stsomjel ja Dyosi. 27Ti yala yab' spetsanil ja kristyano jumasa:
Ja ton it waxa wilawexi, ja wa sk'ana sje'ki'tik spetsanil ja jas yala kab'tik ja ma' Dyos kujtiki. Ti wax ka'a kan ili, b'a ti oj jak a k'ujolex toj oj ajyanik ja b'a sti' sat ja Dyos kujtiki.
28Ti'xa spila sb'aj ja Josue sok ja kristyano jumasa, jujune wajye b'a slu'ume'i.
Mukjiye ja Josue, ja Eliazar sok ja Jose
29Tsa'an ti'xa cham ja Josue, ja yajni cham ja winik it ya'tijum ja Dyosi, ay yi'oj jo' tajb'e lajune (110) jab'il. 30Ti smukuwe b'a slujmal ye'n b'a Timnat-sera, tey b'a yaxk'ul jumasa, b'a slu'um ja k'ole b'a Efrain it tey b'a k'e'el k'inal yuj ja wits Gaas.
31Ja janek' ajyi sak'anil ja Josue kechani ja' sk'u'ane ja Dyos sak'an ja israelenio jumasa'a. Yajni cham ja Josue ja kristyano'i, tojni ajyiye sok ja Dyosi. Kechan jach' sk'u'lane ja yajni sak'ane'to ja ma' ay ya'tel yujile'i, yuj ja wa sna'awe lek spetsanil ja jas k'u'laji yi'e yuj ja Dyosi.
32Ja yajni elye b'a Egipto ja israelenio jumasa, stsomowe jan spetsanil ja sts'ub'il sb'akel ja Jose, ti smukuwe b'a jun lu'um b'a chonab' Siquem ye'n smanunej kan ja Jacobi, stupu jo' tajb'e (100) sat tak'in toj sakal tak'in, ja lu'um jawi, ye'n schonowe ja yuntikil ja Jamor stat ja Siquemi. Jachuk ja lu'um jawi, ye'nxa yi'aje kan ja yintil jumasa ja Jose.
33Cho cham ja Eliazar yunin ja Aaroni, ti wa mukjuk b'a jun wits, b'a yaxk'ul b'a lu'um sb'a k'ole b'a Efraini. Ja wits jawi ja sb'aj ajyi ja yunin Fineesi.
Currently Selected:
Josue 24: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
